ஶ்ரீமத்³வால்மீகீய ராமாயணே பா³லகாண்ட³ம் ।
அத² ஏகசத்வாரிம்ஶஸ்ஸர்க:³ ।
புத்ராம்ஶ்சிரக³தான் ஜ்ஞாத்வா ஸக³ரோ ரகு⁴னந்த³ன ।
நப்தாரமப்³ரவீத்³ராஜா தீ³ப்யமானம் ஸ்வதேஜஸா ॥ 1 ॥
ஶூரஶ்ச க்ருதவித்³யஶ்ச பூர்வைஸ்துல்யோஸி தேஜஸா ।
பித்ருணாம் க³திமன்விச்ச² யேன சாஶ்வோபவாஹித: ॥ 2 ॥
அந்தர்பௌ⁴மானி ஸத்த்வானி வீர்யவந்தி மஹாந்தி ச ।
தேஷாம் த்வம் ப்ரதிகா⁴தார்த²ம் ஸாஸ்த்ரம் க்³ருஹ்ணீஷ்வ கார்முகம் ॥ 3 ॥
அபி⁴வாத்³யாபி⁴வாத்³யாம்ஸ்த்வம் ஹத்வா விக்⁴னகரானபி ।
ஸித்³தா⁴ர்த²ஸ்ஸன்னிவர்தஸ்வ மம யஜ்ஞஸ்ய பாரக:³ ॥ 4 ॥
ஏவமுக்தோம்ஶுமான்ஸம்யக் ஸக³ரேண மஹாத்மனா ।
த⁴னுராதா³ய க²ட்³க³ம் ச ஜகா³ம லகு⁴விக்ரம: ॥ 5 ॥
ஸ கா²தம் பித்ருபி⁴ர்மார்க³மந்தர்பௌ⁴மம் மஹாத்மபி⁴: ।
ப்ராபத்³யத நரஶ்ரேஷ்ட² தேன ராஜ்ஞாபி⁴சோதி³த: ॥ 6 ॥
தை³த்யதா³னவரக்ஷோபி⁴: பிஶாசபதகோ³ரகை³: ।
பூஜ்யமானம் மஹாதேஜா தி³ஶாகஜ³மபஶ்யத ॥ 7 ॥
ஸ தம் ப்ரத³க்ஷிணம் க்ருத்வா ப்ருஷ்ட்வா சாபி நிராமயம் ।
பித்ருன் ஸ பரிபப்ரச்ச² வாஜிஹர்தாரமேவ ச ॥ 8 ॥
தி³ஶாகஜ³ஸ்து தச்ச்²ருத்வா ப்ரத்யாஹாம்ஶுமதோ வச: ।
ஆஸமஞ்ஜ க்ருதார்த²ஸ்த்வம் ஸஹாஶ்வஶ்ஶீக்⁴ரமேஷ்யஸி ॥ 9 ॥
தஸ்ய தத்³வசனம் ஶ்ருத்வா ஸர்வானேவ தி³ஶாகஜ³ான் ।
யதா²க்ரமம் யதா²ன்யாயம் ப்ரஷ்டும் ஸமுபசக்ரமே ॥ 1௦ ॥
தைஶ்ச ஸர்வைர்தி³ஶாபாலைர்வாக்யஜ்ஞைர்வாக்யகோவிதை³: ।
பூஜிதஸ்ஸஹயஶ்சைவ க³ந்தாஸீத்யபி⁴சோதி³த: ॥ 11 ॥
தேஷாம் தத்³வசனம் ஶ்ருத்வா ஜகா³ம லகு⁴விக்ரம: ।
ப⁴ஸ்மராஶீக்ருதா யத்ர பிதரஸ்தஸ்ய ஸாக³ரா: ॥ 12 ॥
ஸ து³:க²வஶமாபன்னஸ்த்வஸமஞ்ஜஸுதஸ்ததா³ ।
சுக்ரோஶ பரமார்தஸ்து வதா⁴த்தேஷாம் ஸுது³:கி²த: ॥ 13 ॥
