ශ්රීමද්වාල්මීකීය රාමායණේ බාලකාංඩම් ।
අථ පංචදශස්සර්ගඃ ।
මේථාවී තු තතෝ ධ්යාත්වා ස කිංචිදිදමුත්තරම් ।
ලබ්ධසංජ්ඤස්තතස්තං තු වේදජ්ඤෝ නෘපමබ්රවීත් ॥ 1 ॥
ඉෂ්ටිං තේऽහං කරිෂ්යාමි පුත්රීයාං පුත්රකාරණාත් ।
අථර්වශිරසි ප්රෝක්තෛර්මංත්රෛස්සිද්ධාං විධානතඃ ॥ 2 ॥
තතඃ ප්රාක්රමදිෂ්ටිං තාං පුත්රීයාං පුත්රකාරණාත් ।
ජුහාව චාග්නෞ තේජස්වී මංත්රදෘෂ්ටේන කර්මණා ॥ 3 ॥
තතෝ දේවාස්සගංධර්වාස්සිද්ධාශ්ච පරමර්ෂයඃ ।
භාගප්රතිග්රහාර්ථං වෛ සමවේතා යථාවිධි ॥ 4 ॥
තාස්සමේත්ය යථාන්යායං තස්මින්සදසි දේවතාඃ ।
අබ්රුවන් ලෝකකර්තාරං බ්රහ්මාණං වචනං මහත් ॥ 5 ॥
භගවංත්වත්ප්රසාදේන රාවණෝ නාම රාක්ෂසඃ ।
සර්වාන්නෝ බාධතේ වීර්යාච්ඡාසිතුං තං න ශක්නුමඃ ॥ 6 ॥
ත්වයා තස්මෛ වරෝ දත්තඃ ප්රීතේන භගවන්පුරා ।
මානයංතශ්ච තං නිත්යං සර්වං තස්ය ක්ෂමාමහේ ॥ 7 ॥
උද්වේජයති ලෝකාන්ස්තීනුච්ඡ්රිතාංද්වේෂ්ටි දුර්මතිඃ ।
ශක්රං ත්රිදශරාජානං ප්රධර්ෂයිතුමිච්ඡති ॥ 8 ॥
ඍෂීන්යක්ෂාන්සගංධර්වානසුරාන්බ්රාහ්මණාංස්තථා ।
අතික්රාමති දුර්ධර්ෂෝ වරදානේන මෝහිතඃ ॥ 9 ॥
නෛනං සූර්යඃ ප්රතපති පාර්ශ්වේ වාති න මාරුතඃ ।
චලෝර්මිමාලී තං දෘෂ්ට්වා සමුද්රෝऽපි න කංපතේ ॥ 10 ॥
තන්මහන්නෝ භයං තස්මාද්රාක්ෂසාද්ඝෝරදර්ශනාත් ।
වධාර්ථං තස්ය භගවන්නුපායං කර්තුමර්හසි ॥ 11 ॥
ඒවමුක්තස්සුරෛස්සර්වෛශ්චිංතයිත්වා තතෝऽබ්රවීත් ।
හංතායං විදිතස්තස්ය වධෝපායෝ දුරාත්මනඃ ॥ 12 ॥
තේන ගංධර්වයක්ෂාණාං දේවදානවරක්ෂසාම් ।
අවධ්යෝऽස්මීති වාගුක්තා තථේත්යුක්තං ච තන්මයා ॥ 13 ॥
නාකීර්තයදවජ්ඤානාත්තද්රක්ෂෝ මානුෂාන් ප්රති ।
තස්මාත්ස මානුෂාද්වධ්යෝ මෘත්යුර්නාන්යෝऽස්ය විද්යතේ ॥ 14 ॥
ඒතච්ඡ්රුත්වා ප්රියං වාක්යං බ්රහ්මණා සමුදාහෘතම් ।
සර්වේ මහර්ෂයෝ දේවාඃ ප්රහෘෂ්ටාස්තේऽභවංස්තදා ॥ 15 ॥
ඒතස්මින්නංතරේ විෂ්ණුරුපයාතෝ මහාද්යුතිඃ ।
ශංඛචක්රගදාපාණිඃ පීතවාසා ජගත්පතිඃ ॥ 16 ॥
බ්රහ්මණා ච සමාගම්ය තත්ර තස්ථෞ සමාහිතඃ ।
1 තමබ්රුවන්සුරාස්සර්වේ සමභිෂ්ටූය සන්නතාඃ ॥ 17 ॥
