ശ്രീമദ്വാല്മീകീയ രാമായണേ ബാലകാംഡമ് ।
അഥ ത്രിംശസ്സര്ഗഃ ।
അഥ തൌ ദേശകാലജ്ഞൌ രാജാപുത്രാവരിംദമൌ ।
ദേശേ കാലേ ച വാക്യജ്ഞാവബ്രൂതാം കൌശികം വചഃ ॥ 1 ॥
ഭഗവന് ശ്രോതുമിച്ഛാവോ യസ്മിന് കാലേ നിശാചരൌ ।
സംരക്ഷണീയൌ തൌ ബ്രഹ്മന്നാതിവര്തേത തത്ക്ഷണമ് ॥ 2 ॥
ഏവം ബ്രുവാണൌ കാകുത്സ്ഥൌ ത്വരമാണൌ യുയുത്സയാ ।
സർവേ തേ മുനയഃ പ്രീതാഃ പ്രശശംസുര്നൃപാത്മജൌ ॥ 3 ॥
അദ്യപ്രഭൃതി ഷഡ്രാത്രം രക്ഷതം രാഘവൌ യുവാമ് ।
ദീക്ഷാം ഗതോ ഹ്യേഷ മുനിര്മൌനിത്വം ച ഗമിഷ്യതി ॥ 4 ॥
തൌ തു തദ്വചനം ശ്രുത്വാ രാജപുത്രൌ യശസ്വിനൌ ।
അനിദ്രൌ ഷഡഹോരാത്രം തപോവനമരക്ഷതാമ് ॥ 5 ॥
ഉപാസാംചക്രതുർവീരൌ യത്തൌ പരമധന്വിനൌ ।
രരക്ഷതുര്മുനിവരം വിശ്വാമിത്രമരിംദമൌ ॥ 6 ॥
അഥ കാലേ ഗതേ തസ്മിന് ഷഷ്ഠേഽഹനി സമാഗതേ ।
സൌമിത്രിമബ്രവീദ്രാമോ യത്തോ ഭവ സമാഹിതഃ ॥ 7 ॥
രാമസ്യൈവം ബ്രുവാണസ്യ ത്വരിതസ്യ യുയുത്സയാ ।
പ്രജജ്വാല തതോ വേദിസ്സോപാധ്യായപുരോഹിതാ ॥ 8 ॥
സദര്ഭചമസസ്രുക്കാ സസമിത്കുസുമോച്ചയാ ।
വിശ്വാമിത്രേണ സഹിതാ വേദിര്ജജ്വാല സര്ത്വിജാ ॥ 9 ॥
മംത്രവച്ച യഥാന്യായം യജ്ഞോഽസൌ സംപ്രവര്തതേ ।
ആകാശേ ച മഹാന് ശബ്ദഃ പ്രാദുരാസീദ്ഭയാനകഃ ॥ 10 ॥
ആവാര്യ ഗഗനം മേഘോ യഥാ പ്രാവൃഷി നിര്ഗതഃ ।
തഥാമായാം വികുർവാണൌ രാക്ഷസാവഭ്യധാവതാമ് ॥ 11 ॥
മാരീചശ്ച സുബാഹുശ്ച തയോരനുചരാശ്ച യേ ।
ആഗമ്യ ഭീമസംകാശാ രുധിരൌഘമവാസൃജന് ॥ 12 ॥
സാ തേന രുധിരൌഘേണ വേദിര്ജജ്വാല മംഡിതാ ।
സഹസാഽഭിദ്രുതോ രാമസ്താനപശ്യ ത്തതോ ദിവി ॥ 13 ॥
താവാപതംതൌ സഹസാ ദൃഷ്ട്വാ രാജീവലോചനഃ ।
ലക്ഷ്മണം ത്വഭിസംപ്രേക്ഷ്യ രാമോ വചനമബ്രവീത് ॥ 14 ॥
പശ്യ ലക്ഷ്മണ ദുർവൃത്താന് രാക്ഷസാന് പിശിതാശനാന് ।
മാനവാസ്ത്രസമാധൂതാനനിലേന യഥാ ഘനാന് ॥ 15 ॥
മാനവം പരമോദാരമസ്ത്രം പരമഭാസ്വരമ് ।
ചിക്ഷേപ പരമക്രുദ്ധോ മാരീചോരസി രാഘവഃ ॥ 16 ॥
സ തേന പരമാസ്ത്രേണ മാനവേന സമാഹിതഃ ।
സംപൂര്ണം യോജനശതം ക്ഷിപ്തസ്സാഗരസംപ്ലവേ ॥ 17 ॥
വിചേതനം വിഘൂര്ണംതം ശീതേഷു ബലതാഡിതമ് ।
നിരസ്തം ദൃശ്യ മാരീചം രാമോ ലക്ഷ്മണമബ്രവീത് ॥ 18 ॥
പശ്യ ലക്ഷ്മണ ശീതേഷും മാനവം ധര്മസംഹിതമ് ।
മോഹയിത്വാ നയത്യേനം ന ച പ്രാണൈർവ്യയുജ്യത ॥ 19 ॥
ഇമാനപി വധിഷ്യാമി നിര്ഘൃണാന് ദുഷ്ടചാരിണഃ ।
രാക്ഷസാന് പാപകര്മസ്ഥാന് യജ്ഞഘ്നാന് രുധിരാശനാന് ॥ 20 ॥
സംഗൃഹ്യാസ്ത്രം തതോ രാമോ ദിവ്യമാഗ്നേയമദ്ഭുതമ് ।
സുബാഹൂരസി ചിക്ഷേപ സവിദ്ധഃ പ്രാപതദ്ഭുവി ॥ 21 ॥
ശേഷാന് വായവ്യമാദായ നിജഘാന മഹായശാഃ ।
രാഘവഃ പരമോദാരോ മുനീനാം മുദമാവഹന് ॥ 22 ॥
സ ഹത്വാ രാക്ഷസാന് സർവാന് യജ്ഞഘ്നാന് രഘുനംദനഃ ।
ഋഷിഭിഃ പൂജിതസ്തത്ര യഥേംദ്രോ വിജയേ പുരാ ॥ 23 ॥
അഥ യജ്ഞേ സമാപ്തേ തു വിശ്വാമിത്രോ മഹാമുനിഃ ।
നിരീതികാ ദിശോ ദൃഷ്ടവാ കാകുത്സ്ഥമിദമബ്രവീത് ॥ 24 ॥
കൃതാര്ഥോഽസ്മി മഹാബാഹോ കൃതം ഗുരുവചസ്ത്വയാ ।
സിദ്ധാശ്രമമിദം സത്യം കൃതം രാമ മഹായശഃ ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ത്രിംശസ്സര്ഗഃ ॥
