శ్రీమద్వాల్మీకీయ రామాయణే అరణ్యకాండమ్ ।
అథ సప్తమస్సర్గః ।
రామస్తు సహితో భ్రాత్రా సీతయా చ పరంతపః ।
సుతీక్ష్ణస్యాశ్రమపదం జగామ సహ తైర్ద్విజైః ॥ 1 ॥
స గత్వా దీర్ఘమధ్వానం నదీస్తీర్త్వా బహూదకాః ।
దదర్శ విమలం శైలం మహామేఘమివోన్నతమ్ ॥ 2 ॥
తత స్తదిక్ష్వాకువరౌ సంతతం వివిధైర్ద్రుమైః ।
కాననం తౌ వివిశతుస్సీతయా సహ రాఘవౌ ॥ 3 ॥
ప్రవిష్టస్తు వనం ఘోరం బహుపుష్పఫలద్రుమమ్ ।
దదర్శాశ్రమమేకాంతే చీరమాలాపరిష్కృతమ్ ॥ 4 ॥
తత్ర తాపసమాసీనం మలపంకజటాధరమ్ ।
రామస్సుతీక్ష్ణం విధివత్తపోవృద్ధమభాషత ॥ 5 ॥
రామోఽహమస్మి భగవన్భవంతం ద్రష్టుమాగతః ।
త్వం మాభివద ధర్మజ్ఞ మహర్షే సత్యవిక్రమ ॥ 6 ॥
స నిరీక్ష్య తతో ధీరో రామం ధర్మభృతాం వరమ్ ।
సమాశ్లిష్య చ బాహుభ్యామిదం వచనమబ్రవీత్ ॥ 7 ॥
స్వాగతం తే రఘుశ్రేష్ఠ రామ సత్యభృతాం వర ।
ఆశ్రమోఽయం త్వయాక్రాంతస్సనాథ ఇవ సాంప్రతమ్ ॥ 8 ॥
ప్రతీక్షమాణస్త్వామేవ నారోహేఽహం మహాయశః ।
దేవలోకమితో వీర దేహం త్యక్త్వా మహీతలే ।
చిత్రకూటముపాదాయ రాజ్యభ్రష్టోఽసి మే శ్రుతః ॥ 9 ॥
ఇహోపయాతః కాకుత్థ్స దేవరాజశ్శతక్రతుః ॥ 10 ॥
ఉపాగమ్య చ మే దేవో మహాదేవస్సురేశ్వరః ।
సర్వాన్ లోకాంజితానాహ మమ పుణ్యేన కర్మణా ॥ 11 ॥
తేషు దేవర్షిజుష్టేషు జితేషు తపసా మయా ।
మత్ప్రసాదాత్సభార్యస్త్వం విహరస్వ సలక్ష్మణః ॥ 12 ॥
తముగ్రతపసాయుక్తం మహర్షిం సత్యవాదినమ్ ।
ప్రత్యువాచాత్మవాన్రామో బ్రహ్మాణమివ కాశ్యపః ॥ 13 ॥
అహమేవాహరిష్యామి సర్వాన్ లోకాన్మహామునే ।
ఆవాసం త్వహమిచ్ఛామి ప్రదిష్టమిహ కాననే ॥ 14 ॥
భవాన్సర్వత్ర కుశలస్సర్వభూతహితే రతః ।
ఆఖ్యాతశ్శరభంగేణ గౌతమేన మహాత్మనా ॥ 15 ॥
ఏవముక్తస్తు రామేణ మహర్షిర్లోకవిశ్రుతః ।
అబ్రవీన్మధురం వాక్యం హర్షేణ మహతాఽప్లుతః ॥ 16 ॥
అయమేవాశ్రమో రామ గుణవాన్రమ్యతామిహ ।
ఋషిసంఘానుచరితస్సదా మూలఫలైర్యుతః ॥ 17 ॥
ఇమమాశ్రమమాగమ్య మృగసంఘా మహాయశః ।
అహత్వా ప్రతిగచ్ఛంతి లోభయిత్వాఽకుతోభయాః ॥ 18 ॥
నాన్యద్ధోషం భవేదత్ర మృగేభ్యోఽన్యత్ర విద్ధి వై ।
తచ్ఛృత్వా వచనం తస్య మహర్షేర్లక్ష్మణాగ్రజః ॥ 19 ॥
ఉవాచ వచనం ధీరో వికృష్య సశరం ధనుః ।
తానహం సుమహాభాగ మృగసంఘాన్సమాగతాన్ ॥ 20 ॥
హన్యాం నిశితధారేణ శరేణాశనివర్చసా ।
భవాంస్తత్రాభిషజ్యేత కింస్యాత్కృచ్ఛ్రతరం తతః ॥ 21 ॥
ఏతస్మిన్నాశ్రమే వాసం చిరం తు న సమర్థయే ।
తమేవముక్త్వోపరమం రామస్సంధ్యాముపాగమత్ ॥ 22 ॥
అన్వాస్య పశ్చిమాం స్నధ్యాం తత్ర వాసమకల్పయత్ ।
సుతీక్ష్ణస్యాఽశ్రమే రమ్యే సీతయా లక్ష్మణేన చ ॥ 23 ॥
తమేవముక్త్వోపరమం రామస్సంధ్యాముపాగమత్ ॥ 24 ॥
అన్వాస్య పశ్చిమాం సంంధ్యాం తత్ర వాసమకల్పయత్ ।
సుతీక్ష్ణస్యాశ్రమే రమ్యే సీతయా లక్ష్మణేన చ ॥ 25 ॥
తతశ్శుభం తాపసభోజ్యమన్నం స్వయం సుతీక్ష్ణః పురుషర్షభాభ్యామ్ ।
తాభ్యాం సుసత్కృత్య దదౌ మహాత్మా సంధ్యానివృత్తౌ రజనీం మవేక్ష్య ॥ 26 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అరణ్యకాండే సప్తమస్సర్గః ॥
