śrīmadvālmīkīya rāmāyaṇē bālakāṇḍam ।
atha ēkachatvāriṃśassargaḥ ।
putrāṃśchiragatān jñātvā sagarō raghunandana ।
naptāramabravīdrājā dīpyamānaṃ svatējasā ॥ 1 ॥
śūraścha kṛtavidyaścha pūrvaistulyō'si tējasā ।
pitṛṇāṃ gatimanvichCha yēna chāśvō'pavāhitaḥ ॥ 2 ॥
antarbhaumāni sattvāni vīryavanti mahānti cha ।
tēṣāṃ tvaṃ pratighātārthaṃ sāstraṃ gṛhṇīṣva kārmukam ॥ 3 ॥
abhivādyābhivādyāṃstvaṃ hatvā vighnakarānapi ।
siddhārthassannivartasva mama yajñasya pāragaḥ ॥ 4 ॥
ēvamuktōṃ'śumānsamyak sagarēṇa mahātmanā ।
dhanurādāya khaḍgaṃ cha jagāma laghuvikramaḥ ॥ 5 ॥
sa khātaṃ pitṛbhirmārgamantarbhaumaṃ mahātmabhiḥ ।
prāpadyata naraśrēṣṭha tēna rājñā'bhichōditaḥ ॥ 6 ॥
daityadānavarakṣōbhiḥ piśāchapatagōragaiḥ ।
pūjyamānaṃ mahātējā diśāgajamapaśyata ॥ 7 ॥
sa taṃ pradakṣiṇaṃ kṛtvā pṛṣṭvā chāpi nirāmayam ।
pitṛn sa paripaprachCha vājihartāramēva cha ॥ 8 ॥
diśāgajastu tachChrutvā pratyāhāṃśumatō vachaḥ ।
āsamañja kṛtārthastvaṃ sahāśvaśśīghramēṣyasi ॥ 9 ॥
tasya tadvachanaṃ śrutvā sarvānēva diśāgajān ।
yathākramaṃ yathānyāyaṃ praṣṭuṃ samupachakramē ॥ 10 ॥
taiścha sarvairdiśāpālairvākyajñairvākyakōvidaiḥ ।
pūjitassahayaśchaiva gantā'sītyabhichōditaḥ ॥ 11 ॥
tēṣāṃ tadvachanaṃ śrutvā jagāma laghuvikramaḥ ।
bhasmarāśīkṛtā yatra pitarastasya sāgarāḥ ॥ 12 ॥
sa duḥkhavaśamāpannastvasamañjasutastadā ।
chukrōśa paramārtastu vadhāttēṣāṃ suduḥkhitaḥ ॥ 13 ॥
yajñīyaṃ cha hayaṃ tatra charantamavidūrataḥ ।
dadarśa puruṣavyāghrō duḥkhaśōkasamanvitaḥ ॥ 14 ॥
sa tēṣāṃ rājaputrāṇāṃ kartukāmō jalakriyām ।
salilārthī mahātējā na chāpaśyajjalāśayam ॥ 15 ॥
visārya nipuṇāṃ dṛṣṭiṃ tatō'paśyatkhagādhipam ।
pitṛṇāṃ mātulaṃ rāma suparṇamanilōpamam ॥ 16 ॥
sa chaivamabravīdvākyaṃ vainatēyō mahābala ḥ ।
mā śuchaḥ puruṣavyāghra vadhō'yaṃ lōkasammataḥ ॥ 17 ॥
kapilēnāpramēyēna dagdhā hīmē mahābalāḥ ।
salilaṃ nārhasi prājña dātumēṣāṃ hi laukikam ॥ 18 ॥
gaṅgā himavatō jyēṣṭhā duhitā puruṣarṣabha ।
tasyāṃ kuru mahābāhō pitṛṇāṃ tu jalakriyām ॥ 19 ॥
bhasmarāśīkṛtānētān plāvayēllōkapāvanī ।
tayā klinnamidaṃ bhasma gaṅgayā lōkakāntayā ॥ 20 ॥
ṣaṣṭiṃ putrasahasrāṇi svargalōkaṃ cha nēṣyati ।
gachCha chāśvaṃ mahābhāga taṃ gṛhya puruṣarṣabha ॥ 21 ॥
yajñaṃ paitāmahaṃ vīra saṃvartayitumarhasi ।
suparṇavachanaṃ śrutvā sōṃ'śumānativīryavān ॥ 22 ॥
tvaritaṃ hayamādāya punarāyānmahāyaśāḥ ।
tatō rājānamāsādya dīkṣitaṃ raghunandana ॥ 23 ॥
nyavēdayadyathāvṛttaṃ suparṇavachanaṃ tathā ।
tachChrutvā ghōrasaṅkāśaṃ vākyamaṃśumatō nṛpaḥ ॥ 24 ॥
yajñaṃ nivartayāmāsa yathākalpaṃ yathāvidhi ।
svapuraṃ chāgamachChrīmāniṣṭayajñōmahīpatiḥ ॥ 25 ॥
gaṅgāyāśchāgamē rājā niśchayaṃ nādhyagachChata ।
akṛtvā niśchayaṃ rājā kālēna mahatā mahān ।
triṃśadvarṣasahasrāṇi rājyaṃ kṛtvā divaṃ gataḥ ॥ 26 ॥
ityārṣē śrīmadrāmāyaṇē vālmīkīya ādikāvyē bālakāṇḍē ēkachatvāriṃśassargaḥ ॥
