ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ପଂଚଦଶସ୍ସର୍ଗଃ ।
ମେଥାଵୀ ତୁ ତତୋ ଧ୍ୟାତ୍ଵା ସ କିଂଚିଦିଦମୁତ୍ତରମ୍ ।
ଲବ୍ଧସଂଜ୍ଞସ୍ତତସ୍ତଂ ତୁ ଵେଦଜ୍ଞୋ ନୃପମବ୍ରଵୀତ୍ ॥ 1 ॥
ଇଷ୍ଟିଂ ତେଽହଂ କରିଷ୍ୟାମି ପୁତ୍ରୀୟାଂ ପୁତ୍ରକାରଣାତ୍ ।
ଅଥର୍ଵଶିରସି ପ୍ରୋକ୍ତୈର୍ମଂତ୍ରୈସ୍ସିଦ୍ଧାଂ ଵିଧାନତଃ ॥ 2 ॥
ତତଃ ପ୍ରାକ୍ରମଦିଷ୍ଟିଂ ତାଂ ପୁତ୍ରୀୟାଂ ପୁତ୍ରକାରଣାତ୍ ।
ଜୁହାଵ ଚାଗ୍ନୌ ତେଜସ୍ଵୀ ମଂତ୍ରଦୃଷ୍ଟେନ କର୍ମଣା ॥ 3 ॥
ତତୋ ଦେଵାସ୍ସଗଂଧର୍ଵାସ୍ସିଦ୍ଧାଶ୍ଚ ପରମର୍ଷୟଃ ।
ଭାଗପ୍ରତିଗ୍ରହାର୍ଥଂ ଵୈ ସମଵେତା ୟଥାଵିଧି ॥ 4 ॥
ତାସ୍ସମେତ୍ୟ ୟଥାନ୍ୟାୟଂ ତସ୍ମିନ୍ସଦସି ଦେଵତାଃ ।
ଅବ୍ରୁଵନ୍ ଲୋକକର୍ତାରଂ ବ୍ରହ୍ମାଣଂ ଵଚନଂ ମହତ୍ ॥ 5 ॥
ଭଗଵଂତ୍ଵତ୍ପ୍ରସାଦେନ ରାଵଣୋ ନାମ ରାକ୍ଷସଃ ।
ସର୍ଵାନ୍ନୋ ବାଧତେ ଵୀର୍ୟାଚ୍ଛାସିତୁଂ ତଂ ନ ଶକ୍ନୁମଃ ॥ 6 ॥
ତ୍ଵୟା ତସ୍ମୈ ଵରୋ ଦତ୍ତଃ ପ୍ରୀତେନ ଭଗଵନ୍ପୁରା ।
ମାନୟଂତଶ୍ଚ ତଂ ନିତ୍ୟଂ ସର୍ଵଂ ତସ୍ୟ କ୍ଷମାମହେ ॥ 7 ॥
ଉଦ୍ଵେଜୟତି ଲୋକାନ୍ସ୍ତୀନୁଚ୍ଛ୍ରିତାଂଦ୍ଵେଷ୍ଟି ଦୁର୍ମତିଃ ।
ଶକ୍ରଂ ତ୍ରିଦଶରାଜାନଂ ପ୍ରଧର୍ଷୟିତୁମିଚ୍ଛତି ॥ 8 ॥
ଋଷୀନ୍ୟକ୍ଷାନ୍ସଗଂଧର୍ଵାନସୁରାନ୍ବ୍ରାହ୍ମଣାଂସ୍ତଥା ।
ଅତିକ୍ରାମତି ଦୁର୍ଧର୍ଷୋ ଵରଦାନେନ ମୋହିତଃ ॥ 9 ॥
ନୈନଂ ସୂର୍ୟଃ ପ୍ରତପତି ପାର୍ଶ୍ଵେ ଵାତି ନ ମାରୁତଃ ।
ଚଲୋର୍ମିମାଲୀ ତଂ ଦୃଷ୍ଟ୍ଵା ସମୁଦ୍ରୋଽପି ନ କଂପତେ ॥ 10 ॥
ତନ୍ମହନ୍ନୋ ଭୟଂ ତସ୍ମାଦ୍ରାକ୍ଷସାଦ୍ଘୋରଦର୍ଶନାତ୍ ।
ଵଧାର୍ଥଂ ତସ୍ୟ ଭଗଵନ୍ନୁପାୟଂ କର୍ତୁମର୍ହସି ॥ 11 ॥
