ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଦ୍ଵିପଂଚାଶସ୍ସର୍ଗଃ ।
ସ ଦୃଷ୍ଟ୍ଵା ପରମପ୍ରୀତୋ ଵିଶ୍ଵାମିତ୍ରୋ ମହାବଲଃ ।
ପ୍ରଣତୋ ଵିନୟାଦ୍ଵୀରୋ ଵସିଷ୍ଠଂ ଜପତାଂ ଵରମ୍ ॥ 1 ॥
ସ୍ଵାଗତଂ ତଵ ଚେତ୍ୟୁକ୍ତୋ ଵସିଷ୍ଠେନ ମହାତ୍ମନା ।
ଆସନଂ ଚାସ୍ୟ ଭଗଵାନ୍ ଵସିଷ୍ଠୋ ଵ୍ୟାଦିଦେଶ ହ ॥ 2 ॥
ଉପଵିଷ୍ଟାୟ ଚ ତଦା ଵିଶ୍ଵାମିତ୍ରାୟ ଧୀମତେ ।
ୟଥାନ୍ୟାୟଂ ମୁନିଵରଃ ଫଲମୂଲମୁପାହରତ୍ ॥ 3 ॥
ପ୍ରତିଗୃହ୍ୟ ତୁ ତାଂ ପୂଜାଂ ଵସିଷ୍ଠାଦ୍ରାଜସତ୍ତମଃ ।
ତପୋଗ୍ନିହୋତ୍ରଶିଷ୍ୟେଷୁ କୁଶଲଂ ପର୍ୟପୃଚ୍ଛତ ॥ 4 ॥
ଵିଶ୍ଵାମିତ୍ରୋ ମହାତେଜା ଵନସ୍ପତିଗଣେ ତଥା ।
ସର୍ଵତ୍ର କୁଶଲଂ ଚାହ ଵସିଷ୍ଠୋ ରାଜସତ୍ତମମ୍ ॥ 5 ॥
ସୁଖୋପଵିଷ୍ଟଂ ରାଜାନଂ ଵିଶ୍ଵାମିତ୍ରଂ ମହାତପାଃ ।
ପପ୍ରଚ୍ଛ ଜପତାଂ ଶ୍ରେଷ୍ଠୋ ଵସିଷ୍ଠୋ ବ୍ରହ୍ମଣସ୍ସୁତଃ ॥ 6 ॥
କଚ୍ଚିତ୍ତେ କୁଶଲଂ ରାଜନ୍ କଚ୍ଚିଦ୍ଧର୍ମେଣ ରଂଜୟନ୍ ।
ପ୍ରଜାଃ ପାଲୟସେ ଵୀର ରାଜଵୃତ୍ତେନ ଧାର୍ମିକ ॥ 7 ॥
କଚ୍ଚିତ୍ତେ ସଂଭୃତା ଭୃତ୍ୟାଃ କଚ୍ଚିତ୍ତିଷ୍ଠଂତି ଶାସନେ ।
କଚ୍ଚିତ୍ତେ ଵିଜିତାସ୍ସର୍ଵେ ରିପଵୋ ରିପୁସୂଦନ ॥ 8 ॥
କଚ୍ଚିଦ୍ବଲେଷୁ କୋଶେଷୁ ମିତ୍ରେଷୁ ଚ ପରଂତପ ।
କୁଶଲଂ ତେ ନରଵ୍ୟାଘ୍ର ପୁତ୍ରପୌତ୍ରେ ତଵାନଘ ॥ 9 ॥
ସର୍ଵତ୍ର କୁଶଲଂ ରାଜା ଵସିଷ୍ଠଂ ପ୍ରତ୍ୟୁଦାହରତ୍ ।
ଵିଶ୍ଵାମିତ୍ରୋ ମହାତେଜା ଵସିଷ୍ଠଂ ଵିନୟାନ୍ଵିତଃ ॥ 10 ॥
କୃତ୍ଵୋଭୌ ସୁଚିରଂ କାଲଂ ଧର୍ମିଷ୍ଠୌ ତାଃ କଥାଃ ଶୁଭାଃ ।
ମୁଦା ପରମୟା ୟୁକ୍ତୌ ପ୍ରୀୟେତାଂ ତୌ ପରସ୍ପରମ୍ ॥ 11 ॥
ତତୋ ଵସିଷ୍ଠୋ ଭଗଵାନ୍ କଥାଽଂତେ ରଘୁନଂଦନ ।
