ශ්රීමද්වාල්මීකීය රාමායණේ බාලකාංඩම් ।
අථ ත්රිංශස්සර්ගඃ ।
අථ තෞ දේශකාලජ්ඤෞ රාජාපුත්රාවරිංදමෞ ।
දේශේ කාලේ ච වාක්යජ්ඤාවබ්රූතාං කෞශිකං වචඃ ॥ 1 ॥
භගවන් ශ්රෝතුමිච්ඡාවෝ යස්මින් කාලේ නිශාචරෞ ।
සංරක්ෂණීයෞ තෞ බ්රහ්මන්නාතිවර්තේත තත්ක්ෂණම් ॥ 2 ॥
ඒවං බ්රුවාණෞ කාකුත්ස්ථෞ ත්වරමාණෞ යුයුත්සයා ।
සර්වේ තේ මුනයඃ ප්රීතාඃ ප්රශශංසුර්නෘපාත්මජෞ ॥ 3 ॥
අද්යප්රභෘති ෂඩ්රාත්රං රක්ෂතං රාඝවෞ යුවාම් ।
දීක්ෂාං ගතෝ හ්යේෂ මුනිර්මෞනිත්වං ච ගමිෂ්යති ॥ 4 ॥
තෞ තු තද්වචනං ශ්රුත්වා රාජපුත්රෞ යශස්විනෞ ।
අනිද්රෞ ෂඩහෝරාත්රං තපෝවනමරක්ෂතාම් ॥ 5 ॥
උපාසාංචක්රතුර්වීරෞ යත්තෞ පරමධන්විනෞ ।
රරක්ෂතුර්මුනිවරං විශ්වාමිත්රමරිංදමෞ ॥ 6 ॥
අථ කාලේ ගතේ තස්මින් ෂෂ්ඨේऽහනි සමාගතේ ।
සෞමිත්රිමබ්රවීද්රාමෝ යත්තෝ භව සමාහිතඃ ॥ 7 ॥
රාමස්යෛවං බ්රුවාණස්ය ත්වරිතස්ය යුයුත්සයා ।
ප්රජජ්වාල තතෝ වේදිස්සෝපාධ්යායපුරෝහිතා ॥ 8 ॥
සදර්භචමසස්රුක්කා සසමිත්කුසුමෝච්චයා ।
විශ්වාමිත්රේණ සහිතා වේදිර්ජජ්වාල සර්ත්විජා ॥ 9 ॥
මංත්රවච්ච යථාන්යායං යජ්ඤෝऽසෞ සංප්රවර්තතේ ।
ආකාශේ ච මහාන් ශබ්දඃ ප්රාදුරාසීද්භයානකඃ ॥ 10 ॥
ආවාර්ය ගගනං මේඝෝ යථා ප්රාවෘෂි නිර්ගතඃ ।
තථාමායාං විකුර්වාණෞ රාක්ෂසාවභ්යධාවතාම් ॥ 11 ॥
මාරීචශ්ච සුබාහුශ්ච තයෝරනුචරාශ්ච යේ ।
ආගම්ය භීමසංකාශා රුධිරෞඝමවාසෘජන් ॥ 12 ॥
සා තේන රුධිරෞඝේණ වේදිර්ජජ්වාල මංඩිතා ।
සහසාऽභිද්රුතෝ රාමස්තානපශ්ය ත්තතෝ දිවි ॥ 13 ॥
තාවාපතංතෞ සහසා දෘෂ්ට්වා රාජීවලෝචනඃ ।
ලක්ෂ්මණං ත්වභිසංප්රේක්ෂ්ය රාමෝ වචනමබ්රවීත් ॥ 14 ॥
පශ්ය ලක්ෂ්මණ දුර්වෘත්තාන් රාක්ෂසාන් පිශිතාශනාන් ।
මානවාස්ත්රසමාධූතානනිලේන යථා ඝනාන් ॥ 15 ॥
මානවං පරමෝදාරමස්ත්රං පරමභාස්වරම් ।
චික්ෂේප පරමක්රුද්ධෝ මාරීචෝරසි රාඝවඃ ॥ 16 ॥
ස තේන පරමාස්ත්රේණ මානවේන සමාහිතඃ ।
සංපූර්ණං යෝජනශතං ක්ෂිප්තස්සාගරසංප්ලවේ ॥ 17 ॥
විචේතනං විඝූර්ණංතං ශීතේෂු බලතාඩිතම් ।
නිරස්තං දෘශ්ය මාරීචං රාමෝ ලක්ෂ්මණමබ්රවීත් ॥ 18 ॥
පශ්ය ලක්ෂ්මණ ශීතේෂුං මානවං ධර්මසංහිතම් ।
මෝහයිත්වා නයත්යේනං න ච ප්රාණෛර්ව්යයුජ්යත ॥ 19 ॥
ඉමානපි වධිෂ්යාමි නිර්ඝෘණාන් දුෂ්ටචාරිණඃ ।
රාක්ෂසාන් පාපකර්මස්ථාන් යජ්ඤඝ්නාන් රුධිරාශනාන් ॥ 20 ॥
සංගෘහ්යාස්ත්රං තතෝ රාමෝ දිව්යමාග්නේයමද්භුතම් ।
සුබාහූරසි චික්ෂේප සවිද්ධඃ ප්රාපතද්භුවි ॥ 21 ॥
ශේෂාන් වායව්යමාදාය නිජඝාන මහායශාඃ ।
රාඝවඃ පරමෝදාරෝ මුනීනාං මුදමාවහන් ॥ 22 ॥
ස හත්වා රාක්ෂසාන් සර්වාන් යජ්ඤඝ්නාන් රඝුනංදනඃ ।
ඍෂිභිඃ පූජිතස්තත්ර යථේංද්රෝ විජයේ පුරා ॥ 23 ॥
අථ යජ්ඤේ සමාප්තේ තු විශ්වාමිත්රෝ මහාමුනිඃ ।
නිරීතිකා දිශෝ දෘෂ්ටවා කාකුත්ස්ථමිදමබ්රවීත් ॥ 24 ॥
කෘතාර්ථෝऽස්මි මහාබාහෝ කෘතං ගුරුවචස්ත්වයා ।
සිද්ධාශ්රමමිදං සත්යං කෘතං රාම මහායශඃ ॥ 25 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ත්රිංශස්සර්ගඃ ॥
