శ్రీమద్వాల్మీకీయ రామాయణే అయోధ్యాకాండమ్ ।
అథ నవతితమస్సర్గః ।
భరద్వాజాశ్రమం దృష్ట్వా క్రోశాదేవ నరర్షభః ।
బలం సర్వమవస్థాప్య జగామ సహ మంత్రిభిః ॥ 1 ॥
పద్భ్యామేవ హి ధర్మజ్ఞో న్యస్తశస్త్రపరిచ్ఛదః ।
వసానో వాససీ క్షౌమే పురోధాయ పురోధసమ్ ॥ 2 ॥
భరద్వాజాశ్రమం దృష్ట్వా క్రోశాదేవ నరర్షభః ।
బలం సర్వమవస్థాప్య జగామ సహ మంత్రిభిః ॥ 3 ॥
పద్భ్యామేవ హి ధర్మజ్ఞో న్యస్తశస్త్రపరిచ్ఛదః ।
వసానో వాససీ క్షౌమే పురోధాయ పురోధసమ్ ॥ 4 ॥
తత స్సందర్శనే తస్య భరద్వాజస్య రాఘవః ।
మంత్రిణస్తానవస్థాప్య జగామానుపురోహితమ్ ॥ 5 ॥
వసిష్ఠమథ దృష్ట్వైవ భరద్వాజో మహాతపాః ।
సంచచాఽలాసనాత్తూర్ణం శిష్యానర్ఘ్యమితి బ్రువన్ ॥ 6 ॥
సమాగమ్య వసిష్ఠేన భరతేనాభివాదితః ।
అబుద్ధ్యత మహాతేజాస్సుతం దశరథస్య తమ్ ॥ 7 ॥
తాభ్యామర్ఘ్యం చ పాద్యం చ దత్వా పశ్చాత్ఫలాని చ ।
ఆనుపూర్వ్యాచ్ఛ ధర్మజ్ఞః పప్రచ్ఛ కుశలం కులే ॥ 8 ॥
అయోధ్యాయాం బలే కోశే మిత్రేష్వపి చ మంత్రిషు ।
జానన్ దశరథం వృత్తం న రాజానముదాహరత్ ॥ 9 ॥
వసిష్ఠో భరతశ్చైనం పప్రచ్ఛతురనామయమ్ ।
శరీరేఽగ్నిషు వృక్షేషు శిష్యేషు మృగపక్షిషు ॥ 10 ॥
తథేతి తత్ప్రతిజ్ఞాయ భరద్వాజో మహాతపాః ।
భరతం ప్రత్యువాచేదం రాఘవస్నేహబంధనాత్ ॥ 11 ॥
కిమిహాఽగమనే కార్యం తవ రాజ్యం ప్రశాసతః ।
ఏతదాచక్ష్వ మే సర్వం న హి మే శుద్ధ్యతే మనః ॥ 12 ॥
సుషువే యమమిత్రఘ్నం కౌసల్యానఽందవర్ధనమ్ ।
భ్రాత్రా సహ సభార్యో యశ్చిరం ప్రవ్రాజితో వనమ్ ॥ 13 ॥
నియుక్తః స్త్రీనియుక్తేన పిత్రా యోఽసౌ మహాయశాః ।
వనవాసీ భవేతీహ సమాః కిల చతుర్దశ ॥ 14 ॥
కచ్ఛిన్న తస్యాపాపస్య పాపం కర్తుమిహేచ్ఛసి ।
అకంటకం భోక్తుమనా రాజ్యం తస్యానుజస్య చ ॥ 15 ॥
ఏవముక్తో భరద్వాజం భరతః ప్రత్యువాచ హ ।
పర్యశ్రునయనో దుఃఖాద్వాచా సంసజ్జమానయా ॥ 16 ॥
హతోఽస్మి యది మామేవం భగవానపి మన్యతే ।
మత్తో న దోషమాశంకే నైవం మామనుశాస్తు హి ॥ 17 ॥
న చైతదిష్టం మాతా మే యదవోచన్మదంతరే ।
నాహమేతేన తుష్టశ్చ న తద్వచనమాదదే ॥ 18 ॥
అహం తు తం నరవ్యాఘ్రముపయాతః ప్రసాదకః ।
ప్రతినేతుమయోధ్యాం చ పాదౌ తస్యాభివందితుమ్ ॥ 19 ॥
త్వం మామేవంగతం మత్వా ప్రసాదం కర్తుమర్హసి ।
శంస మే భగవన్రామః క్వ సంప్రతి మహీపతిః ॥ 20 ॥
వశిష్ఠాదిభిః ఋత్విగ్భిర్యాచితో భగవాంస్తతః ।
ఉవాచ తం భరద్వాజః ప్రసాదాద్భరతం వచః ॥ 21 ॥
త్వయ్యేతత్పురుషవ్యాఘ్ర యుక్తం రాఘవవంశజే ।
గురువృత్తిర్దమశ్చైవ సాధూనామనుయాయితా ॥ 22 ॥
జానే చైతన్మనస్థం తే దృఢీకరణమస్త్వితి ।
అపృచ్ఛం త్వాం తథాఽత్యర్థం కీర్తిం సమభివర్ధయన్ ॥ 23 ॥
జానే చ రామం ధర్మజ్ఞం ససీతం సహలక్ష్మణమ్ ।
అసౌ వసతి తే భ్రాతా చిత్రకూటే మహాగిరౌ ॥ 24 ॥
శ్వస్తు గంతాసి తం దేశం వసాద్య సహ మంత్రిభిః ।
ఏతన్మే కురు సుప్రాజ్ఞ కామం కామార్థకోవిద ॥ 25 ॥
తతస్తథేత్యేవముదారదర్శనః ప్రతీతరూపో భరతోఽబ్రవీద్వచః ।
చకార బుద్ధిం చ తదా తదాశ్రమే నిశానివాసాయ నరాధిపాఽత్మజః ॥ 26 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాండే నవతితమస్సర్గః ॥
