śrīmadvālmīkīya rāmāyaṇē bālakāṇḍam ।
atha viṃśassargaḥ ।
tachChrutvā rājaśārdūlō viśvāmitrasya bhāṣitam ।
muhūrtamiva nissañjñassañjñāvānidamabravīt ॥ 1 ॥
ūnaṣōḍaśavarṣō mē rāmō rājīvalōchanaḥ ।
na yuddhayōgyatāmasya paśyāmi saha rākṣasaiḥ ॥ 2 ॥
iyamakṣauhiṇī pūrṇā yasyāhaṃ patirīśvaraḥ ।
anayā saṃvṛtō gatvā yōddhā'haṃ tairniśācharaiḥ ॥ 3 ॥
imē śūrāścha vikrāntā bhṛtyā mē'straviśāradāḥ ।
yōgyā rakṣōgaṇairyōddhuṃ na rāmaṃ nētumarhasi ॥ 4 ॥
ahamēva dhanuṣpāṇirgōptā samaramūrdhani ।
yāvatprāṇāndhariṣyāmi tāvadyōtsyē niśācharaiḥ ॥ 5 ॥
nirvighnā vratacharyā sā bhaviṣyati surakṣitā ।
ahaṃ tatrāgamiṣyāmi na rāmaṃ nētumarhasi ॥ 6 ॥
bālō hyakṛtavidyaścha na cha vētti balābalam ।
na chāstrabalasaṃyuktō na cha yuddhaviśāradaḥ ॥ 7 ॥
na chāsau rakṣasāṃ yōgyaḥ kūṭayuddhā hi tē dhruvam ।
viprayuktō hi rāmēṇa muhūrtamapi nōtsahē ॥ 8 ॥
jīvituṃ muniśārdūla na rāmaṃ nētumarhasi ।
yadi vā rāghavaṃ brahmannētumichChasi suvrata ॥ 9 ॥
chaturaṅgasamāyuktaṃ mayā cha sahitaṃ naya ।
ṣaṣṭirvarṣasahasrāṇi jātasya mama kauśika ॥ 10 ॥
duḥkhēnōtpāditaśchāyaṃ na rāmaṃ nētumarhasi ।
chaturṇāmātmajānāṃ hi prītiḥparamikā mama ॥ 11 ॥
jyēṣṭhaṃ dharmapradhānaṃ cha na rāmaṃ nētumarhasi ।
kiṃvīryā rākṣasāstē cha kasya putrāścha tē cha kē ॥ 12 ॥
kathaṃ pramāṇāḥ kē chaitānrakṣanti munipuṅgava ।
kathaṃ cha pratikartavyaṃ tēṣāṃ rāmēṇa rakṣasām ॥ 13 ॥
māmakairvā balairbrahmanmayā vā kūṭayōdhinām ।
3 sarvaṃ mē śaṃsa bhagavankathaṃ tēṣāṃ mayā raṇē ॥ 14 ॥
sthātavyaṃ duṣṭabhāvānāṃ vīryōtsiktā hi rākṣasāḥ ।
4 tasya tadvachanaṃ śrutvā viśvāmitrō'bhyabhāṣata ॥ 15 ॥
paulastyavaṃśaprabhavō rāvaṇō nāma rākṣasaḥ ।
sa brahmaṇā dattavarastrailōkyaṃ bādhatē bhṛśam ॥ 16 ॥
mahābalō mahāvīryō rākṣasairbahubhirvṛtaḥ ।
śrūyatē hi mahāvīryō rāvaṇō rākṣasādhipaḥ ॥ 17 ॥
sākṣādvaiśravaṇabhrātā putrō viśravasō munēḥ ।
yadā svayaṃ na yajñasya vighnakartā mahābalaḥ ॥ 18 ॥
tēna sañchōditau dvau tu rākṣasau vai mahābalau ।
mārīchaścha subāhuścha yajñavighnaṃ kariṣyataḥ ॥ 19 ॥
ityuktō muninā tēna rājōvācha muniṃ tadā ।
na hi śaktō'smi saṅgrāmē sthātuṃ tasya durātmanaḥ ॥ 20 ॥
sa tvaṃ prasādaṃ dharmajña kuruṣva mama putrakē ।
mama chaivālpabhāgyasya daivataṃ hi bhavānguruḥ ॥ 21 ॥
dēvadānavagandharvā yakṣāḥpatagapannagāḥ ।
na śaktā rāvaṇaṃ sōḍhuṃ kiṃ punarmānavā yudhi ॥ 22 ॥
sa hi vīryavatāṃ vīryamādattē yudhi rākṣasaḥ ।
tēna chāhaṃ na śaktō'smi saṃyōddhuṃ tasya vā balaiḥ ॥ 23 ॥
sabalō vā muniśrēṣṭha sahitō vā mamātmajaiḥ ।
kathamapyamaraprakhyaṃ saṅgrāmāṇāmakōvidam ।
bālaṃ mē tanayaṃ brahman naiva dāsyāmi putrakam ॥ 24 ॥
atha kālōpamau yudhdē sutau sundōpasundayōḥ ॥ 25 ॥
yajñavighnakarau tau tē naiva dāsyāmi putrakam ।
mārīchaścha subāhuścha vīryavantau suśikṣitau ।
tayōranyatarēṇāhaṃ yōdhdā syāṃ sasuhṛdgaṇaḥ ॥ 26 ॥
iti narapatijalpanāddvijēndraṃ kuśikasutaṃ sumahānvivēśa manyuḥ ।
suhuta iva makhē'gnirājyasikta ssamabhavadujjvalitō maharṣivahniḥ ॥ 27 ॥
ityārṣē śrīmadrāmāyaṇē vālmīkīya ādikāvyē bālakāṇḍē viṃśassargaḥ ॥
