ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଏକଚତ୍ଵାରିଂଶସ୍ସର୍ଗଃ ।
ପୁତ୍ରାଂଶ୍ଚିରଗତାନ୍ ଜ୍ଞାତ୍ଵା ସଗରୋ ରଘୁନଂଦନ ।
ନପ୍ତାରମବ୍ରଵୀଦ୍ରାଜା ଦୀପ୍ୟମାନଂ ସ୍ଵତେଜସା ॥ 1 ॥
ଶୂରଶ୍ଚ କୃତଵିଦ୍ୟଶ୍ଚ ପୂର୍ଵୈସ୍ତୁଲ୍ୟୋଽସି ତେଜସା ।
ପିତୃଣାଂ ଗତିମନ୍ଵିଚ୍ଛ ୟେନ ଚାଶ୍ଵୋଽପଵାହିତଃ ॥ 2 ॥
ଅଂତର୍ଭୌମାନି ସତ୍ତ୍ଵାନି ଵୀର୍ୟଵଂତି ମହାଂତି ଚ ।
ତେଷାଂ ତ୍ଵଂ ପ୍ରତିଘାତାର୍ଥଂ ସାସ୍ତ୍ରଂ ଗୃହ୍ଣୀଷ୍ଵ କାର୍ମୁକମ୍ ॥ 3 ॥
ଅଭିଵାଦ୍ୟାଭିଵାଦ୍ୟାଂସ୍ତ୍ଵଂ ହତ୍ଵା ଵିଘ୍ନକରାନପି ।
ସିଦ୍ଧାର୍ଥସ୍ସନ୍ନିଵର୍ତସ୍ଵ ମମ ୟଜ୍ଞସ୍ୟ ପାରଗଃ ॥ 4 ॥
ଏଵମୁକ୍ତୋଂଽଶୁମାନ୍ସମ୍ୟକ୍ ସଗରେଣ ମହାତ୍ମନା ।
ଧନୁରାଦାୟ ଖଡ୍ଗଂ ଚ ଜଗାମ ଲଘୁଵିକ୍ରମଃ ॥ 5 ॥
ସ ଖାତଂ ପିତୃଭିର୍ମାର୍ଗମଂତର୍ଭୌମଂ ମହାତ୍ମଭିଃ ।
ପ୍ରାପଦ୍ୟତ ନରଶ୍ରେଷ୍ଠ ତେନ ରାଜ୍ଞାଽଭିଚୋଦିତଃ ॥ 6 ॥
ଦୈତ୍ୟଦାନଵରକ୍ଷୋଭିଃ ପିଶାଚପତଗୋରଗୈଃ ।
ପୂଜ୍ୟମାନଂ ମହାତେଜା ଦିଶାଗଜମପଶ୍ୟତ ॥ 7 ॥
ସ ତଂ ପ୍ରଦକ୍ଷିଣଂ କୃତ୍ଵା ପୃଷ୍ଟ୍ଵା ଚାପି ନିରାମୟମ୍ ।
ପିତୃନ୍ ସ ପରିପପ୍ରଚ୍ଛ ଵାଜିହର୍ତାରମେଵ ଚ ॥ 8 ॥
ଦିଶାଗଜସ୍ତୁ ତଚ୍ଛ୍ରୁତ୍ଵା ପ୍ରତ୍ୟାହାଂଶୁମତୋ ଵଚଃ ।
ଆସମଂଜ କୃତାର୍ଥସ୍ତ୍ଵଂ ସହାଶ୍ଵଶ୍ଶୀଘ୍ରମେଷ୍ୟସି ॥ 9 ॥
ତସ୍ୟ ତଦ୍ଵଚନଂ ଶ୍ରୁତ୍ଵା ସର୍ଵାନେଵ ଦିଶାଗଜାନ୍ ।
ୟଥାକ୍ରମଂ ୟଥାନ୍ୟାୟଂ ପ୍ରଷ୍ଟୁଂ ସମୁପଚକ୍ରମେ ॥ 10 ॥
ତୈଶ୍ଚ ସର୍ଵୈର୍ଦିଶାପାଲୈର୍ଵାକ୍ୟଜ୍ଞୈର୍ଵାକ୍ୟକୋଵିଦୈଃ ।
ପୂଜିତସ୍ସହୟଶ୍ଚୈଵ ଗଂତାଽସୀତ୍ୟଭିଚୋଦିତଃ ॥ 11 ॥
ତେଷାଂ ତଦ୍ଵଚନଂ ଶ୍ରୁତ୍ଵା ଜଗାମ ଲଘୁଵିକ୍ରମଃ ।
ଭସ୍ମରାଶୀକୃତା ୟତ୍ର ପିତରସ୍ତସ୍ୟ ସାଗରାଃ ॥ 12 ॥
ସ ଦୁଃଖଵଶମାପନ୍ନସ୍ତ୍ଵସମଂଜସୁତସ୍ତଦା ।
ଚୁକ୍ରୋଶ ପରମାର୍ତସ୍ତୁ ଵଧାତ୍ତେଷାଂ ସୁଦୁଃଖିତଃ ॥ 13 ॥
