ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ତ୍ରିଂଶସ୍ସର୍ଗଃ ।
ଅଥ ତୌ ଦେଶକାଲଜ୍ଞୌ ରାଜାପୁତ୍ରାଵରିଂଦମୌ ।
ଦେଶେ କାଲେ ଚ ଵାକ୍ୟଜ୍ଞାଵବ୍ରୂତାଂ କୌଶିକଂ ଵଚଃ ॥ 1 ॥
ଭଗଵନ୍ ଶ୍ରୋତୁମିଚ୍ଛାଵୋ ୟସ୍ମିନ୍ କାଲେ ନିଶାଚରୌ ।
ସଂରକ୍ଷଣୀୟୌ ତୌ ବ୍ରହ୍ମନ୍ନାତିଵର୍ତେତ ତତ୍କ୍ଷଣମ୍ ॥ 2 ॥
ଏଵଂ ବ୍ରୁଵାଣୌ କାକୁତ୍ସ୍ଥୌ ତ୍ଵରମାଣୌ ୟୁୟୁତ୍ସୟା ।
ସର୍ଵେ ତେ ମୁନୟଃ ପ୍ରୀତାଃ ପ୍ରଶଶଂସୁର୍ନୃପାତ୍ମଜୌ ॥ 3 ॥
ଅଦ୍ୟପ୍ରଭୃତି ଷଡ୍ରାତ୍ରଂ ରକ୍ଷତଂ ରାଘଵୌ ୟୁଵାମ୍ ।
ଦୀକ୍ଷାଂ ଗତୋ ହ୍ୟେଷ ମୁନିର୍ମୌନିତ୍ଵଂ ଚ ଗମିଷ୍ୟତି ॥ 4 ॥
ତୌ ତୁ ତଦ୍ଵଚନଂ ଶ୍ରୁତ୍ଵା ରାଜପୁତ୍ରୌ ୟଶସ୍ଵିନୌ ।
ଅନିଦ୍ରୌ ଷଡହୋରାତ୍ରଂ ତପୋଵନମରକ୍ଷତାମ୍ ॥ 5 ॥
ଉପାସାଂଚକ୍ରତୁର୍ଵୀରୌ ୟତ୍ତୌ ପରମଧନ୍ଵିନୌ ।
ରରକ୍ଷତୁର୍ମୁନିଵରଂ ଵିଶ୍ଵାମିତ୍ରମରିଂଦମୌ ॥ 6 ॥
ଅଥ କାଲେ ଗତେ ତସ୍ମିନ୍ ଷଷ୍ଠେଽହନି ସମାଗତେ ।
ସୌମିତ୍ରିମବ୍ରଵୀଦ୍ରାମୋ ୟତ୍ତୋ ଭଵ ସମାହିତଃ ॥ 7 ॥
ରାମସ୍ୟୈଵଂ ବ୍ରୁଵାଣସ୍ୟ ତ୍ଵରିତସ୍ୟ ୟୁୟୁତ୍ସୟା ।
ପ୍ରଜଜ୍ଵାଲ ତତୋ ଵେଦିସ୍ସୋପାଧ୍ୟାୟପୁରୋହିତା ॥ 8 ॥
ସଦର୍ଭଚମସସ୍ରୁକ୍କା ସସମିତ୍କୁସୁମୋଚ୍ଚୟା ।
ଵିଶ୍ଵାମିତ୍ରେଣ ସହିତା ଵେଦିର୍ଜଜ୍ଵାଲ ସର୍ତ୍ଵିଜା ॥ 9 ॥
ମଂତ୍ରଵଚ୍ଚ ୟଥାନ୍ୟାୟଂ ୟଜ୍ଞୋଽସୌ ସଂପ୍ରଵର୍ତତେ ।
ଆକାଶେ ଚ ମହାନ୍ ଶବ୍ଦଃ ପ୍ରାଦୁରାସୀଦ୍ଭୟାନକଃ ॥ 10 ॥
ଆଵାର୍ୟ ଗଗନଂ ମେଘୋ ୟଥା ପ୍ରାଵୃଷି ନିର୍ଗତଃ ।
ତଥାମାୟାଂ ଵିକୁର୍ଵାଣୌ ରାକ୍ଷସାଵଭ୍ୟଧାଵତାମ୍ ॥ 11 ॥
ମାରୀଚଶ୍ଚ ସୁବାହୁଶ୍ଚ ତୟୋରନୁଚରାଶ୍ଚ ୟେ ।
ଆଗମ୍ୟ ଭୀମସଂକାଶା ରୁଧିରୌଘମଵାସୃଜନ୍ ॥ 12 ॥
ସା ତେନ ରୁଧିରୌଘେଣ ଵେଦିର୍ଜଜ୍ଵାଲ ମଂଡିତା ।
