శ్రీమద్వాల్మీకీయ రామాయణే కిష్కింధాకాండమ్ ।
అథ షష్ఠస్సర్గః ।
పునరేవాబ్రవీత్ప్రీతో రాఘవం రఘునందనమ్ ।
అయమాఖ్యాతి మే రామ సచివో మంత్రిసత్తమః ॥ 1 ॥
హనుమాన్యన్నిమిత్తం త్వం నిర్జనం వనమాగతః ।
లక్ష్మణేన సహ భ్రాత్రా వసతశ్చ వనే తవ ॥ 2 ॥
రక్షసాఽపహృతా భార్యా మైథిలీ జనకాత్మజా ।
త్వయా వియుక్తా రుదతీ లక్ష్మణేన చ ధీమతా ॥ 3 ॥
అంతరప్రేప్సునా తేన హత్వా గృధ్రం జటాయుషమ్ ॥ 4 ॥
భార్యావియోగజం దుఃఖం న చిరాత్త్వం విమోక్ష్యసే ।
అహం తామానయిష్యామి నష్టాం వేదశ్రుతీమివ ॥ 5 ॥
రసాతలే వా వర్తంతీం వర్తంతీ వా నభస్థలే అహమానీయ దాస్యామి తవ భార్యామరిందమ ॥ 6 ॥
ఇదం తథ్యం మమ వచస్త్వమవేహి చ రాఘవ ।
న శక్యా సా జరయితుం సేంద్రైరపి స్సురాసురైః ॥ 7 ॥
తవ భార్యా మహాబాహో భక్ష్యం విషకృతం యథా ।
త్యజ శోకం మహాబాహో తాం కాంతామానయామి తే ॥ 8 ॥
అనుమానాత్తు జానామి మైథిలీ సా న సంశయః ।
హ్రియమాణా మయా దృష్టా రక్షసా క్రూరకర్మణా ॥ 9 ॥
క్రోశంతీ రామ రామేతి లక్ష్మణేతి చ విస్వరమ్ ।
స్ఫురంతీ రావణస్యాంకే పన్నగేంద్రవధూర్యథా ॥ 10 ॥
ఆత్మనా పంచమం మాం హి దృష్ట్వా శైలతటే స్థితమ్ ।
ఉత్తరీయం తయా త్యక్తం శుభాన్యాభరణాని చ ॥ 11 ॥
తాన్యస్మాభిగృహీతాని నిహితాని చ రాఘవ ।
ఆనయిష్యామ్యహం తాని ప్రత్యభిజ్ఞాతుమర్హసి ॥ 12 ॥
తమబ్రవీత్తతో రామస్సుగ్రీవం ప్రియవాదినమ్ ।
ఆనయస్వ సఖే శీఘ్రం కిమర్థం ప్రవిలంబసే ॥ 13 ॥
ఏవముక్తస్తు సుగ్రీవశ్శైలస్య గహనాం గుహామ్ ।
ప్రవివేశ తతశశీఘ్రం రాఘవప్రియకామ్యయా ॥ 14 ॥
ఉత్తరీయం గృహీత్వా తు శుభాన్యాభరణాని చ ।
ఇదం పశ్యేతి రామాయ దర్శయామాస వానరః ॥ 15 ॥
తతో గృహీత్వా వాసస్తు శ్శుభాన్యాభరణాని చ ।
అభవద్బాష్పసంరుద్ధో నీహారేణేవ చంద్రమాః ॥ 16 ॥
సీతాస్నేహప్రవృత్తేన స తు బాష్పేణ దూషితః ।
హా ప్రియేతి రుదంధైర్యముత్సృజ్య న్యపతత్క్షితౌ ॥ 17 ॥
హృది కృత్వా తు బహుశస్తమలంకారముత్తమమ్ ।
నిశశ్వాస భృశం సర్పో బిలస్థ ఇవ రోషితః ॥ 18 ॥
అవిచ్ఛిన్నాశ్రువేగస్తు సౌమిత్రిం వీక్ష్య పార్శ్వతః ।
పరిదేవయితుం దీనం రామస్సముపచక్రమే ॥ 19 ॥
పశ్య లక్ష్మణ వైదేహ్యా సంత్యక్తం హ్రియమాణయా ।
ఉత్తరీయమిదం భూమౌ శరీరాద్భూషణాని చ ॥ 20 ॥
శాద్వలిన్యాం ధ్రువం భూమౌ సీతయా హ్రియమాణయా ।
ఉత్సృష్టం భూషణమిదం తథారూపం హి దృశ్యతే ॥ 21 ॥
ఏవముక్తస్తు రామేణ లక్ష్మణో వాక్యమబ్రవీత్ ।
నాహం జానామి కేయూరే నాహం జానామి కుండలే ॥ 22 ॥
నూపురే త్వభిజానామి నిత్యం పాదాభివందనాత్ ।
తతస్తు రాఘవో వాక్యం సుగ్రీవమిదమబ్రవీత్ ॥ 23 ॥
బ్రూహి సుగ్రీవ కం దేశం హ్రియంతీ లక్షితా త్వయా ।
రక్షసా రౌద్రరూపేణ మమ ప్రాణైః ప్రియా ప్రియా ॥ 24 ॥
క్వ వా వసతి తద్రక్షో మహద్వ్యసనదం మమ ।
యన్నిమిత్తమహం సర్వాన్నాశయిష్యామి రాక్షసాన్ ॥ 25 ॥
హరతా మైథిలీం యేన మాం చ రోషయతా భృశమ్ ।
ఆత్మనో జీవితాంతాయ మృత్యుద్వారమపావృతమ్ ॥ 26 ॥
మమ దయితతరా హృతా వనాంతా ద్రజనిచరేణ విమథ్య యేన సా ।
కథయ మమ రిపుం తమద్య వై ప్లవగపతే యమసాదనం నయామి ॥ 27 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కింధాకాండే షష్ఠస్సర్గః ॥