ଏଵମୁକ୍ତସ୍ସୁରୈସ୍ସର୍ଵୈଶ୍ଚିଂତୟିତ୍ଵା ତତୋଽବ୍ରଵୀତ୍ ।
ହଂତାୟଂ ଵିଦିତସ୍ତସ୍ୟ ଵଧୋପାୟୋ ଦୁରାତ୍ମନଃ ॥ 12 ॥
ତେନ ଗଂଧର୍ଵୟକ୍ଷାଣାଂ ଦେଵଦାନଵରକ୍ଷସାମ୍ ।
ଅଵଧ୍ୟୋଽସ୍ମୀତି ଵାଗୁକ୍ତା ତଥେତ୍ୟୁକ୍ତଂ ଚ ତନ୍ମୟା ॥ 13 ॥
ନାକୀର୍ତୟଦଵଜ୍ଞାନାତ୍ତଦ୍ରକ୍ଷୋ ମାନୁଷାନ୍ ପ୍ରତି ।
ତସ୍ମାତ୍ସ ମାନୁଷାଦ୍ଵଧ୍ୟୋ ମୃତ୍ୟୁର୍ନାନ୍ୟୋଽସ୍ୟ ଵିଦ୍ୟତେ ॥ 14 ॥
ଏତଚ୍ଛ୍ରୁତ୍ଵା ପ୍ରିୟଂ ଵାକ୍ୟଂ ବ୍ରହ୍ମଣା ସମୁଦାହୃତମ୍ ।
ସର୍ଵେ ମହର୍ଷୟୋ ଦେଵାଃ ପ୍ରହୃଷ୍ଟାସ୍ତେଽଭଵଂସ୍ତଦା ॥ 15 ॥
ଏତସ୍ମିନ୍ନଂତରେ ଵିଷ୍ଣୁରୁପୟାତୋ ମହାଦ୍ୟୁତିଃ ।
ଶଂଖଚକ୍ରଗଦାପାଣିଃ ପୀତଵାସା ଜଗତ୍ପତିଃ ॥ 16 ॥
ବ୍ରହ୍ମଣା ଚ ସମାଗମ୍ୟ ତତ୍ର ତସ୍ଥୌ ସମାହିତଃ ।
1 ତମବ୍ରୁଵନ୍ସୁରାସ୍ସର୍ଵେ ସମଭିଷ୍ଟୂୟ ସନ୍ନତାଃ ॥ 17 ॥
ତ୍ଵାନ୍ନିୟୋକ୍ଷ୍ୟାମହେ ଵିଷ୍ଣୋ ଲୋକାନାଂ ହିତକାମ୍ୟୟା ।
1 ରାଜ୍ଞୋ ଦଶରଥସ୍ୟ ତ୍ଵମୟୋଧ୍ୟାଧିପତେଃ ପ୍ରଭୋଃ ॥ 18 ॥
ଧର୍ମଜ୍ଞସ୍ୟ ଵଦାନ୍ୟସ୍ୟ ମହର୍ଷିସମତେଜସଃ ।
18 ତସ୍ୟ ଭାର୍ୟାସୁ ତିସୃଷୁ ହ୍ରୀଶ୍ରୀକୀର୍ତ୍ୟୁପମାସୁ ଚ ॥ 19 ॥
ଵିଷ୍ଣୋ ପୁତ୍ରତ୍ଵମାଗଚ୍ଛ କୃତ୍ଵାଽଽତ୍ମାନଂ ଚତୁର୍ଵିଧମ୍ ।
1 ତତ୍ର ତ୍ଵଂ ମାନୁଷୋ ଭୂତ୍ଵା ପ୍ରଵୃଦ୍ଧଂ ଲୋକକଂଟକମ୍ ।
ଅଵଧ୍ୟଂ ଦୈଵତୈର୍ଵିଷ୍ଣୋ ସମରେ ଜହି ରାଵଣମ୍ ॥ 20 ॥
ସ ହି ଦେଵାଂଶ୍ଚ ଗଂଧର୍ଵାନ୍ସିଦ୍ଧାଂଶ୍ଚ ମୁନିସତ୍ତମାନ୍ ।
ରାକ୍ଷସୋ ରାଵଣୋ ମୂର୍ଖୋ ଵୀର୍ୟୋତ୍ସେକେନ ବାଧତେ ॥ 21 ॥
ଋଷୟଶ୍ଚ ତତସ୍ତେନ ଗଂଧର୍ଵାପ୍ସରସସ୍ତଥା ।
କ୍ରୀଡଂତୋ ନଂଦନଵନେ କ୍ରୂରେଣ କିଲ ହିଂସିତାଃ ॥ 22 ॥
