ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଵିଂଶସ୍ସର୍ଗଃ ।
ତଚ୍ଛ୍ରୁତ୍ଵା ରାଜଶାର୍ଦୂଲୋ ଵିଶ୍ଵାମିତ୍ରସ୍ୟ ଭାଷିତମ୍ ।
ମୁହୂର୍ତମିଵ ନିସ୍ସଂଜ୍ଞସ୍ସଂଜ୍ଞାଵାନିଦମବ୍ରଵୀତ୍ ॥ 1 ॥
ଊନଷୋଡଶଵର୍ଷୋ ମେ ରାମୋ ରାଜୀଵଲୋଚନଃ ।
ନ ୟୁଦ୍ଧୟୋଗ୍ୟତାମସ୍ୟ ପଶ୍ୟାମି ସହ ରାକ୍ଷସୈଃ ॥ 2 ॥
ଇୟମକ୍ଷୌହିଣୀ ପୂର୍ଣା ୟସ୍ୟାହଂ ପତିରୀଶ୍ଵରଃ ।
ଅନୟା ସଂଵୃତୋ ଗତ୍ଵା ୟୋଦ୍ଧାଽହଂ ତୈର୍ନିଶାଚରୈଃ ॥ 3 ॥
ଇମେ ଶୂରାଶ୍ଚ ଵିକ୍ରାଂତା ଭୃତ୍ୟା ମେଽସ୍ତ୍ରଵିଶାରଦାଃ ।
ୟୋଗ୍ୟା ରକ୍ଷୋଗଣୈର୍ୟୋଦ୍ଧୁଂ ନ ରାମଂ ନେତୁମର୍ହସି ॥ 4 ॥
ଅହମେଵ ଧନୁଷ୍ପାଣିର୍ଗୋପ୍ତା ସମରମୂର୍ଧନି ।
ୟାଵତ୍ପ୍ରାଣାଂଧରିଷ୍ୟାମି ତାଵଦ୍ୟୋତ୍ସ୍ୟେ ନିଶାଚରୈଃ ॥ 5 ॥
ନିର୍ଵିଘ୍ନା ଵ୍ରତଚର୍ୟା ସା ଭଵିଷ୍ୟତି ସୁରକ୍ଷିତା ।
ଅହଂ ତତ୍ରାଗମିଷ୍ୟାମି ନ ରାମଂ ନେତୁମର୍ହସି ॥ 6 ॥
ବାଲୋ ହ୍ୟକୃତଵିଦ୍ୟଶ୍ଚ ନ ଚ ଵେତ୍ତି ବଲାବଲମ୍ ।
ନ ଚାସ୍ତ୍ରବଲସଂୟୁକ୍ତୋ ନ ଚ ୟୁଦ୍ଧଵିଶାରଦଃ ॥ 7 ॥
ନ ଚାସୌ ରକ୍ଷସାଂ ୟୋଗ୍ୟଃ କୂଟୟୁଦ୍ଧା ହି ତେ ଧ୍ରୁଵମ୍ ।
ଵିପ୍ରୟୁକ୍ତୋ ହି ରାମେଣ ମୁହୂର୍ତମପି ନୋତ୍ସହେ ॥ 8 ॥
ଜୀଵିତୁଂ ମୁନିଶାର୍ଦୂଲ ନ ରାମଂ ନେତୁମର୍ହସି ।
ୟଦି ଵା ରାଘଵଂ ବ୍ରହ୍ମନ୍ନେତୁମିଚ୍ଛସି ସୁଵ୍ରତ ॥ 9 ॥
ଚତୁରଂଗସମାୟୁକ୍ତଂ ମୟା ଚ ସହିତଂ ନୟ ।
ଷଷ୍ଟିର୍ଵର୍ଷସହସ୍ରାଣି ଜାତସ୍ୟ ମମ କୌଶିକ ॥ 10 ॥
ଦୁଃଖେନୋତ୍ପାଦିତଶ୍ଚାୟଂ ନ ରାମଂ ନେତୁମର୍ହସି ।
ଚତୁର୍ଣାମାତ୍ମଜାନାଂ ହି ପ୍ରୀତିଃପରମିକା ମମ ॥ 11 ॥
ଜ୍ୟେଷ୍ଠଂ ଧର୍ମପ୍ରଧାନଂ ଚ ନ ରାମଂ ନେତୁମର୍ହସି ।
କିଂଵୀର୍ୟା ରାକ୍ଷସାସ୍ତେ ଚ କସ୍ୟ ପୁତ୍ରାଶ୍ଚ ତେ ଚ କେ ॥ 12 ॥
କଥଂ ପ୍ରମାଣାଃ କେ ଚୈତାନ୍ରକ୍ଷଂତି ମୁନିପୁଂଗଵ ।
କଥଂ ଚ ପ୍ରତିକର୍ତଵ୍ୟଂ ତେଷାଂ ରାମେଣ ରକ୍ଷସାମ୍ ॥ 13 ॥
ମାମକୈର୍ଵା ବଲୈର୍ବ୍ରହ୍ମନ୍ମୟା ଵା କୂଟୟୋଧିନାମ୍ ।
3 ସର୍ଵଂ ମେ ଶଂସ ଭଗଵନ୍କଥଂ ତେଷାଂ ମୟା ରଣେ ॥ 14 ॥