ସହସାଽଭିଦ୍ରୁତୋ ରାମସ୍ତାନପଶ୍ୟ ତ୍ତତୋ ଦିଵି ॥ 13 ॥
ତାଵାପତଂତୌ ସହସା ଦୃଷ୍ଟ୍ଵା ରାଜୀଵଲୋଚନଃ ।
ଲକ୍ଷ୍ମଣଂ ତ୍ଵଭିସଂପ୍ରେକ୍ଷ୍ୟ ରାମୋ ଵଚନମବ୍ରଵୀତ୍ ॥ 14 ॥
ପଶ୍ୟ ଲକ୍ଷ୍ମଣ ଦୁର୍ଵୃତ୍ତାନ୍ ରାକ୍ଷସାନ୍ ପିଶିତାଶନାନ୍ ।
ମାନଵାସ୍ତ୍ରସମାଧୂତାନନିଲେନ ୟଥା ଘନାନ୍ ॥ 15 ॥
ମାନଵଂ ପରମୋଦାରମସ୍ତ୍ରଂ ପରମଭାସ୍ଵରମ୍ ।
ଚିକ୍ଷେପ ପରମକ୍ରୁଦ୍ଧୋ ମାରୀଚୋରସି ରାଘଵଃ ॥ 16 ॥
ସ ତେନ ପରମାସ୍ତ୍ରେଣ ମାନଵେନ ସମାହିତଃ ।
ସଂପୂର୍ଣଂ ୟୋଜନଶତଂ କ୍ଷିପ୍ତସ୍ସାଗରସଂପ୍ଲଵେ ॥ 17 ॥
ଵିଚେତନଂ ଵିଘୂର୍ଣଂତଂ ଶୀତେଷୁ ବଲତାଡିତମ୍ ।
ନିରସ୍ତଂ ଦୃଶ୍ୟ ମାରୀଚଂ ରାମୋ ଲକ୍ଷ୍ମଣମବ୍ରଵୀତ୍ ॥ 18 ॥
ପଶ୍ୟ ଲକ୍ଷ୍ମଣ ଶୀତେଷୁଂ ମାନଵଂ ଧର୍ମସଂହିତମ୍ ।
ମୋହୟିତ୍ଵା ନୟତ୍ୟେନଂ ନ ଚ ପ୍ରାଣୈର୍ଵ୍ୟୟୁଜ୍ୟତ ॥ 19 ॥
ଇମାନପି ଵଧିଷ୍ୟାମି ନିର୍ଘୃଣାନ୍ ଦୁଷ୍ଟଚାରିଣଃ ।
ରାକ୍ଷସାନ୍ ପାପକର୍ମସ୍ଥାନ୍ ୟଜ୍ଞଘ୍ନାନ୍ ରୁଧିରାଶନାନ୍ ॥ 20 ॥
ସଂଗୃହ୍ୟାସ୍ତ୍ରଂ ତତୋ ରାମୋ ଦିଵ୍ୟମାଗ୍ନେୟମଦ୍ଭୁତମ୍ ।
ସୁବାହୂରସି ଚିକ୍ଷେପ ସଵିଦ୍ଧଃ ପ୍ରାପତଦ୍ଭୁଵି ॥ 21 ॥
ଶେଷାନ୍ ଵାୟଵ୍ୟମାଦାୟ ନିଜଘାନ ମହାୟଶାଃ ।
ରାଘଵଃ ପରମୋଦାରୋ ମୁନୀନାଂ ମୁଦମାଵହନ୍ ॥ 22 ॥
ସ ହତ୍ଵା ରାକ୍ଷସାନ୍ ସର୍ଵାନ୍ ୟଜ୍ଞଘ୍ନାନ୍ ରଘୁନଂଦନଃ ।
ଋଷିଭିଃ ପୂଜିତସ୍ତତ୍ର ୟଥେଂଦ୍ରୋ ଵିଜୟେ ପୁରା ॥ 23 ॥
ଅଥ ୟଜ୍ଞେ ସମାପ୍ତେ ତୁ ଵିଶ୍ଵାମିତ୍ରୋ ମହାମୁନିଃ ।
ନିରୀତିକା ଦିଶୋ ଦୃଷ୍ଟଵା କାକୁତ୍ସ୍ଥମିଦମବ୍ରଵୀତ୍ ॥ 24 ॥
କୃତାର୍ଥୋଽସ୍ମି ମହାବାହୋ କୃତଂ ଗୁରୁଵଚସ୍ତ୍ଵୟା ।
ସିଦ୍ଧାଶ୍ରମମିଦଂ ସତ୍ୟଂ କୃତଂ ରାମ ମହାୟଶଃ ॥ 25 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ତ୍ରିଂଶସ୍ସର୍ଗଃ ॥
