శ్రీమద్వాల్మీకీయ రామాయణే సుందరకాండమ్ ।
అథ అష్టషష్టితమస్సర్గః ।
అథాహముత్తరం దేవ్యా పునరుక్త స్ససంభ్రమమ్ ।
తవ స్నేహాన్నరవ్యాఘ్ర సౌహార్దాదనుమాన్య వై ॥ 1 ॥
ఏవం బహువిధం వాచ్యో రామో దాశరథిస్త్వయా ।
యథా మామాప్నుయాచ్ఛీఘ్రం హత్వా రావణమాహవే ॥ 2 ॥
యది వా మన్యసే వీర వసైకాహమరిందమ ।
కస్మింశ్చిత్సంవృతే దేశే విక్రాంతశ్శ్వో గమిష్యసి ॥ 3 ॥
మమ చాప్యల్పభాగ్యాయాస్సాన్నిధ్యాత్తవ వీర్యవన్ ।
అస్య శోకవిపాకస్య ముహూర్తం స్యాద్విమోక్షణమ్ ॥ 4 ॥
గతే హి త్వయి విక్రాంతే పునరాగమనాయ వై ।
ప్రాణానామపి సందేహో మమ స్యాన్నాత్ర సంశయః ॥ 5 ॥
తవాదర్శనజశ్శోకో భూయో మాం పరితాపయేత్ ।
దుఃఖాద్దుఃఖపరాభూతాం దుర్గతాం దుఃఖభాగినీమ్ ॥ 6 ॥
అయం చ వీర సందేహస్తిష్ఠతీవ మమాగ్రతః ।
సుమహాంస్త్వత్సహాయేషు హర్యృక్షేషు హరీశ్వర ॥ 7 ॥
కథం ను ఖలు దుష్పారం తరిష్యంతి మహోదధిమ్ ।
తాని హర్యృక్షసైన్యాని తౌ వా నరవరాత్మజౌ ॥ 8 ॥
త్రయాణామేవ భూతానాం సాగరస్యాస్య లంఘనే ।
శక్తిస్స్యాద్వైనతేయస్య తవ వా మారుతస్య వా ॥ 9 ॥
తదస్మిన్ కార్యనిర్యోగే వీరైవం దురతిక్రమే ।
కిం పశ్యసి సమాధానం బ్రూహి కార్యవిదాం వరః ॥ 10 ॥
కామమస్య త్వమేవైకః కార్యస్య పరిసాధనే ।
పర్యాప్తః పరవీరఘ్న యశస్యస్తే బలోదయః ॥ 11 ॥
బలై స్సమగ్రైర్యది మాం హత్వా రావణమాహవే ।
విజయీ స్వాం పురీం రామో నయేత్తత్స్యాద్యశస్కరమ్ ॥ 12 ॥
యథాఽహం తస్య వీరస్య వనాదుపధినా హృతా ।
రక్షసా తద్భయాదేవ తథా నార్హతి రాఘవః ॥ 13 ॥
బలైస్తు సంకులాం కృత్వా లంకాం పరబలార్దనః ।
మాం నయేద్యది కాకుత్స్థస్తత్తస్య సదృశం భవేత్ ॥ 14 ॥
తద్యథా తస్య విక్రాంతమనురూపం మహాత్మనః ।
భవేదాహవశూరస్య తథా త్వముపపాదయ ॥ 15 ॥
తదర్థోపహితం వాక్యం ప్రశ్రితం హేతుసంహితమ్ ।
నిశమ్యాహం తత శ్శేషం వాక్యముత్తరమబ్రువమ్ ॥ 16 ॥
దేవి హర్యృక్షసైన్యానామీశ్వరః ప్లవతాం వరః ।
సుగ్రీవస్సత్త్వసంపన్నస్తవార్థే కృతనిశ్చయః ॥ 17 ॥
తస్య విక్రమసంపన్నాస్సత్త్వవంతో మహాబలాః ।
మన స్సంకల్పసంపాతా నిదేశే హరయః స్థితాః ॥ 18 ॥
యేషాం నోపరి నాధస్తాన్న తిర్యక్సజ్జతే గతిః ।
న చ కర్మసు సీదంతి మహత్స్వమితతేజసః ॥ 19 ॥
అసకృత్తైర్మహాభాగైర్వానరైర్బలదర్పితైః ।
ప్రదక్షిణీకృతా భూమిర్వాయుమార్గానుసారిభిః ॥ 20 ॥
మద్విశిష్టాశ్చ తుల్యాశ్చ సంతి తత్ర వనౌకసః ।
మత్తః ప్రత్యవరః కశ్చిన్నాస్తి సుగ్రీవసన్నిధౌ ॥ 21 ॥
అహం తావదిహ ప్రాప్తః కిం పునస్తే మహాబలాః ।
న హి ప్రకృష్టాః ప్రేత్యంతే ప్రేష్యంతే హీతరే జనాః ॥ 22 ॥
తదలం పరితాపేన దేవి మన్యుర్వ్యపైతు తే ।
ఏకోత్పాతేన తే లంకామేష్యంతి హరియూథపాః ॥ 23 ॥
మమ పృష్ఠగతౌ తౌ చ చంద్రసూర్యావివోదితౌ ।
త్వత్సకాశం మహాభాగే నృసింహావాగమిష్యతః ॥ 24 ॥
అరిఘ్నం సింహసంకాశం క్షిప్రం ద్రక్ష్యసి రాఘవమ్ ।
లక్ష్మణం చ ధనుష్పాణిం లంకాద్వారముపస్థితమ్ ॥ 25 ॥
నఖదంష్ట్రాయుధాన్ వీరాన్ సింహశార్దూలవిక్రమాన్ ।
వానరాన్వారణోంద్రాభాన్ క్షిప్రం ద్రక్షసి సంగతాన్ ॥ 26 ॥
శైలాంబుదనికాశానాం లంకామలయసానుషు ।
నర్దతాం కపిముఖ్యానామచిరాచ్ఛ్రోష్యసి స్వనమ్ ॥ 27 ॥
నివృత్తవనవాసం చ త్వయా సార్ధమరిందమమ్ ।
అభిషిక్తమయోధ్యాయాం క్షిప్రం ద్రక్ష్యసి రాఘవమ్ ॥ 28 ॥
తతో మయా వాగ్భిరదీనభాషిణా శివాభిరిష్టాభిరభిప్రసాదితా ।
జగామ శాంతిం మమ మైథిలాత్మజా తవాపి శోకేన తదాభిపీడితా ॥ 29 ॥
ఇత్యార్షే శ్రీమద్రామాయణే వాల్మీకీయ ఆదికావ్యే సుందరకాండే అష్టషష్టితమస్సర్గః ॥
