ശ്രീമദ്വാല്മീകീയ രാമായണേ ബാലകാംഡമ് ।
അഥ വിംശസ്സര്ഗഃ ।
തച്ഛ്രുത്വാ രാജശാര്ദൂലോ വിശ്വാമിത്രസ്യ ഭാഷിതമ് ।
മുഹൂര്തമിവ നിസ്സംജ്ഞസ്സംജ്ഞാവാനിദമബ്രവീത് ॥ 1 ॥
ഊനഷോഡശവര്ഷോ മേ രാമോ രാജീവലോചനഃ ।
ന യുദ്ധയോഗ്യതാമസ്യ പശ്യാമി സഹ രാക്ഷസൈഃ ॥ 2 ॥
ഇയമക്ഷൌഹിണീ പൂര്ണാ യസ്യാഹം പതിരീശ്വരഃ ।
അനയാ സംവൃതോ ഗത്വാ യോദ്ധാഽഹം തൈര്നിശാചരൈഃ ॥ 3 ॥
ഇമേ ശൂരാശ്ച വിക്രാംതാ ഭൃത്യാ മേഽസ്ത്രവിശാരദാഃ ।
യോഗ്യാ രക്ഷോഗണൈര്യോദ്ധും ന രാമം നേതുമര്ഹസി ॥ 4 ॥
അഹമേവ ധനുഷ്പാണിര്ഗോപ്താ സമരമൂര്ധനി ।
യാവത്പ്രാണാംധരിഷ്യാമി താവദ്യോത്സ്യേ നിശാചരൈഃ ॥ 5 ॥
നിർവിഘ്നാ വ്രതചര്യാ സാ ഭവിഷ്യതി സുരക്ഷിതാ ।
അഹം തത്രാഗമിഷ്യാമി ന രാമം നേതുമര്ഹസി ॥ 6 ॥
ബാലോ ഹ്യകൃതവിദ്യശ്ച ന ച വേത്തി ബലാബലമ് ।
ന ചാസ്ത്രബലസംയുക്തോ ന ച യുദ്ധവിശാരദഃ ॥ 7 ॥
ന ചാസൌ രക്ഷസാം യോഗ്യഃ കൂടയുദ്ധാ ഹി തേ ധ്രുവമ് ।
വിപ്രയുക്തോ ഹി രാമേണ മുഹൂര്തമപി നോത്സഹേ ॥ 8 ॥
ജീവിതും മുനിശാര്ദൂല ന രാമം നേതുമര്ഹസി ।
യദി വാ രാഘവം ബ്രഹ്മന്നേതുമിച്ഛസി സുവ്രത ॥ 9 ॥
ചതുരംഗസമായുക്തം മയാ ച സഹിതം നയ ।
ഷഷ്ടിർവര്ഷസഹസ്രാണി ജാതസ്യ മമ കൌശിക ॥ 10 ॥
ദുഃഖേനോത്പാദിതശ്ചായം ന രാമം നേതുമര്ഹസി ।
ചതുര്ണാമാത്മജാനാം ഹി പ്രീതിഃപരമികാ മമ ॥ 11 ॥
ജ്യേഷ്ഠം ധര്മപ്രധാനം ച ന രാമം നേതുമര്ഹസി ।
കിംവീര്യാ രാക്ഷസാസ്തേ ച കസ്യ പുത്രാശ്ച തേ ച കേ ॥ 12 ॥
കഥം പ്രമാണാഃ കേ ചൈതാന്രക്ഷംതി മുനിപുംഗവ ।
കഥം ച പ്രതികര്തവ്യം തേഷാം രാമേണ രക്ഷസാമ് ॥ 13 ॥
മാമകൈർവാ ബലൈര്ബ്രഹ്മന്മയാ വാ കൂടയോധിനാമ് ।
3 സർവം മേ ശംസ ഭഗവന്കഥം തേഷാം മയാ രണേ ॥ 14 ॥
