śrīmadvālmīkīya rāmāyaṇē bālakāṇḍam ।
atha dvipañchāśassargaḥ ।
sa dṛṣṭvā paramaprītō viśvāmitrō mahābalaḥ ।
praṇatō vinayādvīrō vasiṣṭhaṃ japatāṃ varam ॥ 1 ॥
svāgataṃ tava chētyuktō vasiṣṭhēna mahātmanā ।
āsanaṃ chāsya bhagavān vasiṣṭhō vyādidēśa ha ॥ 2 ॥
upaviṣṭāya cha tadā viśvāmitrāya dhīmatē ।
yathānyāyaṃ munivaraḥ phalamūlamupāharat ॥ 3 ॥
pratigṛhya tu tāṃ pūjāṃ vasiṣṭhādrājasattamaḥ ।
tapōgnihōtraśiṣyēṣu kuśalaṃ paryapṛchChata ॥ 4 ॥
viśvāmitrō mahātējā vanaspatigaṇē tathā ।
sarvatra kuśalaṃ chāha vasiṣṭhō rājasattamam ॥ 5 ॥
sukhōpaviṣṭaṃ rājānaṃ viśvāmitraṃ mahātapāḥ ।
paprachCha japatāṃ śrēṣṭhō vasiṣṭhō brahmaṇassutaḥ ॥ 6 ॥
kachchittē kuśalaṃ rājan kachchiddharmēṇa rañjayan ।
prajāḥ pālayasē vīra rājavṛttēna dhārmika ॥ 7 ॥
kachchittē sambhṛtā bhṛtyāḥ kachchittiṣṭhanti śāsanē ।
kachchittē vijitāssarvē ripavō ripusūdana ॥ 8 ॥
kachchidbalēṣu kōśēṣu mitrēṣu cha parantapa ।
kuśalaṃ tē naravyāghra putrapautrē tavānagha ॥ 9 ॥
sarvatra kuśalaṃ rājā vasiṣṭhaṃ pratyudāharat ।
viśvāmitrō mahātējā vasiṣṭhaṃ vinayānvitaḥ ॥ 10 ॥
kṛtvōbhau suchiraṃ kālaṃ dharmiṣṭhau tāḥ kathāḥ śubhāḥ ।
mudā paramayā yuktau prīyētāṃ tau parasparam ॥ 11 ॥
tatō vasiṣṭhō bhagavān kathā'ntē raghunandana ।
viśvāmitramidaṃ vākyamuvācha prahasanniva ॥ 12 ॥
ātithyaṃ kartumichChāmi balasyāsya mahābala ।
tava chaivāpramēyasya yathārhaṃ sampratīchCha mē ॥ 13 ॥
satkriyāṃ tu bhavānētāṃ pratīchChatu mayōdyatām ।
rājā tvamatithiśrēṣṭhaḥ pūjanīyaḥ prayatnataḥ ॥ 14 ॥
ēvamuktō vasiṣṭhēna viśvāmitrō mahāmatiḥ ।
kṛtamityabravīdrājā priyavākyēna mē tvayā ॥ 15 ॥
phalamūlēna bhagavan vidyatē yattavāśramē ।
pādyēnāchamanīyēna bhagavaddarśanēna cha ॥ 16 ॥
sarvathā cha mahāprājña pūjārhēṇa supūjitaḥ ।
gamiṣyāmi namastē'stu maitrēṇēkṣasva chakṣuṣā ॥ 17 ॥
ēvaṃ bruvantaṃ rājānaṃ vasiṣṭhaḥpunarēva hi ।
nyamantrayata dharmātmā punaḥpunarudāradhīḥ ॥ 18 ॥
bāḍhamityēva gādhēyō vasiṣṭhaṃ pratyuvācha ha ।
yathā priyaṃ bhagavatastathā'stu munipuṅgava ॥ 19 ॥
ēvamuktō mahātējā vasiṣṭhō japatāṃ varaḥ ।
ājuhāva tataḥ prītaḥ kalmāṣīṃ dhūtakalmaṣaḥ ॥ 20 ॥
ēhyēhi śabalē kṣipraṃ śrṛṇu chāpi vachō mama ।
sabalasyāsya rājarṣēḥkartuṃ vyavasitō'smyaham ॥ 21 ॥
bhōjanēna mahārhēṇa satkāraṃ saṃvidhatsva mē ।
yasya yasya yathākāmaṃ ṣaḍrasēṣvabhipūjitam ।
tatsarvaṃ kāmadhukkṣipramabhivarṣa kṛtē mama ॥ 22 ॥
rasēnānnēna pānēna lēhyachōṣyēṇa saṃyutam ।
annānāṃ nichayaṃ sarvaṃ sṛjasva śabalē tvara ॥ 23 ॥
ityārṣē śrīmadrāmāyaṇē vālmīkīya ādikāvyē bālakāṇḍē dvipañchāśassargaḥ ॥
