ശ്രീമദ്വാല്മീകീയ രാമായണേ ബാലകാംഡമ് ।
അഥ പംചദശസ്സര്ഗഃ ।
മേഥാവീ തു തതോ ധ്യാത്വാ സ കിംചിദിദമുത്തരമ് ।
ലബ്ധസംജ്ഞസ്തതസ്തം തു വേദജ്ഞോ നൃപമബ്രവീത് ॥ 1 ॥
ഇഷ്ടിം തേഽഹം കരിഷ്യാമി പുത്രീയാം പുത്രകാരണാത് ।
അഥർവശിരസി പ്രോക്തൈര്മംത്രൈസ്സിദ്ധാം വിധാനതഃ ॥ 2 ॥
തതഃ പ്രാക്രമദിഷ്ടിം താം പുത്രീയാം പുത്രകാരണാത് ।
ജുഹാവ ചാഗ്നൌ തേജസ്വീ മംത്രദൃഷ്ടേന കര്മണാ ॥ 3 ॥
തതോ ദേവാസ്സഗംധർവാസ്സിദ്ധാശ്ച പരമര്ഷയഃ ।
ഭാഗപ്രതിഗ്രഹാര്ഥം വൈ സമവേതാ യഥാവിധി ॥ 4 ॥
താസ്സമേത്യ യഥാന്യായം തസ്മിന്സദസി ദേവതാഃ ।
അബ്രുവന് ലോകകര്താരം ബ്രഹ്മാണം വചനം മഹത് ॥ 5 ॥
ഭഗവംത്വത്പ്രസാദേന രാവണോ നാമ രാക്ഷസഃ ।
സർവാന്നോ ബാധതേ വീര്യാച്ഛാസിതും തം ന ശക്നുമഃ ॥ 6 ॥
ത്വയാ തസ്മൈ വരോ ദത്തഃ പ്രീതേന ഭഗവന്പുരാ ।
മാനയംതശ്ച തം നിത്യം സർവം തസ്യ ക്ഷമാമഹേ ॥ 7 ॥
ഉദ്വേജയതി ലോകാന്സ്തീനുച്ഛ്രിതാംദ്വേഷ്ടി ദുര്മതിഃ ।
ശക്രം ത്രിദശരാജാനം പ്രധര്ഷയിതുമിച്ഛതി ॥ 8 ॥
ഋഷീന്യക്ഷാന്സഗംധർവാനസുരാന്ബ്രാഹ്മണാംസ്തഥാ ।
അതിക്രാമതി ദുര്ധര്ഷോ വരദാനേന മോഹിതഃ ॥ 9 ॥
നൈനം സൂര്യഃ പ്രതപതി പാര്ശ്വേ വാതി ന മാരുതഃ ।
ചലോര്മിമാലീ തം ദൃഷ്ട്വാ സമുദ്രോഽപി ന കംപതേ ॥ 10 ॥
തന്മഹന്നോ ഭയം തസ്മാദ്രാക്ഷസാദ്ഘോരദര്ശനാത് ।
വധാര്ഥം തസ്യ ഭഗവന്നുപായം കര്തുമര്ഹസി ॥ 11 ॥
ഏവമുക്തസ്സുരൈസ്സർവൈശ്ചിംതയിത്വാ തതോഽബ്രവീത് ।
ഹംതായം വിദിതസ്തസ്യ വധോപായോ ദുരാത്മനഃ ॥ 12 ॥
തേന ഗംധർവയക്ഷാണാം ദേവദാനവരക്ഷസാമ് ।
അവധ്യോഽസ്മീതി വാഗുക്താ തഥേത്യുക്തം ച തന്മയാ ॥ 13 ॥
നാകീര്തയദവജ്ഞാനാത്തദ്രക്ഷോ മാനുഷാന് പ്രതി ।
തസ്മാത്സ മാനുഷാദ്വധ്യോ മൃത്യുര്നാന്യോഽസ്യ വിദ്യതേ ॥ 14 ॥
ഏതച്ഛ്രുത്വാ പ്രിയം വാക്യം ബ്രഹ്മണാ സമുദാഹൃതമ് ।
സർവേ മഹര്ഷയോ ദേവാഃ പ്രഹൃഷ്ടാസ്തേഽഭവംസ്തദാ ॥ 15 ॥
ഏതസ്മിന്നംതരേ വിഷ്ണുരുപയാതോ മഹാദ്യുതിഃ ।
ശംഖചക്രഗദാപാണിഃ പീതവാസാ ജഗത്പതിഃ ॥ 16 ॥
ബ്രഹ്മണാ ച സമാഗമ്യ തത്ര തസ്ഥൌ സമാഹിതഃ ।
1 തമബ്രുവന്സുരാസ്സർവേ സമഭിഷ്ടൂയ സന്നതാഃ ॥ 17 ॥
