శ్రీమద్వాల్మీకీయ రామాయణే అరణ్యకాండమ్ ।
అథ దశమస్సర్గః ।
వాక్యమేతత్తు వైదేహ్యా వ్యాహృతం భర్తృభక్తయా ।
శ్రుత్వా ధర్మే స్థితో రామః ప్రత్యువాచాథ మైథిలీమ్ ॥ 1 ॥
హితముక్తం త్వయా దేవి స్నిగ్ధయా సదృశం వచః ।
కులం వ్యపదిశంత్యా చ ధర్మజ్ఞే జనకాత్మజే ॥ 2 ॥
కింతు వక్ష్యామ్యహం దేవి త్వయైవోక్తమిదం వచః ।
క్షత్రియైర్ధార్యతే చాపో నార్తశబ్దో భవేదితి ॥ 3 ॥
తే చార్తా దండకారణ్యే మునయస్సంశితవ్రతాః ।
మాం సీతే స్వయమాగమ్య శరణ్యాశ్శరణం గతాః ॥ 4 ॥
వసంతో ధర్మనిరతా వనే మూలఫలాశనాః ।
న లభంతే సుఖం భీతా రాక్షసైః క్రూరకర్మభిః ॥ 5 ॥
కాలే కాలే చ నిరతా నియమైర్వివిధైర్వనే ।
భక్ష్యంతే రాక్షసైర్భీమైర్నరమాంసోపజీవిభిః ॥ 6 ॥
తే భక్ష్యమాణా మునయో దండకారణ్యవాసినః ।
అస్మానభ్యవపద్యేతి మామూచుర్ద్విజసత్తమా ॥ 7 ॥
మయా తు వచనం శ్రుత్వా తేషామేవం ముఖాచ్చ్యుతమ్ ।
కృత్వా చరణశుశ్రూషాం వాక్యమేతదుదాహృతమ్ ॥ 8 ॥
ప్రసీదంతు భవంతో మే హ్రీరేషా హి మమాతులా ।
యదీదృశైరహం విప్రైరుపస్థేయైరుపస్థితః ॥ 9 ॥
కిం కరోమీతి చ మయా వ్యాహృతం ద్విజసన్నిధౌ ।
సర్వైరేతైస్సమాగమ్య వాగియం సముదాహృతా ॥ 10 ॥
రాక్షసైర్దండకారణ్యే బహుభిః కామరూపిభిః ।
అర్దితాస్స్మ దృఢం రామ భవాన్నస్తత్ర రక్షతు ॥ 11 ॥
హోమకాలేషు సంప్రాప్తాః పర్వకాలేషు చానఘ ।
ధర్షయంతి సుదుర్ధర్షా రాక్షసాః పిశితాశనాః ॥ 12 ॥
రాక్షసైర్ధర్షితానాం చ తాపసానాం తపస్వినామ్ ।
గతిం మృగయమాణానాం భవాన్నః పరమా గతిః ॥ 13 ॥
కామం తపఃప్రభావేన శక్తా హంతుం నిశాచరాన్ ।
చిరార్జితం తు నేచ్ఛామస్తపః ఖండయితుం వయమ్ ॥ 14 ॥
బహువిఘ్నం తపో నిత్యం దుశ్చరం చైవ రాఘవ ।
తేన శాపం న ముంచామో భక్ష్యమాణాశ్చ రాక్షసైః ॥ 15 ॥
తదర్ధ్యమానాన్రక్షోభిర్దండకారణ్యవాసిభిః ।
రక్ష నస్త్వం సహ భ్రాత్రా త్వన్నాథా హి వయం వనే ॥ 16 ॥
మయా చైతద్వచశ్శ్రుత్వా కార్త్స్న్యేన పరిపాలనమ్ ।
ఋషీణాం దండకారణ్యే సంశ్రుతం జనకాత్మజే ॥ 17 ॥
సంశ్రుత్య చ న శక్ష్యామి జీవమానః ప్రతిశ్రవమ్ ।
మునీనామన్యథా కర్తుం సత్యమిష్టం హి మే సదా ॥ 18 ॥
అప్యహం జీవితం జహ్యాం త్వాం వా సీతే సలక్ష్మణామ్ ।
న తు ప్రతిజ్ఞాం సంశ్రుత్య బ్రాహ్మణేభ్యో విశేషతః ॥ 19 ॥
తదవశ్యం మయా కార్యమృషీణాం పరిపాలనమ్ ।
అనుక్తేనాపి వైదేహి ప్రతిజ్ఞాయ తు కిం పునః ॥ 20 ॥
మమ స్నేహాచ్చ సౌహార్దాదిదముక్తంత్వయాఽనఘే ।
పరితుష్టోఽస్మ్యహం సీతే న హ్యనిష్టోఽనుశిష్యతే ॥ 21 ॥
సదృశం చానురూపం చ కులస్య తవ చాత్మనః ।
సధర్మచారిణీ మే త్వం ప్రాణేభ్యోఽపి గరీయసీ ॥ 22 ॥
ఇత్యేవముక్త్వా వచనం మహాత్మా సీతాం ప్రియాం మైథిలరాజపుత్రీమ్ ।
రామో ధనుష్మాన్సహ లక్ష్మణేన జగామ రమ్యాణి తపోవనాని ॥ 23 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అరణ్యకాండే దశమస్సర్గః ॥
