ශ්රීමද්වාල්මීකීය රාමායණේ බාලකාංඩම් ।
අථ ඒකචත්වාරිංශස්සර්ගඃ ।
පුත්රාංශ්චිරගතාන් ජ්ඤාත්වා සගරෝ රඝුනංදන ।
නප්තාරමබ්රවීද්රාජා දීප්යමානං ස්වතේජසා ॥ 1 ॥
ශූරශ්ච කෘතවිද්යශ්ච පූර්වෛස්තුල්යෝऽසි තේජසා ।
පිතෘණාං ගතිමන්විච්ඡ යේන චාශ්වෝऽපවාහිතඃ ॥ 2 ॥
අංතර්භෞමානි සත්ත්වානි වීර්යවංති මහාංති ච ।
තේෂාං ත්වං ප්රතිඝාතාර්ථං සාස්ත්රං ගෘහ්ණීෂ්ව කාර්මුකම් ॥ 3 ॥
අභිවාද්යාභිවාද්යාංස්ත්වං හත්වා විඝ්නකරානපි ।
සිද්ධාර්ථස්සන්නිවර්තස්ව මම යජ්ඤස්ය පාරගඃ ॥ 4 ॥
ඒවමුක්තෝංऽශුමාන්සම්යක් සගරේණ මහාත්මනා ।
ධනුරාදාය ඛඩ්ගං ච ජගාම ලඝුවික්රමඃ ॥ 5 ॥
ස ඛාතං පිතෘභිර්මාර්ගමංතර්භෞමං මහාත්මභිඃ ।
ප්රාපද්යත නරශ්රේෂ්ඨ තේන රාජ්ඤාऽභිචෝදිතඃ ॥ 6 ॥
දෛත්යදානවරක්ෂෝභිඃ පිශාචපතගෝරගෛඃ ।
පූජ්යමානං මහාතේජා දිශාගජමපශ්යත ॥ 7 ॥
ස තං ප්රදක්ෂිණං කෘත්වා පෘෂ්ට්වා චාපි නිරාමයම් ।
පිතෘන් ස පරිපප්රච්ඡ වාජිහර්තාරමේව ච ॥ 8 ॥
දිශාගජස්තු තච්ඡ්රුත්වා ප්රත්යාහාංශුමතෝ වචඃ ।
ආසමංජ කෘතාර්ථස්ත්වං සහාශ්වශ්ශීඝ්රමේෂ්යසි ॥ 9 ॥
තස්ය තද්වචනං ශ්රුත්වා සර්වානේව දිශාගජාන් ।
යථාක්රමං යථාන්යායං ප්රෂ්ටුං සමුපචක්රමේ ॥ 10 ॥
තෛශ්ච සර්වෛර්දිශාපාලෛර්වාක්යජ්ඤෛර්වාක්යකෝවිදෛඃ ।
පූජිතස්සහයශ්චෛව ගංතාऽසීත්යභිචෝදිතඃ ॥ 11 ॥
තේෂාං තද්වචනං ශ්රුත්වා ජගාම ලඝුවික්රමඃ ।
භස්මරාශීකෘතා යත්ර පිතරස්තස්ය සාගරාඃ ॥ 12 ॥
ස දුඃඛවශමාපන්නස්ත්වසමංජසුතස්තදා ।
චුක්රෝශ පරමාර්තස්තු වධාත්තේෂාං සුදුඃඛිතඃ ॥ 13 ॥
යජ්ඤීයං ච හයං තත්ර චරංතමවිදූරතඃ ।
දදර්ශ පුරුෂව්යාඝ්රෝ දුඃඛශෝකසමන්විතඃ ॥ 14 ॥
ස තේෂාං රාජපුත්රාණාං කර්තුකාමෝ ජලක්රියාම් ।
සලිලාර්ථී මහාතේජා න චාපශ්යජ්ජලාශයම් ॥ 15 ॥
විසාර්ය නිපුණාං දෘෂ්ටිං තතෝऽපශ්යත්ඛගාධිපම් ।
පිතෘණාං මාතුලං රාම සුපර්ණමනිලෝපමම් ॥ 16 ॥
ස චෛවමබ්රවීද්වාක්යං වෛනතේයෝ මහාබල ඃ ।
මා ශුචඃ පුරුෂව්යාඝ්ර වධෝऽයං ලෝකසම්මතඃ ॥ 17 ॥
කපිලේනාප්රමේයේන දග්ධා හීමේ මහාබලාඃ ।
සලිලං නාර්හසි ප්රාජ්ඤ දාතුමේෂාං හි ලෞකිකම් ॥ 18 ॥
ගංගා හිමවතෝ ජ්යේෂ්ඨා දුහිතා පුරුෂර්ෂභ ।
තස්යාං කුරු මහාබාහෝ පිතෘණාං තු ජලක්රියාම් ॥ 19 ॥
භස්මරාශීකෘතානේතාන් ප්ලාවයේල්ලෝකපාවනී ।
තයා ක්ලින්නමිදං භස්ම ගංගයා ලෝකකාංතයා ॥ 20 ॥
ෂෂ්ටිං පුත්රසහස්රාණි ස්වර්ගලෝකං ච නේෂ්යති ।
ගච්ඡ චාශ්වං මහාභාග තං ගෘහ්ය පුරුෂර්ෂභ ॥ 21 ॥
යජ්ඤං පෛතාමහං වීර සංවර්තයිතුමර්හසි ।
සුපර්ණවචනං ශ්රුත්වා සෝංऽශුමානතිවීර්යවාන් ॥ 22 ॥
ත්වරිතං හයමාදාය පුනරායාන්මහායශාඃ ।
තතෝ රාජානමාසාද්ය දීක්ෂිතං රඝුනංදන ॥ 23 ॥
න්යවේදයද්යථාවෘත්තං සුපර්ණවචනං තථා ।
තච්ඡ්රුත්වා ඝෝරසංකාශං වාක්යමංශුමතෝ නෘපඃ ॥ 24 ॥
යජ්ඤං නිවර්තයාමාස යථාකල්පං යථාවිධි ।
ස්වපුරං චාගමච්ඡ්රීමානිෂ්ටයජ්ඤෝමහීපතිඃ ॥ 25 ॥
ගංගායාශ්චාගමේ රාජා නිශ්චයං නාධ්යගච්ඡත ।
අකෘත්වා නිශ්චයං රාජා කාලේන මහතා මහාන් ।
ත්රිංශද්වර්ෂසහස්රාණි රාජ්යං කෘත්වා දිවං ගතඃ ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ඒකචත්වාරිංශස්සර්ගඃ ॥