ୟଜ୍ଞୀୟଂ ଚ ହୟଂ ତତ୍ର ଚରଂତମଵିଦୂରତଃ ।
ଦଦର୍ଶ ପୁରୁଷଵ୍ୟାଘ୍ରୋ ଦୁଃଖଶୋକସମନ୍ଵିତଃ ॥ 14 ॥
ସ ତେଷାଂ ରାଜପୁତ୍ରାଣାଂ କର୍ତୁକାମୋ ଜଲକ୍ରିୟାମ୍ ।
ସଲିଲାର୍ଥୀ ମହାତେଜା ନ ଚାପଶ୍ୟଜ୍ଜଲାଶୟମ୍ ॥ 15 ॥
ଵିସାର୍ୟ ନିପୁଣାଂ ଦୃଷ୍ଟିଂ ତତୋଽପଶ୍ୟତ୍ଖଗାଧିପମ୍ ।
ପିତୃଣାଂ ମାତୁଲଂ ରାମ ସୁପର୍ଣମନିଲୋପମମ୍ ॥ 16 ॥
ସ ଚୈଵମବ୍ରଵୀଦ୍ଵାକ୍ୟଂ ଵୈନତେୟୋ ମହାବଲ ଃ ।
ମା ଶୁଚଃ ପୁରୁଷଵ୍ୟାଘ୍ର ଵଧୋଽୟଂ ଲୋକସମ୍ମତଃ ॥ 17 ॥
କପିଲେନାପ୍ରମେୟେନ ଦଗ୍ଧା ହୀମେ ମହାବଲାଃ ।
ସଲିଲଂ ନାର୍ହସି ପ୍ରାଜ୍ଞ ଦାତୁମେଷାଂ ହି ଲୌକିକମ୍ ॥ 18 ॥
ଗଂଗା ହିମଵତୋ ଜ୍ୟେଷ୍ଠା ଦୁହିତା ପୁରୁଷର୍ଷଭ ।
ତସ୍ୟାଂ କୁରୁ ମହାବାହୋ ପିତୃଣାଂ ତୁ ଜଲକ୍ରିୟାମ୍ ॥ 19 ॥
ଭସ୍ମରାଶୀକୃତାନେତାନ୍ ପ୍ଲାଵୟେଲ୍ଲୋକପାଵନୀ ।
ତୟା କ୍ଲିନ୍ନମିଦଂ ଭସ୍ମ ଗଂଗୟା ଲୋକକାଂତୟା ॥ 20 ॥
ଷଷ୍ଟିଂ ପୁତ୍ରସହସ୍ରାଣି ସ୍ଵର୍ଗଲୋକଂ ଚ ନେଷ୍ୟତି ।
ଗଚ୍ଛ ଚାଶ୍ଵଂ ମହାଭାଗ ତଂ ଗୃହ୍ୟ ପୁରୁଷର୍ଷଭ ॥ 21 ॥
ୟଜ୍ଞଂ ପୈତାମହଂ ଵୀର ସଂଵର୍ତୟିତୁମର୍ହସି ।
ସୁପର୍ଣଵଚନଂ ଶ୍ରୁତ୍ଵା ସୋଂଽଶୁମାନତିଵୀର୍ୟଵାନ୍ ॥ 22 ॥
ତ୍ଵରିତଂ ହୟମାଦାୟ ପୁନରାୟାନ୍ମହାୟଶାଃ ।
ତତୋ ରାଜାନମାସାଦ୍ୟ ଦୀକ୍ଷିତଂ ରଘୁନଂଦନ ॥ 23 ॥
ନ୍ୟଵେଦୟଦ୍ୟଥାଵୃତ୍ତଂ ସୁପର୍ଣଵଚନଂ ତଥା ।
ତଚ୍ଛ୍ରୁତ୍ଵା ଘୋରସଂକାଶଂ ଵାକ୍ୟମଂଶୁମତୋ ନୃପଃ ॥ 24 ॥
ୟଜ୍ଞଂ ନିଵର୍ତୟାମାସ ୟଥାକଲ୍ପଂ ୟଥାଵିଧି ।
ସ୍ଵପୁରଂ ଚାଗମଚ୍ଛ୍ରୀମାନିଷ୍ଟୟଜ୍ଞୋମହୀପତିଃ ॥ 25 ॥
ଗଂଗାୟାଶ୍ଚାଗମେ ରାଜା ନିଶ୍ଚୟଂ ନାଧ୍ୟଗଚ୍ଛତ ।
ଅକୃତ୍ଵା ନିଶ୍ଚୟଂ ରାଜା କାଲେନ ମହତା ମହାନ୍ ।
ତ୍ରିଂଶଦ୍ଵର୍ଷସହସ୍ରାଣି ରାଜ୍ୟଂ କୃତ୍ଵା ଦିଵଂ ଗତଃ ॥ 26 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଏକଚତ୍ଵାରିଂଶସ୍ସର୍ଗଃ ॥
