ශ්රීමද්වාල්මීකීය රාමායණේ බාලකාංඩම් ।
අථ ද්විපංචාශස්සර්ගඃ ।
ස දෘෂ්ට්වා පරමප්රීතෝ විශ්වාමිත්රෝ මහාබලඃ ।
ප්රණතෝ විනයාද්වීරෝ වසිෂ්ඨං ජපතාං වරම් ॥ 1 ॥
ස්වාගතං තව චේත්යුක්තෝ වසිෂ්ඨේන මහාත්මනා ।
ආසනං චාස්ය භගවාන් වසිෂ්ඨෝ ව්යාදිදේශ හ ॥ 2 ॥
උපවිෂ්ටාය ච තදා විශ්වාමිත්රාය ධීමතේ ।
යථාන්යායං මුනිවරඃ ඵලමූලමුපාහරත් ॥ 3 ॥
ප්රතිගෘහ්ය තු තාං පූජාං වසිෂ්ඨාද්රාජසත්තමඃ ।
තපෝග්නිහෝත්රශිෂ්යේෂු කුශලං පර්යපෘච්ඡත ॥ 4 ॥
විශ්වාමිත්රෝ මහාතේජා වනස්පතිගණේ තථා ।
සර්වත්ර කුශලං චාහ වසිෂ්ඨෝ රාජසත්තමම් ॥ 5 ॥
සුඛෝපවිෂ්ටං රාජානං විශ්වාමිත්රං මහාතපාඃ ।
පප්රච්ඡ ජපතාං ශ්රේෂ්ඨෝ වසිෂ්ඨෝ බ්රහ්මණස්සුතඃ ॥ 6 ॥
කච්චිත්තේ කුශලං රාජන් කච්චිද්ධර්මේණ රංජයන් ।
ප්රජාඃ පාලයසේ වීර රාජවෘත්තේන ධාර්මික ॥ 7 ॥
කච්චිත්තේ සංභෘතා භෘත්යාඃ කච්චිත්තිෂ්ඨංති ශාසනේ ।
කච්චිත්තේ විජිතාස්සර්වේ රිපවෝ රිපුසූදන ॥ 8 ॥
කච්චිද්බලේෂු කෝශේෂු මිත්රේෂු ච පරංතප ।
කුශලං තේ නරව්යාඝ්ර පුත්රපෞත්රේ තවානඝ ॥ 9 ॥
සර්වත්ර කුශලං රාජා වසිෂ්ඨං ප්රත්යුදාහරත් ।
විශ්වාමිත්රෝ මහාතේජා වසිෂ්ඨං විනයාන්විතඃ ॥ 10 ॥
කෘත්වෝභෞ සුචිරං කාලං ධර්මිෂ්ඨෞ තාඃ කථාඃ ශුභාඃ ।
මුදා පරමයා යුක්තෞ ප්රීයේතාං තෞ පරස්පරම් ॥ 11 ॥
තතෝ වසිෂ්ඨෝ භගවාන් කථාऽංතේ රඝුනංදන ।
විශ්වාමිත්රමිදං වාක්යමුවාච ප්රහසන්නිව ॥ 12 ॥
ආතිථ්යං කර්තුමිච්ඡාමි බලස්යාස්ය මහාබල ।
තව චෛවාප්රමේයස්ය යථාර්හං සංප්රතීච්ඡ මේ ॥ 13 ॥
සත්ක්රියාං තු භවානේතාං ප්රතීච්ඡතු මයෝද්යතාම් ।
රාජා ත්වමතිථිශ්රේෂ්ඨඃ පූජනීයඃ ප්රයත්නතඃ ॥ 14 ॥
ඒවමුක්තෝ වසිෂ්ඨේන විශ්වාමිත්රෝ මහාමතිඃ ।
කෘතමිත්යබ්රවීද්රාජා ප්රියවාක්යේන මේ ත්වයා ॥ 15 ॥
ඵලමූලේන භගවන් විද්යතේ යත්තවාශ්රමේ ।
පාද්යේනාචමනීයේන භගවද්දර්ශනේන ච ॥ 16 ॥
සර්වථා ච මහාප්රාජ්ඤ පූජාර්හේණ සුපූජිතඃ ।
ගමිෂ්යාමි නමස්තේऽස්තු මෛත්රේණේක්ෂස්ව චක්ෂුෂා ॥ 17 ॥
ඒවං බ්රුවංතං රාජානං වසිෂ්ඨඃපුනරේව හි ।
න්යමංත්රයත ධර්මාත්මා පුනඃපුනරුදාරධීඃ ॥ 18 ॥
බාඪමිත්යේව ගාධේයෝ වසිෂ්ඨං ප්රත්යුවාච හ ।
යථා ප්රියං භගවතස්තථාऽස්තු මුනිපුංගව ॥ 19 ॥
ඒවමුක්තෝ මහාතේජා වසිෂ්ඨෝ ජපතාං වරඃ ।
ආජුහාව තතඃ ප්රීතඃ කල්මාෂීං ධූතකල්මෂඃ ॥ 20 ॥
ඒහ්යේහි ශබලේ ක්ෂිප්රං ශ්රෘණු චාපි වචෝ මම ।
සබලස්යාස්ය රාජර්ෂේඃකර්තුං ව්යවසිතෝऽස්ම්යහම් ॥ 21 ॥
භෝජනේන මහාර්හේණ සත්කාරං සංවිධත්ස්ව මේ ।
යස්ය යස්ය යථාකාමං ෂඩ්රසේෂ්වභිපූජිතම් ।
තත්සර්වං කාමධුක්ක්ෂිප්රමභිවර්ෂ කෘතේ මම ॥ 22 ॥
රසේනාන්නේන පානේන ලේහ්යචෝෂ්යේණ සංයුතම් ।
අන්නානාං නිචයං සර්වං සෘජස්ව ශබලේ ත්වර ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ද්විපංචාශස්සර්ගඃ ॥
