శ్రీమద్వాల్మీకీయ రామాయణే బాలకాండమ్ ।
అథ త్రింశస్సర్గః ।
అథ తౌ దేశకాలజ్ఞౌ రాజాపుత్రావరిందమౌ ।
దేశే కాలే చ వాక్యజ్ఞావబ్రూతాం కౌశికం వచః ॥ 1 ॥
భగవన్ శ్రోతుమిచ్ఛావో యస్మిన్ కాలే నిశాచరౌ ।
సంరక్షణీయౌ తౌ బ్రహ్మన్నాతివర్తేత తత్క్షణమ్ ॥ 2 ॥
ఏవం బ్రువాణౌ కాకుత్స్థౌ త్వరమాణౌ యుయుత్సయా ।
సర్వే తే మునయః ప్రీతాః ప్రశశంసుర్నృపాత్మజౌ ॥ 3 ॥
అద్యప్రభృతి షడ్రాత్రం రక్షతం రాఘవౌ యువామ్ ।
దీక్షాం గతో హ్యేష మునిర్మౌనిత్వం చ గమిష్యతి ॥ 4 ॥
తౌ తు తద్వచనం శ్రుత్వా రాజపుత్రౌ యశస్వినౌ ।
అనిద్రౌ షడహోరాత్రం తపోవనమరక్షతామ్ ॥ 5 ॥
ఉపాసాంచక్రతుర్వీరౌ యత్తౌ పరమధన్వినౌ ।
రరక్షతుర్మునివరం విశ్వామిత్రమరిందమౌ ॥ 6 ॥
అథ కాలే గతే తస్మిన్ షష్ఠేఽహని సమాగతే ।
సౌమిత్రిమబ్రవీద్రామో యత్తో భవ సమాహితః ॥ 7 ॥
రామస్యైవం బ్రువాణస్య త్వరితస్య యుయుత్సయా ।
ప్రజజ్వాల తతో వేదిస్సోపాధ్యాయపురోహితా ॥ 8 ॥
సదర్భచమసస్రుక్కా ససమిత్కుసుమోచ్చయా ।
విశ్వామిత్రేణ సహితా వేదిర్జజ్వాల సర్త్విజా ॥ 9 ॥
మంత్రవచ్చ యథాన్యాయం యజ్ఞోఽసౌ సంప్రవర్తతే ।
ఆకాశే చ మహాన్ శబ్దః ప్రాదురాసీద్భయానకః ॥ 10 ॥
ఆవార్య గగనం మేఘో యథా ప్రావృషి నిర్గతః ।
తథామాయాం వికుర్వాణౌ రాక్షసావభ్యధావతామ్ ॥ 11 ॥
మారీచశ్చ సుబాహుశ్చ తయోరనుచరాశ్చ యే ।
ఆగమ్య భీమసంకాశా రుధిరౌఘమవాసృజన్ ॥ 12 ॥
సా తేన రుధిరౌఘేణ వేదిర్జజ్వాల మండితా ।
సహసాఽభిద్రుతో రామస్తానపశ్య త్తతో దివి ॥ 13 ॥
తావాపతంతౌ సహసా దృష్ట్వా రాజీవలోచనః ।
లక్ష్మణం త్వభిసంప్రేక్ష్య రామో వచనమబ్రవీత్ ॥ 14 ॥
పశ్య లక్ష్మణ దుర్వృత్తాన్ రాక్షసాన్ పిశితాశనాన్ ।
మానవాస్త్రసమాధూతాననిలేన యథా ఘనాన్ ॥ 15 ॥
మానవం పరమోదారమస్త్రం పరమభాస్వరమ్ ।
చిక్షేప పరమక్రుద్ధో మారీచోరసి రాఘవః ॥ 16 ॥
స తేన పరమాస్త్రేణ మానవేన సమాహితః ।
సంపూర్ణం యోజనశతం క్షిప్తస్సాగరసంప్లవే ॥ 17 ॥
విచేతనం విఘూర్ణంతం శీతేషు బలతాడితమ్ ।
నిరస్తం దృశ్య మారీచం రామో లక్ష్మణమబ్రవీత్ ॥ 18 ॥
పశ్య లక్ష్మణ శీతేషుం మానవం ధర్మసంహితమ్ ।
మోహయిత్వా నయత్యేనం న చ ప్రాణైర్వ్యయుజ్యత ॥ 19 ॥
ఇమానపి వధిష్యామి నిర్ఘృణాన్ దుష్టచారిణః ।
రాక్షసాన్ పాపకర్మస్థాన్ యజ్ఞఘ్నాన్ రుధిరాశనాన్ ॥ 20 ॥
సంగృహ్యాస్త్రం తతో రామో దివ్యమాగ్నేయమద్భుతమ్ ।
సుబాహూరసి చిక్షేప సవిద్ధః ప్రాపతద్భువి ॥ 21 ॥
శేషాన్ వాయవ్యమాదాయ నిజఘాన మహాయశాః ।
రాఘవః పరమోదారో మునీనాం ముదమావహన్ ॥ 22 ॥
స హత్వా రాక్షసాన్ సర్వాన్ యజ్ఞఘ్నాన్ రఘునందనః ।
ఋషిభిః పూజితస్తత్ర యథేంద్రో విజయే పురా ॥ 23 ॥
అథ యజ్ఞే సమాప్తే తు విశ్వామిత్రో మహామునిః ।
నిరీతికా దిశో దృష్టవా కాకుత్స్థమిదమబ్రవీత్ ॥ 24 ॥
కృతార్థోఽస్మి మహాబాహో కృతం గురువచస్త్వయా ।
సిద్ధాశ్రమమిదం సత్యం కృతం రామ మహాయశః ॥ 25 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే త్రింశస్సర్గః ॥
