શ્રીમદ્વાલ્મીકીય રામાયણે બાલકાંડમ્ ।
અથ ત્રિંશસ્સર્ગઃ ।
અથ તૌ દેશકાલજ્ઞૌ રાજાપુત્રાવરિંદમૌ ।
દેશે કાલે ચ વાક્યજ્ઞાવબ્રૂતાં કૌશિકં વચઃ ॥ 1 ॥
ભગવન્ શ્રોતુમિચ્છાવો યસ્મિન્ કાલે નિશાચરૌ ।
સંરક્ષણીયૌ તૌ બ્રહ્મન્નાતિવર્તેત તત્ક્ષણમ્ ॥ 2 ॥
એવં બ્રુવાણૌ કાકુત્સ્થૌ ત્વરમાણૌ યુયુત્સયા ।
સર્વે તે મુનયઃ પ્રીતાઃ પ્રશશંસુર્નૃપાત્મજૌ ॥ 3 ॥
અદ્યપ્રભૃતિ ષડ્રાત્રં રક્ષતં રાઘવૌ યુવામ્ ।
દીક્ષાં ગતો હ્યેષ મુનિર્મૌનિત્વં ચ ગમિષ્યતિ ॥ 4 ॥
તૌ તુ તદ્વચનં શ્રુત્વા રાજપુત્રૌ યશસ્વિનૌ ।
અનિદ્રૌ ષડહોરાત્રં તપોવનમરક્ષતામ્ ॥ 5 ॥
ઉપાસાંચક્રતુર્વીરૌ યત્તૌ પરમધન્વિનૌ ।
રરક્ષતુર્મુનિવરં વિશ્વામિત્રમરિંદમૌ ॥ 6 ॥
અથ કાલે ગતે તસ્મિન્ ષષ્ઠેઽહનિ સમાગતે ।
સૌમિત્રિમબ્રવીદ્રામો યત્તો ભવ સમાહિતઃ ॥ 7 ॥
રામસ્યૈવં બ્રુવાણસ્ય ત્વરિતસ્ય યુયુત્સયા ।
પ્રજજ્વાલ તતો વેદિસ્સોપાધ્યાયપુરોહિતા ॥ 8 ॥
સદર્ભચમસસ્રુક્કા સસમિત્કુસુમોચ્ચયા ।
વિશ્વામિત્રેણ સહિતા વેદિર્જજ્વાલ સર્ત્વિજા ॥ 9 ॥
મંત્રવચ્ચ યથાન્યાયં યજ્ઞોઽસૌ સંપ્રવર્તતે ।
આકાશે ચ મહાન્ શબ્દઃ પ્રાદુરાસીદ્ભયાનકઃ ॥ 10 ॥
આવાર્ય ગગનં મેઘો યથા પ્રાવૃષિ નિર્ગતઃ ।
તથામાયાં વિકુર્વાણૌ રાક્ષસાવભ્યધાવતામ્ ॥ 11 ॥
મારીચશ્ચ સુબાહુશ્ચ તયોરનુચરાશ્ચ યે ।
આગમ્ય ભીમસંકાશા રુધિરૌઘમવાસૃજન્ ॥ 12 ॥
સા તેન રુધિરૌઘેણ વેદિર્જજ્વાલ મંડિતા ।
સહસાઽભિદ્રુતો રામસ્તાનપશ્ય ત્તતો દિવિ ॥ 13 ॥
તાવાપતંતૌ સહસા દૃષ્ટ્વા રાજીવલોચનઃ ।
લક્ષ્મણં ત્વભિસંપ્રેક્ષ્ય રામો વચનમબ્રવીત્ ॥ 14 ॥
પશ્ય લક્ષ્મણ દુર્વૃત્તાન્ રાક્ષસાન્ પિશિતાશનાન્ ।
માનવાસ્ત્રસમાધૂતાનનિલેન યથા ઘનાન્ ॥ 15 ॥
માનવં પરમોદારમસ્ત્રં પરમભાસ્વરમ્ ।
ચિક્ષેપ પરમક્રુદ્ધો મારીચોરસિ રાઘવઃ ॥ 16 ॥
સ તેન પરમાસ્ત્રેણ માનવેન સમાહિતઃ ।
સંપૂર્ણં યોજનશતં ક્ષિપ્તસ્સાગરસંપ્લવે ॥ 17 ॥
વિચેતનં વિઘૂર્ણંતં શીતેષુ બલતાડિતમ્ ।
નિરસ્તં દૃશ્ય મારીચં રામો લક્ષ્મણમબ્રવીત્ ॥ 18 ॥
પશ્ય લક્ષ્મણ શીતેષું માનવં ધર્મસંહિતમ્ ।
મોહયિત્વા નયત્યેનં ન ચ પ્રાણૈર્વ્યયુજ્યત ॥ 19 ॥
ઇમાનપિ વધિષ્યામિ નિર્ઘૃણાન્ દુષ્ટચારિણઃ ।
રાક્ષસાન્ પાપકર્મસ્થાન્ યજ્ઞઘ્નાન્ રુધિરાશનાન્ ॥ 20 ॥
સંગૃહ્યાસ્ત્રં તતો રામો દિવ્યમાગ્નેયમદ્ભુતમ્ ।
સુબાહૂરસિ ચિક્ષેપ સવિદ્ધઃ પ્રાપતદ્ભુવિ ॥ 21 ॥
શેષાન્ વાયવ્યમાદાય નિજઘાન મહાયશાઃ ।
રાઘવઃ પરમોદારો મુનીનાં મુદમાવહન્ ॥ 22 ॥
સ હત્વા રાક્ષસાન્ સર્વાન્ યજ્ઞઘ્નાન્ રઘુનંદનઃ ।
ઋષિભિઃ પૂજિતસ્તત્ર યથેંદ્રો વિજયે પુરા ॥ 23 ॥
અથ યજ્ઞે સમાપ્તે તુ વિશ્વામિત્રો મહામુનિઃ ।
નિરીતિકા દિશો દૃષ્ટવા કાકુત્સ્થમિદમબ્રવીત્ ॥ 24 ॥
કૃતાર્થોઽસ્મિ મહાબાહો કૃતં ગુરુવચસ્ત્વયા ।
સિદ્ધાશ્રમમિદં સત્યં કૃતં રામ મહાયશઃ ॥ 25 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે ત્રિંશસ્સર્ગઃ ॥
