śrīmadvālmīkīya rāmāyaṇē bālakāṇḍam ।
atha pañchadaśassargaḥ ।
mēthāvī tu tatō dhyātvā sa kiñchididamuttaram ।
labdhasañjñastatastaṃ tu vēdajñō nṛpamabravīt ॥ 1 ॥
iṣṭiṃ tē'haṃ kariṣyāmi putrīyāṃ putrakāraṇāt ।
atharvaśirasi prōktairmantraissiddhāṃ vidhānataḥ ॥ 2 ॥
tataḥ prākramadiṣṭiṃ tāṃ putrīyāṃ putrakāraṇāt ।
juhāva chāgnau tējasvī mantradṛṣṭēna karmaṇā ॥ 3 ॥
tatō dēvāssagandharvāssiddhāścha paramarṣayaḥ ।
bhāgapratigrahārthaṃ vai samavētā yathāvidhi ॥ 4 ॥
tāssamētya yathānyāyaṃ tasminsadasi dēvatāḥ ।
abruvan lōkakartāraṃ brahmāṇaṃ vachanaṃ mahat ॥ 5 ॥
bhagavantvatprasādēna rāvaṇō nāma rākṣasaḥ ।
sarvānnō bādhatē vīryāchChāsituṃ taṃ na śaknumaḥ ॥ 6 ॥
tvayā tasmai varō dattaḥ prītēna bhagavanpurā ।
mānayantaścha taṃ nityaṃ sarvaṃ tasya kṣamāmahē ॥ 7 ॥
udvējayati lōkānstīnuchChritāndvēṣṭi durmatiḥ ।
śakraṃ tridaśarājānaṃ pradharṣayitumichChati ॥ 8 ॥
ṛṣīnyakṣānsagandharvānasurānbrāhmaṇāṃstathā ।
atikrāmati durdharṣō varadānēna mōhitaḥ ॥ 9 ॥
nainaṃ sūryaḥ pratapati pārśvē vāti na mārutaḥ ।
chalōrmimālī taṃ dṛṣṭvā samudrō'pi na kampatē ॥ 10 ॥
tanmahannō bhayaṃ tasmādrākṣasādghōradarśanāt ।
vadhārthaṃ tasya bhagavannupāyaṃ kartumarhasi ॥ 11 ॥
ēvamuktassuraissarvaiśchintayitvā tatō'bravīt ।
hantāyaṃ viditastasya vadhōpāyō durātmanaḥ ॥ 12 ॥
tēna gandharvayakṣāṇāṃ dēvadānavarakṣasām ।
avadhyō'smīti vāguktā tathētyuktaṃ cha tanmayā ॥ 13 ॥
nākīrtayadavajñānāttadrakṣō mānuṣān prati ।
tasmātsa mānuṣādvadhyō mṛtyurnānyō'sya vidyatē ॥ 14 ॥
ētachChrutvā priyaṃ vākyaṃ brahmaṇā samudāhṛtam ।
sarvē maharṣayō dēvāḥ prahṛṣṭāstē'bhavaṃstadā ॥ 15 ॥
ētasminnantarē viṣṇurupayātō mahādyutiḥ ।
śaṅkhachakragadāpāṇiḥ pītavāsā jagatpatiḥ ॥ 16 ॥
brahmaṇā cha samāgamya tatra tasthau samāhitaḥ ।
1 tamabruvansurāssarvē samabhiṣṭūya sannatāḥ ॥ 17 ॥
tvānniyōkṣyāmahē viṣṇō lōkānāṃ hitakāmyayā ।
1 rājñō daśarathasya tvamayōdhyādhipatēḥ prabhōḥ ॥ 18 ॥
dharmajñasya vadānyasya maharṣisamatējasaḥ ।
18 tasya bhāryāsu tisṛṣu hrīśrīkīrtyupamāsu cha ॥ 19 ॥
viṣṇō putratvamāgachCha kṛtvā''tmānaṃ chaturvidham ।
1 tatra tvaṃ mānuṣō bhūtvā pravṛddhaṃ lōkakaṇṭakam ।
avadhyaṃ daivatairviṣṇō samarē jahi rāvaṇam ॥ 20 ॥
sa hi dēvāṃścha gandharvānsiddhāṃścha munisattamān ।
rākṣasō rāvaṇō mūrkhō vīryōtsēkēna bādhatē ॥ 21 ॥
ṛṣayaścha tatastēna gandharvāpsarasastathā ।
krīḍantō nandanavanē krūrēṇa kila hiṃsitāḥ ॥ 22 ॥
vadhārthaṃ vayamāyātāstasya vai munibhissaha ।
siddhagandharvayakṣāścha tatastvāṃ śaraṇaṃ gatāḥ ॥ 23 ॥
tvaṃ gatiḥ paramā dēva sarvēṣāṃ naḥ parantapaḥ ।
vadhāya dēvaśatrūṇāṃ nṛṇāṃ lōkē manaḥ kuru ॥ 24 ॥
ēvamuktastu dēvēśō viṣṇustridaśapuṅgavaḥ ।
pitāmahapurōgāṃstānsarvalōkanamaskṛtaḥ ॥ 25 ॥
abravīttridaśānsarvānsamētāndharmasaṃhitān ॥ 26 ॥
bhayaṃ tyajata bhadraṃ vō hitārthaṃ yudhi rāvaṇam ।
saputrapautraṃ sāmātyaṃ samitrajñātibāndhavam ॥ 27 ॥
hatvā krūraṃ durātmānaṃ dēvarṣīṇāṃ bhayāvaham ।
daśavarṣasahasrāṇi daśavarṣaśatāni cha ।
vatsyāmi mānuṣē lōkē pālayanpṛthivīmimām ॥ 28 ॥
ēvaṃ datvā varaṃ dēvō dēvānāṃ viṣṇurātmavān ।
mānuṣē chintayāmāsa janmabhūmimathātmanaḥ ॥ 29 ॥
tataḥ padmapalāśākṣaḥ kṛtvā''tmānaṃ chaturvidham ।
pitaraṃ rōchayāmāsa tathā daśarathannṛpam ॥ 30 ॥
tadā dēvarṣi gandharvāssarudrāssāpsarōgaṇāḥ ।
stutibhirdivyarūpābhistuṣṭuvurmadhusūdanam ॥ 31 ॥
tamuddhataṃ rāvaṇamugratējasaṃ pravṛddhadarpaṃ tridaśēśvaradviṣam ।
virāvaṇaṃ sādhutapasvikaṇṭakaṃ tapasvināmuddhara taṃ bhayāvaham ॥ 32 ॥
tamēva hatvā sabalaṃ sabāndhavaṃ virāvaṇaṃ rāvaṇamagyrapauruṣam ।
svarlōkamāgachCha gatajvaraśchiraṃ surēndraguptaṃ gatadōṣakalmaṣam ॥ 33 ॥
ityārṣē śrīmadrāmāyaṇē vālmīkīya ādikāvyē bālakāṇḍē pañchadaśassargaḥ ॥