ଵଧାର୍ଥଂ ଵୟମାୟାତାସ୍ତସ୍ୟ ଵୈ ମୁନିଭିସ୍ସହ ।
ସିଦ୍ଧଗଂଧର୍ଵୟକ୍ଷାଶ୍ଚ ତତସ୍ତ୍ଵାଂ ଶରଣଂ ଗତାଃ ॥ 23 ॥
ତ୍ଵଂ ଗତିଃ ପରମା ଦେଵ ସର୍ଵେଷାଂ ନଃ ପରଂତପଃ ।
ଵଧାୟ ଦେଵଶତ୍ରୂଣାଂ ନୃଣାଂ ଲୋକେ ମନଃ କୁରୁ ॥ 24 ॥
ଏଵମୁକ୍ତସ୍ତୁ ଦେଵେଶୋ ଵିଷ୍ଣୁସ୍ତ୍ରିଦଶପୁଂଗଵଃ ।
ପିତାମହପୁରୋଗାଂସ୍ତାନ୍ସର୍ଵଲୋକନମସ୍କୃତଃ ॥ 25 ॥
ଅବ୍ରଵୀତ୍ତ୍ରିଦଶାନ୍ସର୍ଵାନ୍ସମେତାଂଧର୍ମସଂହିତାନ୍ ॥ 26 ॥
ଭୟଂ ତ୍ୟଜତ ଭଦ୍ରଂ ଵୋ ହିତାର୍ଥଂ ୟୁଧି ରାଵଣମ୍ ।
ସପୁତ୍ରପୌତ୍ରଂ ସାମାତ୍ୟଂ ସମିତ୍ରଜ୍ଞାତିବାଂଧଵମ୍ ॥ 27 ॥
ହତ୍ଵା କ୍ରୂରଂ ଦୁରାତ୍ମାନଂ ଦେଵର୍ଷୀଣାଂ ଭୟାଵହମ୍ ।
ଦଶଵର୍ଷସହସ୍ରାଣି ଦଶଵର୍ଷଶତାନି ଚ ।
ଵତ୍ସ୍ୟାମି ମାନୁଷେ ଲୋକେ ପାଲୟନ୍ପୃଥିଵୀମିମାମ୍ ॥ 28 ॥
ଏଵଂ ଦତ୍ଵା ଵରଂ ଦେଵୋ ଦେଵାନାଂ ଵିଷ୍ଣୁରାତ୍ମଵାନ୍ ।
ମାନୁଷେ ଚିଂତୟାମାସ ଜନ୍ମଭୂମିମଥାତ୍ମନଃ ॥ 29 ॥
ତତଃ ପଦ୍ମପଲାଶାକ୍ଷଃ କୃତ୍ଵାଽଽତ୍ମାନଂ ଚତୁର୍ଵିଧମ୍ ।
ପିତରଂ ରୋଚୟାମାସ ତଥା ଦଶରଥନ୍ନୃପମ୍ ॥ 30 ॥
ତଦା ଦେଵର୍ଷି ଗଂଧର୍ଵାସ୍ସରୁଦ୍ରାସ୍ସାପ୍ସରୋଗଣାଃ ।
ସ୍ତୁତିଭିର୍ଦିଵ୍ୟରୂପାଭିସ୍ତୁଷ୍ଟୁଵୁର୍ମଧୁସୂଦନମ୍ ॥ 31 ॥
ତମୁଦ୍ଧତଂ ରାଵଣମୁଗ୍ରତେଜସଂ ପ୍ରଵୃଦ୍ଧଦର୍ପଂ ତ୍ରିଦଶେଶ୍ଵରଦ୍ଵିଷମ୍ ।
ଵିରାଵଣଂ ସାଧୁତପସ୍ଵିକଂଟକଂ ତପସ୍ଵିନାମୁଦ୍ଧର ତଂ ଭୟାଵହମ୍ ॥ 32 ॥
ତମେଵ ହତ୍ଵା ସବଲଂ ସବାଂଧଵଂ ଵିରାଵଣଂ ରାଵଣମଗ୍ୟ୍ରପୌରୁଷମ୍ ।
ସ୍ଵର୍ଲୋକମାଗଚ୍ଛ ଗତଜ୍ଵରଶ୍ଚିରଂ ସୁରେଂଦ୍ରଗୁପ୍ତଂ ଗତଦୋଷକଲ୍ମଷମ୍ ॥ 33 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ପଂଚଦଶସ୍ସର୍ଗଃ ॥