ත්වාන්නියෝක්ෂ්යාමහේ විෂ්ණෝ ලෝකානාං හිතකාම්යයා ।
1 රාජ්ඤෝ දශරථස්ය ත්වමයෝධ්යාධිපතේඃ ප්රභෝඃ ॥ 18 ॥
ධර්මජ්ඤස්ය වදාන්යස්ය මහර්ෂිසමතේජසඃ ।
18 තස්ය භාර්යාසු තිසෘෂු හ්රීශ්රීකීර්ත්යුපමාසු ච ॥ 19 ॥
විෂ්ණෝ පුත්රත්වමාගච්ඡ කෘත්වාऽऽත්මානං චතුර්විධම් ।
1 තත්ර ත්වං මානුෂෝ භූත්වා ප්රවෘද්ධං ලෝකකංටකම් ।
අවධ්යං දෛවතෛර්විෂ්ණෝ සමරේ ජහි රාවණම් ॥ 20 ॥
ස හි දේවාංශ්ච ගංධර්වාන්සිද්ධාංශ්ච මුනිසත්තමාන් ।
රාක්ෂසෝ රාවණෝ මූර්ඛෝ වීර්යෝත්සේකේන බාධතේ ॥ 21 ॥
ඍෂයශ්ච තතස්තේන ගංධර්වාප්සරසස්තථා ।
ක්රීඩංතෝ නංදනවනේ ක්රූරේණ කිල හිංසිතාඃ ॥ 22 ॥
වධාර්ථං වයමායාතාස්තස්ය වෛ මුනිභිස්සහ ।
සිද්ධගංධර්වයක්ෂාශ්ච තතස්ත්වාං ශරණං ගතාඃ ॥ 23 ॥
ත්වං ගතිඃ පරමා දේව සර්වේෂාං නඃ පරංතපඃ ।
වධාය දේවශත්රූණාං නෘණාං ලෝකේ මනඃ කුරු ॥ 24 ॥
ඒවමුක්තස්තු දේවේශෝ විෂ්ණුස්ත්රිදශපුංගවඃ ।
පිතාමහපුරෝගාංස්තාන්සර්වලෝකනමස්කෘතඃ ॥ 25 ॥
අබ්රවීත්ත්රිදශාන්සර්වාන්සමේතාංධර්මසංහිතාන් ॥ 26 ॥
භයං ත්යජත භද්රං වෝ හිතාර්ථං යුධි රාවණම් ।
සපුත්රපෞත්රං සාමාත්යං සමිත්රජ්ඤාතිබාංධවම් ॥ 27 ॥
හත්වා ක්රූරං දුරාත්මානං දේවර්ෂීණාං භයාවහම් ।
දශවර්ෂසහස්රාණි දශවර්ෂශතානි ච ।
වත්ස්යාමි මානුෂේ ලෝකේ පාලයන්පෘථිවීමිමාම් ॥ 28 ॥
ඒවං දත්වා වරං දේවෝ දේවානාං විෂ්ණුරාත්මවාන් ।
මානුෂේ චිංතයාමාස ජන්මභූමිමථාත්මනඃ ॥ 29 ॥
තතඃ පද්මපලාශාක්ෂඃ කෘත්වාऽऽත්මානං චතුර්විධම් ।
පිතරං රෝචයාමාස තථා දශරථන්නෘපම් ॥ 30 ॥
තදා දේවර්ෂි ගංධර්වාස්සරුද්රාස්සාප්සරෝගණාඃ ।
ස්තුතිභිර්දිව්යරූපාභිස්තුෂ්ටුවුර්මධුසූදනම් ॥ 31 ॥
තමුද්ධතං රාවණමුග්රතේජසං ප්රවෘද්ධදර්පං ත්රිදශේශ්වරද්විෂම් ।
විරාවණං සාධුතපස්විකංටකං තපස්විනාමුද්ධර තං භයාවහම් ॥ 32 ॥
තමේව හත්වා සබලං සබාංධවං විරාවණං රාවණමග්ය්රපෞරුෂම් ।
ස්වර්ලෝකමාගච්ඡ ගතජ්වරශ්චිරං සුරේංද්රගුප්තං ගතදෝෂකල්මෂම් ॥ 33 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ පංචදශස්සර්ගඃ ॥
