śrīmadvālmīkīya rāmāyaṇē bālakāṇḍam ।
atha pañchapañchāśassargaḥ ।
tatastānākulān dṛṣṭvā viśvāmitrāstramōhitān ।
vasiṣṭhaśchōdayāmāsa kāmadhuk sṛja yōgataḥ ॥ 1 ॥
tasyāhumbhāravājjātāḥ kāmbhōjā ravisannibhāḥ ।
ūdhasastvatha sañjātāḥ paplavāśśastrapāṇayaḥ ॥ 2 ॥
yōnidēśāchcha yavanāśśakṛddēśāchChakā stathā ।
rōmakūpēṣu cha mlēchChā hārītāssakirātakāḥ ॥ 3 ॥
taistairniṣūditaṃ sarvaṃ viśvāmitrasya tatkṣaṇāt ।
sapadātigajaṃ sāśvaṃ sarathaṃ raghunandana ॥ 4 ॥
dṛṣṭvā niṣūditaṃ sainyaṃ vasiṣṭhēna mahātmanā ।
viśvāmitrasutānāṃ cha śataṃ nānāvidhāyudham ॥ 5 ॥
abhyadhāvatsusaṅkṛddhaṃ vasiṣṭhaṃ japatāṃ varam ।
huṅkārēṇaiva tān sarvān dadāha bhagavān ṛṣiḥ ॥ 6 ॥
tē sāśvarathapādātā vasiṣṭhēna mahātmanā ।
bhasmīkṛtā muhūrtēna viśvāmitrasutā stadā ॥ 7 ॥
dṛṣṭvā vināśitān putrān balaṃ cha sumahāyaśāḥ ।
savrīḍaśchintayā'viṣṭō viśvāmitrō'bhavattadā ॥ 8 ॥
samudra iva nirvēgō bhagnadaṃṣṭra ivōragaḥ ।
uparakta ivādityassadyō niṣprabhatāṃ gataḥ ॥ 9 ॥
hataputrabalō dīnō lūnapakṣa iva dvijaḥ ।
hatadarpō hatōtsāhō nirvēdaṃ samapadyata ॥ 10 ॥
sa putramēkaṃ rājyāya pālayēti niyujya cha ।
pṛthivīṃ kṣatradharmēṇa vanamēvānvapadyata ॥ 11 ॥
sa gatvā himavatpārśvaṃ kinnarōragasēvitam ।
mahādēvaprasādārthaṃ tapastēpē mahātapāḥ ॥ 12 ॥
kēnachittvatha kālēna dēvēśō vṛṣabhadhvajaḥ ।
darśayāmāsa varadō viśvāmitraṃ mahābalam ॥ 13 ॥
kimarthaṃ tapyasē rājan brūhi yattē vivakṣitam ।
varadō'smi varō yastē kāṅkṣitassō'bhidhīyatām ॥ 14 ॥
ēvamuktastu dēvēna viśvāmitrō mahātapāḥ ।
praṇipatya mahādēvamidaṃ vachanamabravīt ॥ 15 ॥
yadi tuṣṭō mahādēva dhanurvēdō mamānagha ।
sāṅgōpāṅgōpaniṣadassarahasyaḥ pradīyatām ॥ 16 ॥
yāni dēvēṣu chāstrāṇi dānavēṣu maharṣiṣu ।
gandharvayakṣarakṣassu pratibhāntu mamānagha ॥ 17 ॥
tava prasādādbhavatu dēvadēvamamēpsitam ।
ēvamastviti dēvēśō vākyamuktvā gatastadā ॥ 18 ॥
prāpya chāstrāṇi rājarṣirviśvāmitrō mahābalaḥ ।
darpēṇa mahatā yuktō darpapūrṇō'bhavattadā ॥ 19 ॥
vivardhamānō vīryēṇa samudra iva parvaṇi ।
hatamēva tadā mēnē vasiṣṭhamṛṣisattamam ॥ 20 ॥
tatō gatvā''śramapadaṃ mumōchāstrāṇi pārthivaḥ ।
yaistattapōvanaṃ sarvaṃ nirdagdhaṃ chāstratējasā ॥ 21 ॥
udīryamāṇamastraṃ tadviśvāmitrasya dhīmataḥ ।
dṛṣṭvā vipradrutāssarvē munayaśśataśō diśaḥ ॥ 22 ॥
vasiṣṭhasya cha yē śiṣyāstathaiva mṛgapakṣiṇaḥ ।
vidravanti bhayādbhītā nānādigbhyassahasraśaḥ ॥ 23 ॥
vasiṣṭhasyāśramapadaṃ śūnyamāsīnmahātmanaḥ ।
muhūrtamiva niśśabdamāsīdiriṇasannibham ॥ 24 ॥
vadatō vai vasiṣṭhasya mā bhairiti muhurmuhuḥ ।
nāśayāmyadya gādhēyaṃ nīhāramiva bhāskaraḥ ॥ 25 ॥
ēvamuktvā mahātējā vasiṣṭhō japatāṃ varaḥ ।
viśvāmitraṃ tadā vākyaṃ sarōṣamidamabravīt ॥ 26 ॥
āśramaṃ chirasamvṛddhaṃ yadvināśitavānasi ।
durāchārō'si tanmūḍha tasmāttvaṃ na bhaviṣyasi ॥ 27 ॥
ityuktvā paramakruddhō daṇḍamudyamya satvaraḥ ।
vidhūmamiva kālāgniṃ yamadaṇḍamivāparam ॥ 28 ॥
ityārṣē śrīmadrāmāyaṇē vālmīkīya ādikāvyē bālakāṇḍē pañchapañchāśassargaḥ ॥
