শ্রীমদ্বাল্মীকীয় রামাযণে বালকাংডম্ ।
অথ পংচদশস্সর্গঃ ।
মেথাবী তু ততো ধ্য়াত্বা স কিংচিদিদমুত্তরম্ ।
লব্ধসংজ্ঞস্ততস্তং তু বেদজ্ঞো নৃপমব্রবীত্ ॥ 1 ॥
ইষ্টিং তেঽহং করিষ্য়ামি পুত্রীয়াং পুত্রকারণাত্ ।
অথর্বশিরসি প্রোক্তৈর্মংত্রৈস্সিদ্ধাং বিধানতঃ ॥ 2 ॥
ততঃ প্রাক্রমদিষ্টিং তাং পুত্রীয়াং পুত্রকারণাত্ ।
জুহাব চাগ্নৌ তেজস্বী মংত্রদৃষ্টেন কর্মণা ॥ 3 ॥
ততো দেবাস্সগংধর্বাস্সিদ্ধাশ্চ পরমর্ষয়ঃ ।
ভাগপ্রতিগ্রহার্থং বৈ সমবেতা যথাবিধি ॥ 4 ॥
তাস্সমেত্য় যথান্য়ায়ং তস্মিন্সদসি দেবতাঃ ।
অব্রুবন্ লোককর্তারং ব্রহ্মাণং বচনং মহত্ ॥ 5 ॥
ভগবংত্বত্প্রসাদেন রাবণো নাম রাক্ষসঃ ।
সর্বান্নো বাধতে বীর্য়াচ্ছাসিতুং তং ন শক্নুমঃ ॥ 6 ॥
ত্বয়া তস্মৈ বরো দত্তঃ প্রীতেন ভগবন্পুরা ।
মানয়ংতশ্চ তং নিত্য়ং সর্বং তস্য় ক্ষমামহে ॥ 7 ॥
উদ্বেজযতি লোকান্স্তীনুচ্ছ্রিতাংদ্বেষ্টি দুর্মতিঃ ।
শক্রং ত্রিদশরাজানং প্রধর্ষয়িতুমিচ্ছতি ॥ 8 ॥
ঋষীন্যক্ষান্সগংধর্বানসুরান্ব্রাহ্মণাংস্তথা ।
অতিক্রামতি দুর্ধর্ষো বরদানেন মোহিতঃ ॥ 9 ॥
নৈনং সূর্য়ঃ প্রতপতি পার্শ্বে বাতি ন মারুতঃ ।
চলোর্মিমালী তং দৃষ্ট্বা সমুদ্রোঽপি ন কংপতে ॥ 10 ॥
তন্মহন্নো ভয়ং তস্মাদ্রাক্ষসাদ্ঘোরদর্শনাত্ ।
বধার্থং তস্য় ভগবন্নুপায়ং কর্তুমর্হসি ॥ 11 ॥
এবমুক্তস্সুরৈস্সর্বৈশ্চিংতয়িত্বা ততোঽব্রবীত্ ।
হংতায়ং বিদিতস্তস্য় বধোপায়ো দুরাত্মনঃ ॥ 12 ॥
তেন গংধর্বযক্ষাণাং দেবদানবরক্ষসাম্ ।
অবধ্য়োঽস্মীতি বাগুক্তা তথেত্য়ুক্তং চ তন্ময়া ॥ 13 ॥
নাকীর্তযদবজ্ঞানাত্তদ্রক্ষো মানুষান্ প্রতি ।
তস্মাত্স মানুষাদ্বধ্য়ো মৃত্য়ুর্নান্য়োঽস্য় বিদ্যতে ॥ 14 ॥
এতচ্ছ্রুত্বা প্রিয়ং বাক্য়ং ব্রহ্মণা সমুদাহৃতম্ ।
সর্বে মহর্ষয়ো দেবাঃ প্রহৃষ্টাস্তেঽভবংস্তদা ॥ 15 ॥
এতস্মিন্নংতরে বিষ্ণুরুপয়াতো মহাদ্য়ুতিঃ ।
শংখচক্রগদাপাণিঃ পীতবাসা জগত্পতিঃ ॥ 16 ॥
ব্রহ্মণা চ সমাগম্য় তত্র তস্থৌ সমাহিতঃ ।
1 তমব্রুবন্সুরাস্সর্বে সমভিষ্টূয় সন্নতাঃ ॥ 17 ॥
