ശ്രീമദ്വാല്മീകീയ രാമായണേ ബാലകാംഡമ് ।
അഥ പംചപംചാശസ്സര്ഗഃ ।
തതസ്താനാകുലാന് ദൃഷ്ട്വാ വിശ്വാമിത്രാസ്ത്രമോഹിതാന് ।
വസിഷ്ഠശ്ചോദയാമാസ കാമധുക് സൃജ യോഗതഃ ॥ 1 ॥
തസ്യാഹുംഭാരവാജ്ജാതാഃ കാംഭോജാ രവിസന്നിഭാഃ ।
ഊധസസ്ത്വഥ സംജാതാഃ പപ്ലവാശ്ശസ്ത്രപാണയഃ ॥ 2 ॥
യോനിദേശാച്ച യവനാശ്ശകൃദ്ദേശാച്ഛകാ സ്തഥാ ।
രോമകൂപേഷു ച മ്ലേച്ഛാ ഹാരീതാസ്സകിരാതകാഃ ॥ 3 ॥
തൈസ്തൈര്നിഷൂദിതം സർവം വിശ്വാമിത്രസ്യ തത്ക്ഷണാത് ।
സപദാതിഗജം സാശ്വം സരഥം രഘുനംദന ॥ 4 ॥
ദൃഷ്ട്വാ നിഷൂദിതം സൈന്യം വസിഷ്ഠേന മഹാത്മനാ ।
വിശ്വാമിത്രസുതാനാം ച ശതം നാനാവിധായുധമ് ॥ 5 ॥
അഭ്യധാവത്സുസംകൃദ്ധം വസിഷ്ഠം ജപതാം വരമ് ।
ഹുംകാരേണൈവ താന് സർവാന് ദദാഹ ഭഗവാന് ഋഷിഃ ॥ 6 ॥
തേ സാശ്വരഥപാദാതാ വസിഷ്ഠേന മഹാത്മനാ ।
ഭസ്മീകൃതാ മുഹൂര്തേന വിശ്വാമിത്രസുതാ സ്തദാ ॥ 7 ॥
ദൃഷ്ട്വാ വിനാശിതാന് പുത്രാന് ബലം ച സുമഹായശാഃ ।
സവ്രീഡശ്ചിംതയാഽവിഷ്ടോ വിശ്വാമിത്രോഽഭവത്തദാ ॥ 8 ॥
സമുദ്ര ഇവ നിർവേഗോ ഭഗ്നദംഷ്ട്ര ഇവോരഗഃ ।
ഉപരക്ത ഇവാദിത്യസ്സദ്യോ നിഷ്പ്രഭതാം ഗതഃ ॥ 9 ॥
ഹതപുത്രബലോ ദീനോ ലൂനപക്ഷ ഇവ ദ്വിജഃ ।
ഹതദര്പോ ഹതോത്സാഹോ നിർവേദം സമപദ്യത ॥ 10 ॥
സ പുത്രമേകം രാജ്യായ പാലയേതി നിയുജ്യ ച ।
പൃഥിവീം ക്ഷത്രധര്മേണ വനമേവാന്വപദ്യത ॥ 11 ॥
സ ഗത്വാ ഹിമവത്പാര്ശ്വം കിന്നരോരഗസേവിതമ് ।
മഹാദേവപ്രസാദാര്ഥം തപസ്തേപേ മഹാതപാഃ ॥ 12 ॥
കേനചിത്ത്വഥ കാലേന ദേവേശോ വൃഷഭധ്വജഃ ।
ദര്ശയാമാസ വരദോ വിശ്വാമിത്രം മഹാബലമ് ॥ 13 ॥
കിമര്ഥം തപ്യസേ രാജന് ബ്രൂഹി യത്തേ വിവക്ഷിതമ് ।
വരദോഽസ്മി വരോ യസ്തേ കാംക്ഷിതസ്സോഽഭിധീയതാമ് ॥ 14 ॥
ഏവമുക്തസ്തു ദേവേന വിശ്വാമിത്രോ മഹാതപാഃ ।
പ്രണിപത്യ മഹാദേവമിദം വചനമബ്രവീത് ॥ 15 ॥
യദി തുഷ്ടോ മഹാദേവ ധനുർവേദോ മമാനഘ ।
സാംഗോപാംഗോപനിഷദസ്സരഹസ്യഃ പ്രദീയതാമ് ॥ 16 ॥
യാനി ദേവേഷു ചാസ്ത്രാണി ദാനവേഷു മഹര്ഷിഷു ।
ഗംധർവയക്ഷരക്ഷസ്സു പ്രതിഭാംതു മമാനഘ ॥ 17 ॥
തവ പ്രസാദാദ്ഭവതു ദേവദേവമമേപ്സിതമ് ।
ഏവമസ്ത്വിതി ദേവേശോ വാക്യമുക്ത്വാ ഗതസ്തദാ ॥ 18 ॥
പ്രാപ്യ ചാസ്ത്രാണി രാജര്ഷിർവിശ്വാമിത്രോ മഹാബലഃ ।
ദര്പേണ മഹതാ യുക്തോ ദര്പപൂര്ണോഽഭവത്തദാ ॥ 19 ॥
വിവര്ധമാനോ വീര്യേണ സമുദ്ര ഇവ പർവണി ।
ഹതമേവ തദാ മേനേ വസിഷ്ഠമൃഷിസത്തമമ് ॥ 20 ॥
തതോ ഗത്വാഽഽശ്രമപദം മുമോചാസ്ത്രാണി പാര്ഥിവഃ ।
യൈസ്തത്തപോവനം സർവം നിര്ദഗ്ധം ചാസ്ത്രതേജസാ ॥ 21 ॥
ഉദീര്യമാണമസ്ത്രം തദ്വിശ്വാമിത്രസ്യ ധീമതഃ ।
ദൃഷ്ട്വാ വിപ്രദ്രുതാസ്സർവേ മുനയശ്ശതശോ ദിശഃ ॥ 22 ॥
വസിഷ്ഠസ്യ ച യേ ശിഷ്യാസ്തഥൈവ മൃഗപക്ഷിണഃ ।
വിദ്രവംതി ഭയാദ്ഭീതാ നാനാദിഗ്ഭ്യസ്സഹസ്രശഃ ॥ 23 ॥
വസിഷ്ഠസ്യാശ്രമപദം ശൂന്യമാസീന്മഹാത്മനഃ ।
മുഹൂര്തമിവ നിശ്ശബ്ദമാസീദിരിണസന്നിഭമ് ॥ 24 ॥
വദതോ വൈ വസിഷ്ഠസ്യ മാ ഭൈരിതി മുഹുര്മുഹുഃ ।
നാശയാമ്യദ്യ ഗാധേയം നീഹാരമിവ ഭാസ്കരഃ ॥ 25 ॥
ഏവമുക്ത്വാ മഹാതേജാ വസിഷ്ഠോ ജപതാം വരഃ ।
വിശ്വാമിത്രം തദാ വാക്യം സരോഷമിദമബ്രവീത് ॥ 26 ॥
ആശ്രമം ചിരസമ്വൃദ്ധം യദ്വിനാശിതവാനസി ।
ദുരാചാരോഽസി തന്മൂഢ തസ്മാത്ത്വം ന ഭവിഷ്യസി ॥ 27 ॥
ഇത്യുക്ത്വാ പരമക്രുദ്ധോ ദംഡമുദ്യമ്യ സത്വരഃ ।
വിധൂമമിവ കാലാഗ്നിം യമദംഡമിവാപരമ് ॥ 28 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ പംചപംചാശസ്സര്ഗഃ ॥
