ശ്രീമദ്വാല്മീകീയ രാമായണേ ബാലകാംഡമ് ।
അഥ ദ്വിപംചാശസ്സര്ഗഃ ।
സ ദൃഷ്ട്വാ പരമപ്രീതോ വിശ്വാമിത്രോ മഹാബലഃ ।
പ്രണതോ വിനയാദ്വീരോ വസിഷ്ഠം ജപതാം വരമ് ॥ 1 ॥
സ്വാഗതം തവ ചേത്യുക്തോ വസിഷ്ഠേന മഹാത്മനാ ।
ആസനം ചാസ്യ ഭഗവാന് വസിഷ്ഠോ വ്യാദിദേശ ഹ ॥ 2 ॥
ഉപവിഷ്ടായ ച തദാ വിശ്വാമിത്രായ ധീമതേ ।
യഥാന്യായം മുനിവരഃ ഫലമൂലമുപാഹരത് ॥ 3 ॥
പ്രതിഗൃഹ്യ തു താം പൂജാം വസിഷ്ഠാദ്രാജസത്തമഃ ।
തപോഗ്നിഹോത്രശിഷ്യേഷു കുശലം പര്യപൃച്ഛത ॥ 4 ॥
വിശ്വാമിത്രോ മഹാതേജാ വനസ്പതിഗണേ തഥാ ।
സർവത്ര കുശലം ചാഹ വസിഷ്ഠോ രാജസത്തമമ് ॥ 5 ॥
സുഖോപവിഷ്ടം രാജാനം വിശ്വാമിത്രം മഹാതപാഃ ।
പപ്രച്ഛ ജപതാം ശ്രേഷ്ഠോ വസിഷ്ഠോ ബ്രഹ്മണസ്സുതഃ ॥ 6 ॥
കച്ചിത്തേ കുശലം രാജന് കച്ചിദ്ധര്മേണ രംജയന് ।
പ്രജാഃ പാലയസേ വീര രാജവൃത്തേന ധാര്മിക ॥ 7 ॥
കച്ചിത്തേ സംഭൃതാ ഭൃത്യാഃ കച്ചിത്തിഷ്ഠംതി ശാസനേ ।
കച്ചിത്തേ വിജിതാസ്സർവേ രിപവോ രിപുസൂദന ॥ 8 ॥
കച്ചിദ്ബലേഷു കോശേഷു മിത്രേഷു ച പരംതപ ।
കുശലം തേ നരവ്യാഘ്ര പുത്രപൌത്രേ തവാനഘ ॥ 9 ॥
സർവത്ര കുശലം രാജാ വസിഷ്ഠം പ്രത്യുദാഹരത് ।
വിശ്വാമിത്രോ മഹാതേജാ വസിഷ്ഠം വിനയാന്വിതഃ ॥ 10 ॥
കൃത്വോഭൌ സുചിരം കാലം ധര്മിഷ്ഠൌ താഃ കഥാഃ ശുഭാഃ ।
മുദാ പരമയാ യുക്തൌ പ്രീയേതാം തൌ പരസ്പരമ് ॥ 11 ॥
തതോ വസിഷ്ഠോ ഭഗവാന് കഥാഽംതേ രഘുനംദന ।
വിശ്വാമിത്രമിദം വാക്യമുവാച പ്രഹസന്നിവ ॥ 12 ॥
ആതിഥ്യം കര്തുമിച്ഛാമി ബലസ്യാസ്യ മഹാബല ।
തവ ചൈവാപ്രമേയസ്യ യഥാര്ഹം സംപ്രതീച്ഛ മേ ॥ 13 ॥
സത്ക്രിയാം തു ഭവാനേതാം പ്രതീച്ഛതു മയോദ്യതാമ് ।
രാജാ ത്വമതിഥിശ്രേഷ്ഠഃ പൂജനീയഃ പ്രയത്നതഃ ॥ 14 ॥
ഏവമുക്തോ വസിഷ്ഠേന വിശ്വാമിത്രോ മഹാമതിഃ ।
കൃതമിത്യബ്രവീദ്രാജാ പ്രിയവാക്യേന മേ ത്വയാ ॥ 15 ॥
ഫലമൂലേന ഭഗവന് വിദ്യതേ യത്തവാശ്രമേ ।
പാദ്യേനാചമനീയേന ഭഗവദ്ദര്ശനേന ച ॥ 16 ॥
സർവഥാ ച മഹാപ്രാജ്ഞ പൂജാര്ഹേണ സുപൂജിതഃ ।
ഗമിഷ്യാമി നമസ്തേഽസ്തു മൈത്രേണേക്ഷസ്വ ചക്ഷുഷാ ॥ 17 ॥
ഏവം ബ്രുവംതം രാജാനം വസിഷ്ഠഃപുനരേവ ഹി ।
ന്യമംത്രയത ധര്മാത്മാ പുനഃപുനരുദാരധീഃ ॥ 18 ॥
ബാഢമിത്യേവ ഗാധേയോ വസിഷ്ഠം പ്രത്യുവാച ഹ ।
യഥാ പ്രിയം ഭഗവതസ്തഥാഽസ്തു മുനിപുംഗവ ॥ 19 ॥
ഏവമുക്തോ മഹാതേജാ വസിഷ്ഠോ ജപതാം വരഃ ।
ആജുഹാവ തതഃ പ്രീതഃ കല്മാഷീം ധൂതകല്മഷഃ ॥ 20 ॥
ഏഹ്യേഹി ശബലേ ക്ഷിപ്രം ശ്രൃണു ചാപി വചോ മമ ।
സബലസ്യാസ്യ രാജര്ഷേഃകര്തും വ്യവസിതോഽസ്മ്യഹമ് ॥ 21 ॥
ഭോജനേന മഹാര്ഹേണ സത്കാരം സംവിധത്സ്വ മേ ।
യസ്യ യസ്യ യഥാകാമം ഷഡ്രസേഷ്വഭിപൂജിതമ് ।
തത്സർവം കാമധുക്ക്ഷിപ്രമഭിവര്ഷ കൃതേ മമ ॥ 22 ॥
രസേനാന്നേന പാനേന ലേഹ്യചോഷ്യേണ സംയുതമ് ।
അന്നാനാം നിചയം സർവം സൃജസ്വ ശബലേ ത്വര ॥ 23 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ദ്വിപംചാശസ്സര്ഗഃ ॥
