ശ്രീമദ്വാല്മീകീയ രാമായണേ ബാലകാംഡമ് ।
അഥ ഏകചത്വാരിംശസ്സര്ഗഃ ।
പുത്രാംശ്ചിരഗതാന് ജ്ഞാത്വാ സഗരോ രഘുനംദന ।
നപ്താരമബ്രവീദ്രാജാ ദീപ്യമാനം സ്വതേജസാ ॥ 1 ॥
ശൂരശ്ച കൃതവിദ്യശ്ച പൂർവൈസ്തുല്യോഽസി തേജസാ ।
പിതൃണാം ഗതിമന്വിച്ഛ യേന ചാശ്വോഽപവാഹിതഃ ॥ 2 ॥
അംതര്ഭൌമാനി സത്ത്വാനി വീര്യവംതി മഹാംതി ച ।
തേഷാം ത്വം പ്രതിഘാതാര്ഥം സാസ്ത്രം ഗൃഹ്ണീഷ്വ കാര്മുകമ് ॥ 3 ॥
അഭിവാദ്യാഭിവാദ്യാംസ്ത്വം ഹത്വാ വിഘ്നകരാനപി ।
സിദ്ധാര്ഥസ്സന്നിവര്തസ്വ മമ യജ്ഞസ്യ പാരഗഃ ॥ 4 ॥
ഏവമുക്തോംഽശുമാന്സമ്യക് സഗരേണ മഹാത്മനാ ।
ധനുരാദായ ഖഡ്ഗം ച ജഗാമ ലഘുവിക്രമഃ ॥ 5 ॥
സ ഖാതം പിതൃഭിര്മാര്ഗമംതര്ഭൌമം മഹാത്മഭിഃ ।
പ്രാപദ്യത നരശ്രേഷ്ഠ തേന രാജ്ഞാഽഭിചോദിതഃ ॥ 6 ॥
ദൈത്യദാനവരക്ഷോഭിഃ പിശാചപതഗോരഗൈഃ ।
പൂജ്യമാനം മഹാതേജാ ദിശാഗജമപശ്യത ॥ 7 ॥
സ തം പ്രദക്ഷിണം കൃത്വാ പൃഷ്ട്വാ ചാപി നിരാമയമ് ।
പിതൃന് സ പരിപപ്രച്ഛ വാജിഹര്താരമേവ ച ॥ 8 ॥
ദിശാഗജസ്തു തച്ഛ്രുത്വാ പ്രത്യാഹാംശുമതോ വചഃ ।
ആസമംജ കൃതാര്ഥസ്ത്വം സഹാശ്വശ്ശീഘ്രമേഷ്യസി ॥ 9 ॥
തസ്യ തദ്വചനം ശ്രുത്വാ സർവാനേവ ദിശാഗജാന് ।
യഥാക്രമം യഥാന്യായം പ്രഷ്ടും സമുപചക്രമേ ॥ 10 ॥
തൈശ്ച സർവൈര്ദിശാപാലൈർവാക്യജ്ഞൈർവാക്യകോവിദൈഃ ।
പൂജിതസ്സഹയശ്ചൈവ ഗംതാഽസീത്യഭിചോദിതഃ ॥ 11 ॥
തേഷാം തദ്വചനം ശ്രുത്വാ ജഗാമ ലഘുവിക്രമഃ ।
ഭസ്മരാശീകൃതാ യത്ര പിതരസ്തസ്യ സാഗരാഃ ॥ 12 ॥
സ ദുഃഖവശമാപന്നസ്ത്വസമംജസുതസ്തദാ ।
ചുക്രോശ പരമാര്തസ്തു വധാത്തേഷാം സുദുഃഖിതഃ ॥ 13 ॥
യജ്ഞീയം ച ഹയം തത്ര ചരംതമവിദൂരതഃ ।
ദദര്ശ പുരുഷവ്യാഘ്രോ ദുഃഖശോകസമന്വിതഃ ॥ 14 ॥
സ തേഷാം രാജപുത്രാണാം കര്തുകാമോ ജലക്രിയാമ് ।
സലിലാര്ഥീ മഹാതേജാ ന ചാപശ്യജ്ജലാശയമ് ॥ 15 ॥
വിസാര്യ നിപുണാം ദൃഷ്ടിം തതോഽപശ്യത്ഖഗാധിപമ് ।
പിതൃണാം മാതുലം രാമ സുപര്ണമനിലോപമമ് ॥ 16 ॥
സ ചൈവമബ്രവീദ്വാക്യം വൈനതേയോ മഹാബല ഃ ।
മാ ശുചഃ പുരുഷവ്യാഘ്ര വധോഽയം ലോകസമ്മതഃ ॥ 17 ॥
കപിലേനാപ്രമേയേന ദഗ്ധാ ഹീമേ മഹാബലാഃ ।
സലിലം നാര്ഹസി പ്രാജ്ഞ ദാതുമേഷാം ഹി ലൌകികമ് ॥ 18 ॥
ഗംഗാ ഹിമവതോ ജ്യേഷ്ഠാ ദുഹിതാ പുരുഷര്ഷഭ ।
തസ്യാം കുരു മഹാബാഹോ പിതൃണാം തു ജലക്രിയാമ് ॥ 19 ॥
ഭസ്മരാശീകൃതാനേതാന് പ്ലാവയേല്ലോകപാവനീ ।
തയാ ക്ലിന്നമിദം ഭസ്മ ഗംഗയാ ലോകകാംതയാ ॥ 20 ॥
ഷഷ്ടിം പുത്രസഹസ്രാണി സ്വര്ഗലോകം ച നേഷ്യതി ।
ഗച്ഛ ചാശ്വം മഹാഭാഗ തം ഗൃഹ്യ പുരുഷര്ഷഭ ॥ 21 ॥
യജ്ഞം പൈതാമഹം വീര സംവര്തയിതുമര്ഹസി ।
സുപര്ണവചനം ശ്രുത്വാ സോംഽശുമാനതിവീര്യവാന് ॥ 22 ॥
ത്വരിതം ഹയമാദായ പുനരായാന്മഹായശാഃ ।
തതോ രാജാനമാസാദ്യ ദീക്ഷിതം രഘുനംദന ॥ 23 ॥
ന്യവേദയദ്യഥാവൃത്തം സുപര്ണവചനം തഥാ ।
തച്ഛ്രുത്വാ ഘോരസംകാശം വാക്യമംശുമതോ നൃപഃ ॥ 24 ॥
യജ്ഞം നിവര്തയാമാസ യഥാകല്പം യഥാവിധി ।
സ്വപുരം ചാഗമച്ഛ്രീമാനിഷ്ടയജ്ഞോമഹീപതിഃ ॥ 25 ॥
ഗംഗായാശ്ചാഗമേ രാജാ നിശ്ചയം നാധ്യഗച്ഛത ।
അകൃത്വാ നിശ്ചയം രാജാ കാലേന മഹതാ മഹാന് ।
ത്രിംശദ്വര്ഷസഹസ്രാണി രാജ്യം കൃത്വാ ദിവം ഗതഃ ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഏകചത്വാരിംശസ്സര്ഗഃ ॥
