శ్రీమద్వాల్మీకీయ రామాయణే అయోధ్యాకాండమ్ ।
అథ ఏకోననవతితమస్సర్గః ।
ఉష్య రాత్రిం తు తత్రైవ గంగాకూలే స రాఘవః ।
భరతః కాల్యముత్థాయ శత్రుఘ్నమిదమబ్రవీత్ ॥ 1 ॥
శత్రుఘ్నోత్తిష్ఠ కిం శేషే నిషాదాధిపతిం గుహమ్ ।
శీఘ్రమానయ భద్రం తే తారయిష్యతి వాహినీమ్ ॥ 2 ॥
జాగర్మి నాహం స్వపిమి తమేవాఽర్యం విచింతయన్ ।
ఇత్యేవమబ్రవీద్భ్రాత్తా శత్రుఘ్నోఽపి ప్రచోదితః ॥ 3 ॥
ఇతి సంవదతోరేవమన్యోన్యం నరసింహయోః ।
ఆగమ్య ప్రాంజలిః కాలే గుహో భరతమబ్రవీత్ ॥ 4 ॥
కచ్చిత్సుఖం నదీతీరేఽవాత్సీః కాకుత్స్థ శర్వరీమ్ ।
కచ్చిత్తే సహ సైన్యస్య తావత్సర్వమనామయమ్ ॥ 5 ॥
గుహస్య వచనం శ్రుత్వా తత్తు స్నేహాదుదీరితమ్ ।
రామస్యానువశో వాక్యం భరతోఽపీదమబ్రవీత్ ॥ 6 ॥
సుఖా న శ్శర్వరీ రాజన్ పూజితాశ్చాపి తే వయమ్ ।
గంగాం తు నౌభిర్బహ్వీభిర్దాశాస్సంతారయంతు నః ॥ 7 ॥
తతో గుహ స్సంత్వరితం శ్రుత్వా భరతశాసనమ్ ।
ప్రతి ప్రవిశ్య నగరం తం జ్ఞాతిజనమబ్రవీత్ ॥ 8 ॥
ఉత్తిష్ఠత ప్రబుధ్యధ్వం భద్రమస్తు చ వస్సదా ।
నావ స్సమనుకర్షధ్వం తారయిష్యామ వాహినీమ్ ॥ 9 ॥
తే తథోక్తా స్సముత్థాయ త్వరితా రాజశాసనాత్ ।
పంచనావాం శతాన్యాశు సమానిన్యుస్సమంతతః ॥ 10 ॥
అన్యా స్స్వస్తికవిజ్ఞేయా మహాఘంటాధరా వరాః ।
శోభమానాః పతాకాభిర్యుక్తవాతాస్సుసంహతాః ॥ 11 ॥
తత స్స్వస్తికవిజ్ఞేయాం పాండుకంబలసంవృతామ్ ।
సనందిఘోషాం కల్యాణీం గుహో నావముపాహరత్ ॥ 12 ॥
తామారురోహ భరతశ్శత్రుఘ్నశ్చ మహాబలః ।
కౌసల్యా చ సుమిత్రా చ యాశ్చాన్యా రాజయోషితః ॥ 13 ॥
పురోహితశ్చ తత్పూర్వం గురవో బ్రాహ్మణాశ్చ యే ।
అనంతరం రాజదారాస్తదైవ శకటాపణాః ॥ 14 ॥
ఆవాసమాదీపయతాం తీర్థం చాప్యవగాహతామ్ ।
భాండాని చాదదానానాం ఘోషస్త్రిదివమస్పృశత్ ॥ 15 ॥
పతాకిన్యస్తు తా నావస్స్వయం దాశైరధిష్ఠితాః ।
వహంత్యో జనమారూఢం తదా సంపేతురాశుగాః ॥ 16 ॥
నారీణామభిపూర్ణా స్తు కాశ్చిత్ కాశ్చిచ్చ వాజినామ్ ।
కాశ్చిదత్ర వహంతి స్మ యానయుగ్యం మహాధనమ్ ॥ 17 ॥
తా స్స్మ గత్వా పరం తీరమవరోప్య చ తం జనమ్ ।
నివృత్తాః కాండచిత్రాణి క్రియంతే దాశబంధుభిః ॥ 18 ॥
సవైజయంతాస్తు గజా గజారోహప్రచోదితాః ।
తరంత స్స్మ ప్రకాశంతే సధ్వజా ఇవ పర్వతాః ॥ 19 ॥
నావస్త్వారురుహుశ్చాన్యే ప్లవైస్తేరు స్తథాపరే ।
అన్యే కుంభఘటైస్తేరురన్యేతేరుశ్చ బాహుభిః ॥ 20 ॥
సా పుణ్యా ధ్వజినీ గంగాం దాశైస్సంతారితా స్వయమ్ ।
మైత్రే ముహూర్తే ప్రయయౌ ప్రయాగవనముత్తమమ్ ॥ 21 ॥
ఆశ్వాసయిత్వా చ చమూం మహాత్మా నివేశయిత్వా చ యథోపజోషమ్ ।
ద్రష్టుం భరద్వాజమృషిప్రవర్య మృత్విగ్వృతస్సన్భరతః ప్రతస్థే ॥ 22 ॥
స బ్రాహ్మణస్యాఽశ్రమమభ్యుపేత్య మహాత్మనో దేవపురోహితస్య ।
దదర్శ రమ్యోటజవృక్షషండం మహద్వనం విప్రవరస్య రమ్యమ్ ॥ 23 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాండే ఏకోననవతితమస్సర్గః ॥