ସ୍ଥାତଵ୍ୟଂ ଦୁଷ୍ଟଭାଵାନାଂ ଵୀର୍ୟୋତ୍ସିକ୍ତା ହି ରାକ୍ଷସାଃ ।
4 ତସ୍ୟ ତଦ୍ଵଚନଂ ଶ୍ରୁତ୍ଵା ଵିଶ୍ଵାମିତ୍ରୋଽଭ୍ୟଭାଷତ ॥ 15 ॥
ପୌଲସ୍ତ୍ୟଵଂଶପ୍ରଭଵୋ ରାଵଣୋ ନାମ ରାକ୍ଷସଃ ।
ସ ବ୍ରହ୍ମଣା ଦତ୍ତଵରସ୍ତ୍ରୈଲୋକ୍ୟଂ ବାଧତେ ଭୃଶମ୍ ॥ 16 ॥
ମହାବଲୋ ମହାଵୀର୍ୟୋ ରାକ୍ଷସୈର୍ବହୁଭିର୍ଵୃତଃ ।
ଶ୍ରୂୟତେ ହି ମହାଵୀର୍ୟୋ ରାଵଣୋ ରାକ୍ଷସାଧିପଃ ॥ 17 ॥
ସାକ୍ଷାଦ୍ଵୈଶ୍ରଵଣଭ୍ରାତା ପୁତ୍ରୋ ଵିଶ୍ରଵସୋ ମୁନେଃ ।
ୟଦା ସ୍ଵୟଂ ନ ୟଜ୍ଞସ୍ୟ ଵିଘ୍ନକର୍ତା ମହାବଲଃ ॥ 18 ॥
ତେନ ସଂଚୋଦିତୌ ଦ୍ଵୌ ତୁ ରାକ୍ଷସୌ ଵୈ ମହାବଲୌ ।
ମାରୀଚଶ୍ଚ ସୁବାହୁଶ୍ଚ ୟଜ୍ଞଵିଘ୍ନଂ କରିଷ୍ୟତଃ ॥ 19 ॥
ଇତ୍ୟୁକ୍ତୋ ମୁନିନା ତେନ ରାଜୋଵାଚ ମୁନିଂ ତଦା ।
ନ ହି ଶକ୍ତୋଽସ୍ମି ସଂଗ୍ରାମେ ସ୍ଥାତୁଂ ତସ୍ୟ ଦୁରାତ୍ମନଃ ॥ 20 ॥
ସ ତ୍ଵଂ ପ୍ରସାଦଂ ଧର୍ମଜ୍ଞ କୁରୁଷ୍ଵ ମମ ପୁତ୍ରକେ ।
ମମ ଚୈଵାଲ୍ପଭାଗ୍ୟସ୍ୟ ଦୈଵତଂ ହି ଭଵାନ୍ଗୁରୁଃ ॥ 21 ॥
ଦେଵଦାନଵଗଂଧର୍ଵା ୟକ୍ଷାଃପତଗପନ୍ନଗାଃ ।
ନ ଶକ୍ତା ରାଵଣଂ ସୋଢୁଂ କିଂ ପୁନର୍ମାନଵା ୟୁଧି ॥ 22 ॥
ସ ହି ଵୀର୍ୟଵତାଂ ଵୀର୍ୟମାଦତ୍ତେ ୟୁଧି ରାକ୍ଷସଃ ।
ତେନ ଚାହଂ ନ ଶକ୍ତୋଽସ୍ମି ସଂୟୋଦ୍ଧୁଂ ତସ୍ୟ ଵା ବଲୈଃ ॥ 23 ॥
ସବଲୋ ଵା ମୁନିଶ୍ରେଷ୍ଠ ସହିତୋ ଵା ମମାତ୍ମଜୈଃ ।
କଥମପ୍ୟମରପ୍ରଖ୍ୟଂ ସଂଗ୍ରାମାଣାମକୋଵିଦମ୍ ।
ବାଲଂ ମେ ତନୟଂ ବ୍ରହ୍ମନ୍ ନୈଵ ଦାସ୍ୟାମି ପୁତ୍ରକମ୍ ॥ 24 ॥
ଅଥ କାଲୋପମୌ ୟୁଧ୍ଦେ ସୁତୌ ସୁଂଦୋପସୁଂଦୟୋଃ ॥ 25 ॥
ୟଜ୍ଞଵିଘ୍ନକରୌ ତୌ ତେ ନୈଵ ଦାସ୍ୟାମି ପୁତ୍ରକମ୍ ।
ମାରୀଚଶ୍ଚ ସୁବାହୁଶ୍ଚ ଵୀର୍ୟଵଂତୌ ସୁଶିକ୍ଷିତୌ ।
ତୟୋରନ୍ୟତରେଣାହଂ ୟୋଧ୍ଦା ସ୍ୟାଂ ସସୁହୃଦ୍ଗଣଃ ॥ 26 ॥
ଇତି ନରପତିଜଲ୍ପନାଦ୍ଦ୍ଵିଜେଂଦ୍ରଂ କୁଶିକସୁତଂ ସୁମହାନ୍ଵିଵେଶ ମନ୍ୟୁଃ ।
ସୁହୁତ ଇଵ ମଖେଽଗ୍ନିରାଜ୍ୟସିକ୍ତ ସ୍ସମଭଵଦୁଜ୍ଜ୍ଵଲିତୋ ମହର୍ଷିଵହ୍ନିଃ ॥ 27 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଵିଂଶସ୍ସର୍ଗଃ ॥