ଵିଶ୍ଵାମିତ୍ରମିଦଂ ଵାକ୍ୟମୁଵାଚ ପ୍ରହସନ୍ନିଵ ॥ 12 ॥
ଆତିଥ୍ୟଂ କର୍ତୁମିଚ୍ଛାମି ବଲସ୍ୟାସ୍ୟ ମହାବଲ ।
ତଵ ଚୈଵାପ୍ରମେୟସ୍ୟ ୟଥାର୍ହଂ ସଂପ୍ରତୀଚ୍ଛ ମେ ॥ 13 ॥
ସତ୍କ୍ରିୟାଂ ତୁ ଭଵାନେତାଂ ପ୍ରତୀଚ୍ଛତୁ ମୟୋଦ୍ୟତାମ୍ ।
ରାଜା ତ୍ଵମତିଥିଶ୍ରେଷ୍ଠଃ ପୂଜନୀୟଃ ପ୍ରୟତ୍ନତଃ ॥ 14 ॥
ଏଵମୁକ୍ତୋ ଵସିଷ୍ଠେନ ଵିଶ୍ଵାମିତ୍ରୋ ମହାମତିଃ ।
କୃତମିତ୍ୟବ୍ରଵୀଦ୍ରାଜା ପ୍ରିୟଵାକ୍ୟେନ ମେ ତ୍ଵୟା ॥ 15 ॥
ଫଲମୂଲେନ ଭଗଵନ୍ ଵିଦ୍ୟତେ ୟତ୍ତଵାଶ୍ରମେ ।
ପାଦ୍ୟେନାଚମନୀୟେନ ଭଗଵଦ୍ଦର୍ଶନେନ ଚ ॥ 16 ॥
ସର୍ଵଥା ଚ ମହାପ୍ରାଜ୍ଞ ପୂଜାର୍ହେଣ ସୁପୂଜିତଃ ।
ଗମିଷ୍ୟାମି ନମସ୍ତେଽସ୍ତୁ ମୈତ୍ରେଣେକ୍ଷସ୍ଵ ଚକ୍ଷୁଷା ॥ 17 ॥
ଏଵଂ ବ୍ରୁଵଂତଂ ରାଜାନଂ ଵସିଷ୍ଠଃପୁନରେଵ ହି ।
ନ୍ୟମଂତ୍ରୟତ ଧର୍ମାତ୍ମା ପୁନଃପୁନରୁଦାରଧୀଃ ॥ 18 ॥
ବାଢମିତ୍ୟେଵ ଗାଧେୟୋ ଵସିଷ୍ଠଂ ପ୍ରତ୍ୟୁଵାଚ ହ ।
ୟଥା ପ୍ରିୟଂ ଭଗଵତସ୍ତଥାଽସ୍ତୁ ମୁନିପୁଂଗଵ ॥ 19 ॥
ଏଵମୁକ୍ତୋ ମହାତେଜା ଵସିଷ୍ଠୋ ଜପତାଂ ଵରଃ ।
ଆଜୁହାଵ ତତଃ ପ୍ରୀତଃ କଲ୍ମାଷୀଂ ଧୂତକଲ୍ମଷଃ ॥ 20 ॥
ଏହ୍ୟେହି ଶବଲେ କ୍ଷିପ୍ରଂ ଶ୍ରୃଣୁ ଚାପି ଵଚୋ ମମ ।
ସବଲସ୍ୟାସ୍ୟ ରାଜର୍ଷେଃକର୍ତୁଂ ଵ୍ୟଵସିତୋଽସ୍ମ୍ୟହମ୍ ॥ 21 ॥
ଭୋଜନେନ ମହାର୍ହେଣ ସତ୍କାରଂ ସଂଵିଧତ୍ସ୍ଵ ମେ ।
ୟସ୍ୟ ୟସ୍ୟ ୟଥାକାମଂ ଷଡ୍ରସେଷ୍ଵଭିପୂଜିତମ୍ ।
ତତ୍ସର୍ଵଂ କାମଧୁକ୍କ୍ଷିପ୍ରମଭିଵର୍ଷ କୃତେ ମମ ॥ 22 ॥
ରସେନାନ୍ନେନ ପାନେନ ଲେହ୍ୟଚୋଷ୍ୟେଣ ସଂୟୁତମ୍ ।
ଅନ୍ନାନାଂ ନିଚୟଂ ସର୍ଵଂ ସୃଜସ୍ଵ ଶବଲେ ତ୍ଵର ॥ 23 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଦ୍ଵିପଂଚାଶସ୍ସର୍ଗଃ ॥
