শ্রীমদ্বাল্মীকীয় রামাযণে বালকাংডম্ ।
অথ একচত্বারিংশস্সর্গঃ ।
পুত্রাংশ্চিরগতান্ জ্ঞাত্বা সগরো রঘুনংদন ।
নপ্তারমব্রবীদ্রাজা দীপ্যমানং স্বতেজসা ॥ 1 ॥
শূরশ্চ কৃতবিদ্যশ্চ পূর্বৈস্তুল্য়োঽসি তেজসা ।
পিতৃণাং গতিমন্বিচ্ছ যেন চাশ্বোঽপবাহিতঃ ॥ 2 ॥
অংতর্ভৌমানি সত্ত্বানি বীর্যবংতি মহাংতি চ ।
তেষাং ত্বং প্রতিঘাতার্থং সাস্ত্রং গৃহ্ণীষ্ব কার্মুকম্ ॥ 3 ॥
অভিবাদ্য়াভিবাদ্য়াংস্ত্বং হত্বা বিঘ্নকরানপি ।
সিদ্ধার্থস্সন্নিবর্তস্ব মম যজ্ঞস্য় পারগঃ ॥ 4 ॥
এবমুক্তোংঽশুমান্সম্যক্ সগরেণ মহাত্মনা ।
ধনুরাদায় খড্গং চ জগাম লঘুবিক্রমঃ ॥ 5 ॥
স খাতং পিতৃভির্মার্গমংতর্ভৌমং মহাত্মভিঃ ।
প্রাপদ্যত নরশ্রেষ্ঠ তেন রাজ্ঞাঽভিচোদিতঃ ॥ 6 ॥
দৈত্যদানবরক্ষোভিঃ পিশাচপতগোরগৈঃ ।
পূজ্যমানং মহাতেজা দিশাগজমপশ্যত ॥ 7 ॥
স তং প্রদক্ষিণং কৃত্বা পৃষ্ট্বা চাপি নিরামযম্ ।
পিতৃন্ স পরিপপ্রচ্ছ বাজিহর্তারমেব চ ॥ 8 ॥
দিশাগজস্তু তচ্ছ্রুত্বা প্রত্য়াহাংশুমতো বচঃ ।
আসমংজ কৃতার্থস্ত্বং সহাশ্বশ্শীঘ্রমেষ্যসি ॥ 9 ॥
তস্য় তদ্বচনং শ্রুত্বা সর্বানেব দিশাগজান্ ।
যথাক্রমং যথান্য়ায়ং প্রষ্টুং সমুপচক্রমে ॥ 10 ॥
তৈশ্চ সর্বৈর্দিশাপালৈর্বাক্যজ্ঞৈর্বাক্যকোবিদৈঃ ।
পূজিতস্সহযশ্চৈব গংতাঽসীত্যভিচোদিতঃ ॥ 11 ॥
তেষাং তদ্বচনং শ্রুত্বা জগাম লঘুবিক্রমঃ ।
ভস্মরাশীকৃতা যত্র পিতরস্তস্য় সাগরাঃ ॥ 12 ॥
স দুঃখবশমাপন্নস্ত্বসমংজসুতস্তদা ।
চুক্রোশ পরমার্তস্তু বধাত্তেষাং সুদুঃখিতঃ ॥ 13 ॥
যজ্ঞীয়ং চ হয়ং তত্র চরংতমবিদূরতঃ ।
দদর্শ পুরুষব্য়াঘ্রো দুঃখশোকসমন্বিতঃ ॥ 14 ॥
স তেষাং রাজপুত্রাণাং কর্তুকামো জলক্রিয়াম্ ।
সলিলার্থী মহাতেজা ন চাপশ্যজ্জলাশযম্ ॥ 15 ॥
বিসার্য় নিপুণাং দৃষ্টিং ততোঽপশ্যত্খগাধিপম্ ।
পিতৃণাং মাতুলং রাম সুপর্ণমনিলোপমম্ ॥ 16 ॥
স চৈবমব্রবীদ্বাক্য়ং বৈনতেয়ো মহাবল ঃ ।
মা শুচঃ পুরুষব্য়াঘ্র বধোঽয়ং লোকসম্মতঃ ॥ 17 ॥
কপিলেনাপ্রমেয়েন দগ্ধা হীমে মহাবলাঃ ।
সলিলং নার্হসি প্রাজ্ঞ দাতুমেষাং হি লৌকিকম্ ॥ 18 ॥
গংগা হিমবতো জ্য়েষ্ঠা দুহিতা পুরুষর্ষভ ।
তস্য়াং কুরু মহাবাহো পিতৃণাং তু জলক্রিয়াম্ ॥ 19 ॥
ভস্মরাশীকৃতানেতান্ প্লাবয়েল্লোকপাবনী ।
তয়া ক্লিন্নমিদং ভস্ম গংগয়া লোককাংতয়া ॥ 20 ॥
ষষ্টিং পুত্রসহস্রাণি স্বর্গলোকং চ নেষ্যতি ।
গচ্ছ চাশ্বং মহাভাগ তং গৃহ্য় পুরুষর্ষভ ॥ 21 ॥
যজ্ঞং পৈতামহং বীর সংবর্তয়িতুমর্হসি ।
সুপর্ণবচনং শ্রুত্বা সোংঽশুমানতিবীর্যবান্ ॥ 22 ॥
ত্বরিতং হযমাদায় পুনরায়ান্মহাযশাঃ ।
ততো রাজানমাসাদ্য় দীক্ষিতং রঘুনংদন ॥ 23 ॥
ন্যবেদযদ্যথাবৃত্তং সুপর্ণবচনং তথা ।
তচ্ছ্রুত্বা ঘোরসংকাশং বাক্যমংশুমতো নৃপঃ ॥ 24 ॥
যজ্ঞং নিবর্তয়ামাস যথাকল্পং যথাবিধি ।
স্বপুরং চাগমচ্ছ্রীমানিষ্টযজ্ঞোমহীপতিঃ ॥ 25 ॥
গংগায়াশ্চাগমে রাজা নিশ্চয়ং নাধ্যগচ্ছত ।
অকৃত্বা নিশ্চয়ং রাজা কালেন মহতা মহান্ ।
ত্রিংশদ্বর্ষসহস্রাণি রাজ্য়ং কৃত্বা দিবং গতঃ ॥ 26 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে একচত্বারিংশস্সর্গঃ ॥
