શ્રીમદ્વાલ્મીકીય રામાયણે બાલકાંડમ્ ।
અથ દ્વિપંચાશસ્સર્ગઃ ।
સ દૃષ્ટ્વા પરમપ્રીતો વિશ્વામિત્રો મહાબલઃ ।
પ્રણતો વિનયાદ્વીરો વસિષ્ઠં જપતાં વરમ્ ॥ 1 ॥
સ્વાગતં તવ ચેત્યુક્તો વસિષ્ઠેન મહાત્મના ।
આસનં ચાસ્ય ભગવાન્ વસિષ્ઠો વ્યાદિદેશ હ ॥ 2 ॥
ઉપવિષ્ટાય ચ તદા વિશ્વામિત્રાય ધીમતે ।
યથાન્યાયં મુનિવરઃ ફલમૂલમુપાહરત્ ॥ 3 ॥
પ્રતિગૃહ્ય તુ તાં પૂજાં વસિષ્ઠાદ્રાજસત્તમઃ ।
તપોગ્નિહોત્રશિષ્યેષુ કુશલં પર્યપૃચ્છત ॥ 4 ॥
વિશ્વામિત્રો મહાતેજા વનસ્પતિગણે તથા ।
સર્વત્ર કુશલં ચાહ વસિષ્ઠો રાજસત્તમમ્ ॥ 5 ॥
સુખોપવિષ્ટં રાજાનં વિશ્વામિત્રં મહાતપાઃ ।
પપ્રચ્છ જપતાં શ્રેષ્ઠો વસિષ્ઠો બ્રહ્મણસ્સુતઃ ॥ 6 ॥
કચ્ચિત્તે કુશલં રાજન્ કચ્ચિદ્ધર્મેણ રંજયન્ ।
પ્રજાઃ પાલયસે વીર રાજવૃત્તેન ધાર્મિક ॥ 7 ॥
કચ્ચિત્તે સંભૃતા ભૃત્યાઃ કચ્ચિત્તિષ્ઠંતિ શાસને ।
કચ્ચિત્તે વિજિતાસ્સર્વે રિપવો રિપુસૂદન ॥ 8 ॥
કચ્ચિદ્બલેષુ કોશેષુ મિત્રેષુ ચ પરંતપ ।
કુશલં તે નરવ્યાઘ્ર પુત્રપૌત્રે તવાનઘ ॥ 9 ॥
સર્વત્ર કુશલં રાજા વસિષ્ઠં પ્રત્યુદાહરત્ ।
વિશ્વામિત્રો મહાતેજા વસિષ્ઠં વિનયાન્વિતઃ ॥ 10 ॥
કૃત્વોભૌ સુચિરં કાલં ધર્મિષ્ઠૌ તાઃ કથાઃ શુભાઃ ।
મુદા પરમયા યુક્તૌ પ્રીયેતાં તૌ પરસ્પરમ્ ॥ 11 ॥
તતો વસિષ્ઠો ભગવાન્ કથાઽંતે રઘુનંદન ।
વિશ્વામિત્રમિદં વાક્યમુવાચ પ્રહસન્નિવ ॥ 12 ॥
આતિથ્યં કર્તુમિચ્છામિ બલસ્યાસ્ય મહાબલ ।
તવ ચૈવાપ્રમેયસ્ય યથાર્હં સંપ્રતીચ્છ મે ॥ 13 ॥
સત્ક્રિયાં તુ ભવાનેતાં પ્રતીચ્છતુ મયોદ્યતામ્ ।
રાજા ત્વમતિથિશ્રેષ્ઠઃ પૂજનીયઃ પ્રયત્નતઃ ॥ 14 ॥
એવમુક્તો વસિષ્ઠેન વિશ્વામિત્રો મહામતિઃ ।
કૃતમિત્યબ્રવીદ્રાજા પ્રિયવાક્યેન મે ત્વયા ॥ 15 ॥
ફલમૂલેન ભગવન્ વિદ્યતે યત્તવાશ્રમે ।
પાદ્યેનાચમનીયેન ભગવદ્દર્શનેન ચ ॥ 16 ॥
સર્વથા ચ મહાપ્રાજ્ઞ પૂજાર્હેણ સુપૂજિતઃ ।
ગમિષ્યામિ નમસ્તેઽસ્તુ મૈત્રેણેક્ષસ્વ ચક્ષુષા ॥ 17 ॥
એવં બ્રુવંતં રાજાનં વસિષ્ઠઃપુનરેવ હિ ।
ન્યમંત્રયત ધર્માત્મા પુનઃપુનરુદારધીઃ ॥ 18 ॥
બાઢમિત્યેવ ગાધેયો વસિષ્ઠં પ્રત્યુવાચ હ ।
યથા પ્રિયં ભગવતસ્તથાઽસ્તુ મુનિપુંગવ ॥ 19 ॥
એવમુક્તો મહાતેજા વસિષ્ઠો જપતાં વરઃ ।
આજુહાવ તતઃ પ્રીતઃ કલ્માષીં ધૂતકલ્મષઃ ॥ 20 ॥
એહ્યેહિ શબલે ક્ષિપ્રં શ્રૃણુ ચાપિ વચો મમ ।
સબલસ્યાસ્ય રાજર્ષેઃકર્તું વ્યવસિતોઽસ્મ્યહમ્ ॥ 21 ॥
ભોજનેન મહાર્હેણ સત્કારં સંવિધત્સ્વ મે ।
યસ્ય યસ્ય યથાકામં ષડ્રસેષ્વભિપૂજિતમ્ ।
તત્સર્વં કામધુક્ક્ષિપ્રમભિવર્ષ કૃતે મમ ॥ 22 ॥
રસેનાન્નેન પાનેન લેહ્યચોષ્યેણ સંયુતમ્ ।
અન્નાનાં નિચયં સર્વં સૃજસ્વ શબલે ત્વર ॥ 23 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે દ્વિપંચાશસ્સર્ગઃ ॥