സ്ഥാതവ്യം ദുഷ്ടഭാവാനാം വീര്യോത്സിക്താ ഹി രാക്ഷസാഃ ।
4 തസ്യ തദ്വചനം ശ്രുത്വാ വിശ്വാമിത്രോഽഭ്യഭാഷത ॥ 15 ॥
പൌലസ്ത്യവംശപ്രഭവോ രാവണോ നാമ രാക്ഷസഃ ।
സ ബ്രഹ്മണാ ദത്തവരസ്ത്രൈലോക്യം ബാധതേ ഭൃശമ് ॥ 16 ॥
മഹാബലോ മഹാവീര്യോ രാക്ഷസൈര്ബഹുഭിർവൃതഃ ।
ശ്രൂയതേ ഹി മഹാവീര്യോ രാവണോ രാക്ഷസാധിപഃ ॥ 17 ॥
സാക്ഷാദ്വൈശ്രവണഭ്രാതാ പുത്രോ വിശ്രവസോ മുനേഃ ।
യദാ സ്വയം ന യജ്ഞസ്യ വിഘ്നകര്താ മഹാബലഃ ॥ 18 ॥
തേന സംചോദിതൌ ദ്വൌ തു രാക്ഷസൌ വൈ മഹാബലൌ ।
മാരീചശ്ച സുബാഹുശ്ച യജ്ഞവിഘ്നം കരിഷ്യതഃ ॥ 19 ॥
ഇത്യുക്തോ മുനിനാ തേന രാജോവാച മുനിം തദാ ।
ന ഹി ശക്തോഽസ്മി സംഗ്രാമേ സ്ഥാതും തസ്യ ദുരാത്മനഃ ॥ 20 ॥
സ ത്വം പ്രസാദം ധര്മജ്ഞ കുരുഷ്വ മമ പുത്രകേ ।
മമ ചൈവാല്പഭാഗ്യസ്യ ദൈവതം ഹി ഭവാന്ഗുരുഃ ॥ 21 ॥
ദേവദാനവഗംധർവാ യക്ഷാഃപതഗപന്നഗാഃ ।
ന ശക്താ രാവണം സോഢും കിം പുനര്മാനവാ യുധി ॥ 22 ॥
സ ഹി വീര്യവതാം വീര്യമാദത്തേ യുധി രാക്ഷസഃ ।
തേന ചാഹം ന ശക്തോഽസ്മി സംയോദ്ധും തസ്യ വാ ബലൈഃ ॥ 23 ॥
സബലോ വാ മുനിശ്രേഷ്ഠ സഹിതോ വാ മമാത്മജൈഃ ।
കഥമപ്യമരപ്രഖ്യം സംഗ്രാമാണാമകോവിദമ് ।
ബാലം മേ തനയം ബ്രഹ്മന് നൈവ ദാസ്യാമി പുത്രകമ് ॥ 24 ॥
അഥ കാലോപമൌ യുധ്ദേ സുതൌ സുംദോപസുംദയോഃ ॥ 25 ॥
യജ്ഞവിഘ്നകരൌ തൌ തേ നൈവ ദാസ്യാമി പുത്രകമ് ।
മാരീചശ്ച സുബാഹുശ്ച വീര്യവംതൌ സുശിക്ഷിതൌ ।
തയോരന്യതരേണാഹം യോധ്ദാ സ്യാം സസുഹൃദ്ഗണഃ ॥ 26 ॥
ഇതി നരപതിജല്പനാദ്ദ്വിജേംദ്രം കുശികസുതം സുമഹാന്വിവേശ മന്യുഃ ।
സുഹുത ഇവ മഖേഽഗ്നിരാജ്യസിക്ത സ്സമഭവദുജ്ജ്വലിതോ മഹര്ഷിവഹ്നിഃ ॥ 27 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ വിംശസ്സര്ഗഃ ॥
