śrīmadvālmīkīya rāmāyaṇē bālakāṇḍam ।
atha triṃśassargaḥ ।
atha tau dēśakālajñau rājāputrāvarindamau ।
dēśē kālē cha vākyajñāvabrūtāṃ kauśikaṃ vachaḥ ॥ 1 ॥
bhagavan śrōtumichChāvō yasmin kālē niśācharau ।
saṃrakṣaṇīyau tau brahmannātivartēta tatkṣaṇam ॥ 2 ॥
ēvaṃ bruvāṇau kākutsthau tvaramāṇau yuyutsayā ।
sarvē tē munayaḥ prītāḥ praśaśaṃsurnṛpātmajau ॥ 3 ॥
adyaprabhṛti ṣaḍrātraṃ rakṣataṃ rāghavau yuvām ।
dīkṣāṃ gatō hyēṣa munirmaunitvaṃ cha gamiṣyati ॥ 4 ॥
tau tu tadvachanaṃ śrutvā rājaputrau yaśasvinau ।
anidrau ṣaḍahōrātraṃ tapōvanamarakṣatām ॥ 5 ॥
upāsāñchakraturvīrau yattau paramadhanvinau ।
rarakṣaturmunivaraṃ viśvāmitramarindamau ॥ 6 ॥
atha kālē gatē tasmin ṣaṣṭhē'hani samāgatē ।
saumitrimabravīdrāmō yattō bhava samāhitaḥ ॥ 7 ॥
rāmasyaivaṃ bruvāṇasya tvaritasya yuyutsayā ।
prajajvāla tatō vēdissōpādhyāyapurōhitā ॥ 8 ॥
sadarbhachamasasrukkā sasamitkusumōchchayā ।
viśvāmitrēṇa sahitā vēdirjajvāla sartvijā ॥ 9 ॥
mantravachcha yathānyāyaṃ yajñō'sau sampravartatē ।
ākāśē cha mahān śabdaḥ prādurāsīdbhayānakaḥ ॥ 10 ॥
āvārya gaganaṃ mēghō yathā prāvṛṣi nirgataḥ ।
tathāmāyāṃ vikurvāṇau rākṣasāvabhyadhāvatām ॥ 11 ॥
mārīchaścha subāhuścha tayōranucharāścha yē ।
āgamya bhīmasaṅkāśā rudhiraughamavāsṛjan ॥ 12 ॥
sā tēna rudhiraughēṇa vēdirjajvāla maṇḍitā ।
sahasā'bhidrutō rāmastānapaśya ttatō divi ॥ 13 ॥
tāvāpatantau sahasā dṛṣṭvā rājīvalōchanaḥ ।
lakṣmaṇaṃ tvabhisamprēkṣya rāmō vachanamabravīt ॥ 14 ॥
paśya lakṣmaṇa durvṛttān rākṣasān piśitāśanān ।
mānavāstrasamādhūtānanilēna yathā ghanān ॥ 15 ॥
mānavaṃ paramōdāramastraṃ paramabhāsvaram ।
chikṣēpa paramakruddhō mārīchōrasi rāghavaḥ ॥ 16 ॥
sa tēna paramāstrēṇa mānavēna samāhitaḥ ।
sampūrṇaṃ yōjanaśataṃ kṣiptassāgarasamplavē ॥ 17 ॥
vichētanaṃ vighūrṇantaṃ śītēṣu balatāḍitam ।
nirastaṃ dṛśya mārīchaṃ rāmō lakṣmaṇamabravīt ॥ 18 ॥
paśya lakṣmaṇa śītēṣuṃ mānavaṃ dharmasaṃhitam ।
mōhayitvā nayatyēnaṃ na cha prāṇairvyayujyata ॥ 19 ॥
imānapi vadhiṣyāmi nirghṛṇān duṣṭachāriṇaḥ ।
rākṣasān pāpakarmasthān yajñaghnān rudhirāśanān ॥ 20 ॥
saṅgṛhyāstraṃ tatō rāmō divyamāgnēyamadbhutam ।
subāhūrasi chikṣēpa saviddhaḥ prāpatadbhuvi ॥ 21 ॥
śēṣān vāyavyamādāya nijaghāna mahāyaśāḥ ।
rāghavaḥ paramōdārō munīnāṃ mudamāvahan ॥ 22 ॥
sa hatvā rākṣasān sarvān yajñaghnān raghunandanaḥ ।
ṛṣibhiḥ pūjitastatra yathēndrō vijayē purā ॥ 23 ॥
atha yajñē samāptē tu viśvāmitrō mahāmuniḥ ।
nirītikā diśō dṛṣṭavā kākutsthamidamabravīt ॥ 24 ॥
kṛtārthō'smi mahābāhō kṛtaṃ guruvachastvayā ।
siddhāśramamidaṃ satyaṃ kṛtaṃ rāma mahāyaśaḥ ॥ 25 ॥
ityārṣē śrīmadrāmāyaṇē vālmīkīya ādikāvyē bālakāṇḍē triṃśassargaḥ ॥