யஜ்ஞீயம் ச ஹயம் தத்ர சரந்தமவிதூ³ரத: ।
த³த³ர்ஶ புருஷவ்யாக்⁴ரோ து³:க²ஶோகஸமன்வித: ॥ 14 ॥
ஸ தேஷாம் ராஜபுத்ராணாம் கர்துகாமோ ஜலக்ரியாம் ।
ஸலிலார்தீ² மஹாதேஜா ந சாபஶ்யஜ்ஜலாஶயம் ॥ 15 ॥
விஸார்ய நிபுணாம் த்³ருஷ்டிம் ததோபஶ்யத்க²கா³தி⁴பம் ।
பித்ருணாம் மாதுலம் ராம ஸுபர்ணமனிலோபமம் ॥ 16 ॥
ஸ சைவமப்³ரவீத்³வாக்யம் வைனதேயோ மஹாப³ல : ।
மா ஶுச: புருஷவ்யாக்⁴ர வதோ⁴யம் லோகஸம்மத: ॥ 17 ॥
கபிலேனாப்ரமேயேன த³க்³தா⁴ ஹீமே மஹாப³லா: ।
ஸலிலம் நார்ஹஸி ப்ராஜ்ஞ தா³துமேஷாம் ஹி லௌகிகம் ॥ 18 ॥
க³ங்கா³ ஹிமவதோ ஜ்யேஷ்டா² து³ஹிதா புருஷர்ஷப⁴ ।
தஸ்யாம் குரு மஹாபா³ஹோ பித்ருணாம் து ஜலக்ரியாம் ॥ 19 ॥
ப⁴ஸ்மராஶீக்ருதானேதான் ப்லாவயேல்லோகபாவனீ ।
தயா க்லின்னமித³ம் ப⁴ஸ்ம க³ங்க³யா லோககாந்தயா ॥ 2௦ ॥
ஷஷ்டிம் புத்ரஸஹஸ்ராணி ஸ்வர்க³லோகம் ச நேஷ்யதி ।
க³ச்ச² சாஶ்வம் மஹாபா⁴க³ தம் க்³ருஹ்ய புருஷர்ஷப⁴ ॥ 21 ॥
யஜ்ஞம் பைதாமஹம் வீர ஸம்வர்தயிதுமர்ஹஸி ।
ஸுபர்ணவசனம் ஶ்ருத்வா ஸோம்ஶுமானதிவீர்யவான் ॥ 22 ॥
த்வரிதம் ஹயமாதா³ய புனராயான்மஹாயஶா: ।
ததோ ராஜானமாஸாத்³ய தீ³க்ஷிதம் ரகு⁴னந்த³ன ॥ 23 ॥
ந்யவேத³யத்³யதா²வ்ருத்தம் ஸுபர்ணவசனம் ததா² ।
தச்ச்²ருத்வா கோ⁴ரஸங்காஶம் வாக்யமம்ஶுமதோ ந்ருப: ॥ 24 ॥
யஜ்ஞம் நிவர்தயாமாஸ யதா²கல்பம் யதா²விதி⁴ ।
ஸ்வபுரம் சாக³மச்ச்²ரீமானிஷ்டயஜ்ஞோமஹீபதி: ॥ 25 ॥
க³ங்கா³யாஶ்சாக³மே ராஜா நிஶ்சயம் நாத்⁴யக³ச்ச²த ।
அக்ருத்வா நிஶ்சயம் ராஜா காலேன மஹதா மஹான் ।
த்ரிம்ஶத்³வர்ஷஸஹஸ்ராணி ராஜ்யம் க்ருத்வா தி³வம் க³த: ॥ 26 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே பா³லகாண்டே³ ஏகசத்வாரிம்ஶஸ்ஸர்க:³ ॥