ত্বান্নিয়োক্ষ্য়ামহে বিষ্ণো লোকানাং হিতকাম্যয়া ।
1 রাজ্ঞো দশরথস্য় ত্বময়োধ্য়াধিপতেঃ প্রভোঃ ॥ 18 ॥
ধর্মজ্ঞস্য় বদান্যস্য় মহর্ষিসমতেজসঃ ।
18 তস্য় ভার্য়াসু তিসৃষু হ্রীশ্রীকীর্ত্য়ুপমাসু চ ॥ 19 ॥
বিষ্ণো পুত্রত্বমাগচ্ছ কৃত্বাঽঽত্মানং চতুর্বিধম্ ।
1 তত্র ত্বং মানুষো ভূত্বা প্রবৃদ্ধং লোককংটকম্ ।
অবধ্য়ং দৈবতৈর্বিষ্ণো সমরে জহি রাবণম্ ॥ 20 ॥
স হি দেবাংশ্চ গংধর্বান্সিদ্ধাংশ্চ মুনিসত্তমান্ ।
রাক্ষসো রাবণো মূর্খো বীর্য়োত্সেকেন বাধতে ॥ 21 ॥
ঋষযশ্চ ততস্তেন গংধর্বাপ্সরসস্তথা ।
ক্রীডংতো নংদনবনে ক্রূরেণ কিল হিংসিতাঃ ॥ 22 ॥
বধার্থং বযমায়াতাস্তস্য় বৈ মুনিভিস্সহ ।
সিদ্ধগংধর্বযক্ষাশ্চ ততস্ত্বাং শরণং গতাঃ ॥ 23 ॥
ত্বং গতিঃ পরমা দেব সর্বেষাং নঃ পরংতপঃ ।
বধায় দেবশত্রূণাং নৃণাং লোকে মনঃ কুরু ॥ 24 ॥
এবমুক্তস্তু দেবেশো বিষ্ণুস্ত্রিদশপুংগবঃ ।
পিতামহপুরোগাংস্তান্সর্বলোকনমস্কৃতঃ ॥ 25 ॥
অব্রবীত্ত্রিদশান্সর্বান্সমেতাংধর্মসংহিতান্ ॥ 26 ॥
ভয়ং ত্যজত ভদ্রং বো হিতার্থং যুধি রাবণম্ ।
সপুত্রপৌত্রং সামাত্য়ং সমিত্রজ্ঞাতিবাংধবম্ ॥ 27 ॥
হত্বা ক্রূরং দুরাত্মানং দেবর্ষীণাং ভয়াবহম্ ।
দশবর্ষসহস্রাণি দশবর্ষশতানি চ ।
বত্স্য়ামি মানুষে লোকে পালযন্পৃথিবীমিমাম্ ॥ 28 ॥
এবং দত্বা বরং দেবো দেবানাং বিষ্ণুরাত্মবান্ ।
মানুষে চিংতয়ামাস জন্মভূমিমথাত্মনঃ ॥ 29 ॥
ততঃ পদ্মপলাশাক্ষঃ কৃত্বাঽঽত্মানং চতুর্বিধম্ ।
পিতরং রোচয়ামাস তথা দশরথন্নৃপম্ ॥ 30 ॥
তদা দেবর্ষি গংধর্বাস্সরুদ্রাস্সাপ্সরোগণাঃ ।
স্তুতিভির্দিব্যরূপাভিস্তুষ্টুবুর্মধুসূদনম্ ॥ 31 ॥
তমুদ্ধতং রাবণমুগ্রতেজসং প্রবৃদ্ধদর্পং ত্রিদশেশ্বরদ্বিষম্ ।
বিরাবণং সাধুতপস্বিকংটকং তপস্বিনামুদ্ধর তং ভয়াবহম্ ॥ 32 ॥
তমেব হত্বা সবলং সবাংধবং বিরাবণং রাবণমগ্য়্রপৌরুষম্ ।
স্বর্লোকমাগচ্ছ গতজ্বরশ্চিরং সুরেংদ্রগুপ্তং গতদোষকল্মষম্ ॥ 33 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে পংচদশস্সর্গঃ ॥
