શ્રીમદ્વાલ્મીકીય રામાયણે બાલકાંડમ્ ।
અથ દ્વાદશસ્સર્ગઃ ।
તતઃ કાલે બહુતિથે કસ્મિંશ્ચિત્સુમનોહરે ।
વસંતે સમનુપ્રાપ્તે રાજ્ઞો યષ્ટું મનોઽભવત્ ॥ 1 ॥
તતઃ પ્રસાદ્ય શિરસા તં વિપ્રં દેવવર્ણિનમ્ ।
યજ્ઞાય વરયામાસ સંતાનાર્થં કુલસ્ય વૈ ॥ 2 ॥
તથેતિ ચ સ રાજાનમુવાચ ચ સુસત્કૃતઃ ।
સંભારા સંભ્રિયંતાં તે તુરગશ્ચ વિમુચ્યતામ્ ॥ 3 ॥
તતો રાજાઽબ્રવીદ્વાક્યં સુમંત્રં મંત્રિસત્તમમ્ ।
સુમંત્રાવાહય ક્ષિપ્રં ઋત્વિજો બ્રહ્મવાદિનઃ ॥ 4 ॥
સુયજ્ઞં વામદેવં ચ જાબાલિમથ કાશ્યપમ્ ।
પુરોહિતં વસિષ્ઠં ચ યે ચાન્યે દ્વિજસત્તમાઃ ॥ 5 ॥
તતસ્સુમંત્રસ્ત્વરિતં ગત્વા ત્વરિતવિક્રમઃ ।
સમાનયત્સ તાન્વિપ્રાન્ સમસ્તાન્વેદપારગાન્ ॥ 6 ॥
તાન્પૂજયિત્વા ધર્માત્મા રાજા દશરથસ્તદા ।
ધર્માર્થસહિતં યુક્તં શ્લક્ષ્ણં વચનમબ્રવીત્ ॥ 7 ॥
મમ લાલપ્યમાનસ્ય પુત્રાર્થં નાસ્તિ વૈ સુખમ્ ।
તદર્થં હયમેધેન યક્ષ્યામીતિ મતિર્મમ ॥ 8 ॥
તદહં યષ્ટુમિચ્છામિ શાસ્ત્રદૃષ્ટેન કર્મણા ।
ઋષિપુત્રપ્રભાવેન કામાન્પ્રાપ્સ્યામિ ચાપ્યહમ્ ॥ 9 ॥
તતસ્સાધ્વિતિ તદ્વાક્યં બ્રાહ્મણાઃ પ્રત્યપૂજયન્ ।
વસિષ્ઠપ્રમુખાસ્સર્વે પાર્થિવસ્ય મુખાચ્ચ્યુતમ્ ॥ 10 ॥
ઋષ્યશૃંગપુરોગાશ્ચ પ્રત્યૂચુર્નૃપતિં તદા ।
સંભારાસ્સંભ્રિયંતાં તે તુરગશ્ચ વિમુચ્યતામ્ ॥ 11 ॥
સર્વથા પ્રાપ્સ્યસે પુત્રાંશ્ચત્વારોઽમિતવિક્રમાન્ ।
યસ્ય તે ધાર્મિકી બુદ્ધિરિયં પુત્રાર્થમાગતા ॥ 12 ॥
તતઃ પ્રીતોઽભવદ્રાજા શ્રુત્વા તદ્વિજભાષિતમ્ ।
અમાત્યાંશ્ચાબ્રવીદ્રાજા હર્ષેણેદં શુભાક્ષરમ્ ॥ 13 ॥
ગુરૂણાં વચનાચ્છીઘ્રં સંભારાસ્સંભ્રિયંતુ મે ।
સમર્થાધિષ્ઠિતશ્ચાશ્વસ્સોપાધ્યાયો વિમુચ્યતામ્ ॥ 14 ॥
સરય્વાશ્ચોત્તરે તીરે યજ્ઞભૂમિર્વિધીયતામ્ ।
શાંતયશ્ચાભિવર્ધંતાં યથાકલ્પં યથાવિધિ ॥ 15 ॥
શક્યઃ પ્રાપ્તુમયં યજ્ઞસ્સર્વેણાપિ મહીક્ષિતા ।
નાપરાધો ભવેત્કષ્ટો યદ્યસ્મિન્ક્રતુસત્તમે ॥ 16 ॥
છિદ્રં હિ મૃગયંતેઽત્ર વિદ્વાંસો બ્રહ્મરાક્ષસાઃ ।
નિહતસ્ય ચ યજ્ઞસ્ય સદ્યઃ કર્તા વિનશ્યતિ ॥ 17 ॥
તદ્યથા વિધિપૂર્વં મે ક્રતુરેષ સમાપ્યતે ।
તથા વિધાનં ક્રિયતાં સમર્થાઃ કરણેષ્વિહ ॥ 18 ॥
તથેતિ ચ તતસ્સર્વે મંત્રિણઃ પ્રત્યપૂજયન્ ।
પાર્થિવેંદ્રસ્ય તદ્વાક્યં યથાજ્ઞપ્તમકુર્વત ॥ 19 ॥
તતો દ્વિજાસ્તે ધર્મજ્ઞમસ્તુવન્પાર્થિવર્ષભમ્ ।
અનુજ્ઞાતાસ્તતસ્સર્વે પુનર્જગ્મુર્યથાગતમ્ ॥ 20 ॥
ગતેષ્વથ દ્વિજાગ્ય્રેષુ મંત્રિણસ્તાન્નરાધિપઃ ।
વિસર્જયિત્વા સ્વં વેશ્મ પ્રવિવેશ મહાદ્યુતિઃ ॥ 21 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે દ્વાદશસ્સર્ગઃ ॥