ത്വാന്നിയോക്ഷ്യാമഹേ വിഷ്ണോ ലോകാനാം ഹിതകാമ്യയാ ।
1 രാജ്ഞോ ദശരഥസ്യ ത്വമയോധ്യാധിപതേഃ പ്രഭോഃ ॥ 18 ॥
ധര്മജ്ഞസ്യ വദാന്യസ്യ മഹര്ഷിസമതേജസഃ ।
18 തസ്യ ഭാര്യാസു തിസൃഷു ഹ്രീശ്രീകീര്ത്യുപമാസു ച ॥ 19 ॥
വിഷ്ണോ പുത്രത്വമാഗച്ഛ കൃത്വാഽഽത്മാനം ചതുർവിധമ് ।
1 തത്ര ത്വം മാനുഷോ ഭൂത്വാ പ്രവൃദ്ധം ലോകകംടകമ് ।
അവധ്യം ദൈവതൈർവിഷ്ണോ സമരേ ജഹി രാവണമ് ॥ 20 ॥
സ ഹി ദേവാംശ്ച ഗംധർവാന്സിദ്ധാംശ്ച മുനിസത്തമാന് ।
രാക്ഷസോ രാവണോ മൂര്ഖോ വീര്യോത്സേകേന ബാധതേ ॥ 21 ॥
ഋഷയശ്ച തതസ്തേന ഗംധർവാപ്സരസസ്തഥാ ।
ക്രീഡംതോ നംദനവനേ ക്രൂരേണ കില ഹിംസിതാഃ ॥ 22 ॥
വധാര്ഥം വയമായാതാസ്തസ്യ വൈ മുനിഭിസ്സഹ ।
സിദ്ധഗംധർവയക്ഷാശ്ച തതസ്ത്വാം ശരണം ഗതാഃ ॥ 23 ॥
ത്വം ഗതിഃ പരമാ ദേവ സർവേഷാം നഃ പരംതപഃ ।
വധായ ദേവശത്രൂണാം നൃണാം ലോകേ മനഃ കുരു ॥ 24 ॥
ഏവമുക്തസ്തു ദേവേശോ വിഷ്ണുസ്ത്രിദശപുംഗവഃ ।
പിതാമഹപുരോഗാംസ്താന്സർവലോകനമസ്കൃതഃ ॥ 25 ॥
അബ്രവീത്ത്രിദശാന്സർവാന്സമേതാംധര്മസംഹിതാന് ॥ 26 ॥
ഭയം ത്യജത ഭദ്രം വോ ഹിതാര്ഥം യുധി രാവണമ് ।
സപുത്രപൌത്രം സാമാത്യം സമിത്രജ്ഞാതിബാംധവമ് ॥ 27 ॥
ഹത്വാ ക്രൂരം ദുരാത്മാനം ദേവര്ഷീണാം ഭയാവഹമ് ।
ദശവര്ഷസഹസ്രാണി ദശവര്ഷശതാനി ച ।
വത്സ്യാമി മാനുഷേ ലോകേ പാലയന്പൃഥിവീമിമാമ് ॥ 28 ॥
ഏവം ദത്വാ വരം ദേവോ ദേവാനാം വിഷ്ണുരാത്മവാന് ।
മാനുഷേ ചിംതയാമാസ ജന്മഭൂമിമഥാത്മനഃ ॥ 29 ॥
തതഃ പദ്മപലാശാക്ഷഃ കൃത്വാഽഽത്മാനം ചതുർവിധമ് ।
പിതരം രോചയാമാസ തഥാ ദശരഥന്നൃപമ് ॥ 30 ॥
തദാ ദേവര്ഷി ഗംധർവാസ്സരുദ്രാസ്സാപ്സരോഗണാഃ ।
സ്തുതിഭിര്ദിവ്യരൂപാഭിസ്തുഷ്ടുവുര്മധുസൂദനമ് ॥ 31 ॥
തമുദ്ധതം രാവണമുഗ്രതേജസം പ്രവൃദ്ധദര്പം ത്രിദശേശ്വരദ്വിഷമ് ।
വിരാവണം സാധുതപസ്വികംടകം തപസ്വിനാമുദ്ധര തം ഭയാവഹമ് ॥ 32 ॥
തമേവ ഹത്വാ സബലം സബാംധവം വിരാവണം രാവണമഗ്യ്രപൌരുഷമ് ।
സ്വര്ലോകമാഗച്ഛ ഗതജ്വരശ്ചിരം സുരേംദ്രഗുപ്തം ഗതദോഷകല്മഷമ് ॥ 33 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ പംചദശസ്സര്ഗഃ ॥
