శ్రీమద్వాల్మీకీయ రామాయణే కిష్కింధాకాండమ్ ।
అథ షట్పంచాశస్సర్గః ।
ఉపవిష్టాస్తు తే సర్వే యస్మిన్ప్రాయం గిరిస్థలే ।
హరయో గృధ్రరాజశ్చ తం దేశముపచక్రమే ॥ 1 ॥
సంపాతిర్నామ నామ్నా తు చిరంజీవీ విహంగమః ।
భ్రాతా జటాయుషః శ్రీమాన్విఖ్యాతబలపౌరుషః ॥ 2 ॥
కందరాదభినిష్క్రమ్య స వింధ్యస్య మహాగిరేః ।
ఉపవిష్టాన్హరీందృష్ట్వా హృష్టాత్మా గిరమబ్రవీత్ ॥ 3 ॥
విధిః కిల నరం లోకే విధానేనానువర్తతే ।
యథాఽయం విహితో భక్ష్యశ్చిరాన్మహ్యముపాగతః ॥ 4 ॥
పరంపరాణాం భక్షిష్యే వానరాణాం మృతం మృతమ్ ।
ఉవాచేదం వచః పక్షీ తాన్నిరీక్ష్య ప్లవంగమాన్ ॥ 5 ॥
తస్య తద్వచనం శ్రుత్వా భక్ష్యలుబ్ధస్య పక్షిణః ।
అంగదః పరమాయస్తో హనూమంతమథాబ్రవీత్ ॥ 6 ॥
పశ్య సీతాపదేశేన సాక్షాద్వైవస్వతో యమః ।
ఇమం దేశమనుప్రాప్తో వానరాణాం విపత్తయే ॥ 7 ॥
రామస్య న కృతం కార్యం రాజ్ఞో న చ వచః కృతమ్ ।
హరీణామియమజ్ఞాతా విపత్తిస్సహసాగతా ॥ 8 ॥
వైదేహ్యాః ప్రియకామేన కృతం కర్మ జటాయుషా ।
గృధ్రారాజేన యత్తత్ర శ్రుతం వస్తదశేషతః ॥ 9 ॥
తథా సర్వాణి భూతాని తిర్యగ్యోనిగతాన్యపి ।
ప్రియం కుర్వంతి రామస్య త్యక్త్వా ప్రాణాన్యథా వయమ్ ॥ 10 ॥
అన్యోఽన్యముపకుర్వంతి స్నేహకారుణ్యయంత్రితాః ।
తేన తస్యోపకారార్థం త్యజతాఽత్మానమాత్మనా ॥ 11 ॥
ప్రియం కృతం హి రామస్య ధర్మజ్ఞేన జటాయుషా ।
రాఘవార్థే పరిశ్రాంతా వయం సంత్యక్తజీవితాః ॥ 12 ॥
కాంతారాణి ప్రపన్నాః స్మ న చ పశ్యామ మైథిలీమ్ ।
స సుఖీ గృధ్రరాజస్తు రావణేన హతో రణే ॥ 13 ॥
ముక్తశ్చ సుగ్రీవభయాద్గతశ్చ పరమాం గతిమ్ ।
జటాయుషో వినాశేన రాజ్ఞో దశరథస్య చ ॥ 14 ॥
హరణేన చ వైదేహ్యా స్సంశయం హరయో గతాః ।
రామలక్ష్మణయోర్వాసశ్చ అరణ్యే సహ సీతయా ॥ 15 ॥
రాఘవస్య చ బాణేన వాలినశ్చ తథా వధః ।
రామకోపాదశేషాణాం రక్షసానాం తథా వధః ॥ 16 ॥
కైకేయ్యా వరదానేన ఇదం చ వికృతం కృతమ్ ।
తదసుఖమనుకీర్తితం వచో భువి పతితాంశ్చ సమీక్ష్య వానరాన్ ।
భృశచలితమతిర్మహామతిః కృపణముదాహృతవాన్ స గృధ్రరాట్ ॥ 17 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కింధాకాండే షట్పంచాశస్సర్గః ॥
