ශ්රීමද්වාල්මීකීය රාමායණේ බාලකාංඩම් ।
අථ පංචපංචාශස්සර්ගඃ ।
තතස්තානාකුලාන් දෘෂ්ට්වා විශ්වාමිත්රාස්ත්රමෝහිතාන් ।
වසිෂ්ඨශ්චෝදයාමාස කාමධුක් සෘජ යෝගතඃ ॥ 1 ॥
තස්යාහුංභාරවාජ්ජාතාඃ කාංභෝජා රවිසන්නිභාඃ ।
ඌධසස්ත්වථ සංජාතාඃ පප්ලවාශ්ශස්ත්රපාණයඃ ॥ 2 ॥
යෝනිදේශාච්ච යවනාශ්ශකෘද්දේශාච්ඡකා ස්තථා ।
රෝමකූපේෂු ච ම්ලේච්ඡා හාරීතාස්සකිරාතකාඃ ॥ 3 ॥
තෛස්තෛර්නිෂූදිතං සර්වං විශ්වාමිත්රස්ය තත්ක්ෂණාත් ।
සපදාතිගජං සාශ්වං සරථං රඝුනංදන ॥ 4 ॥
දෘෂ්ට්වා නිෂූදිතං සෛන්යං වසිෂ්ඨේන මහාත්මනා ।
විශ්වාමිත්රසුතානාං ච ශතං නානාවිධායුධම් ॥ 5 ॥
අභ්යධාවත්සුසංකෘද්ධං වසිෂ්ඨං ජපතාං වරම් ।
හුංකාරේණෛව තාන් සර්වාන් දදාහ භගවාන් ඍෂිඃ ॥ 6 ॥
තේ සාශ්වරථපාදාතා වසිෂ්ඨේන මහාත්මනා ।
භස්මීකෘතා මුහූර්තේන විශ්වාමිත්රසුතා ස්තදා ॥ 7 ॥
දෘෂ්ට්වා විනාශිතාන් පුත්රාන් බලං ච සුමහායශාඃ ।
සව්රීඩශ්චිංතයාऽවිෂ්ටෝ විශ්වාමිත්රෝऽභවත්තදා ॥ 8 ॥
සමුද්ර ඉව නිර්වේගෝ භග්නදංෂ්ට්ර ඉවෝරගඃ ।
උපරක්ත ඉවාදිත්යස්සද්යෝ නිෂ්ප්රභතාං ගතඃ ॥ 9 ॥
හතපුත්රබලෝ දීනෝ ලූනපක්ෂ ඉව ද්විජඃ ।
හතදර්පෝ හතෝත්සාහෝ නිර්වේදං සමපද්යත ॥ 10 ॥
ස පුත්රමේකං රාජ්යාය පාලයේති නියුජ්ය ච ।
පෘථිවීං ක්ෂත්රධර්මේණ වනමේවාන්වපද්යත ॥ 11 ॥
ස ගත්වා හිමවත්පාර්ශ්වං කින්නරෝරගසේවිතම් ।
මහාදේවප්රසාදාර්ථං තපස්තේපේ මහාතපාඃ ॥ 12 ॥
කේනචිත්ත්වථ කාලේන දේවේශෝ වෘෂභධ්වජඃ ।
දර්ශයාමාස වරදෝ විශ්වාමිත්රං මහාබලම් ॥ 13 ॥
කිමර්ථං තප්යසේ රාජන් බ්රූහි යත්තේ විවක්ෂිතම් ।
වරදෝऽස්මි වරෝ යස්තේ කාංක්ෂිතස්සෝऽභිධීයතාම් ॥ 14 ॥
ඒවමුක්තස්තු දේවේන විශ්වාමිත්රෝ මහාතපාඃ ।
ප්රණිපත්ය මහාදේවමිදං වචනමබ්රවීත් ॥ 15 ॥
යදි තුෂ්ටෝ මහාදේව ධනුර්වේදෝ මමානඝ ।
සාංගෝපාංගෝපනිෂදස්සරහස්යඃ ප්රදීයතාම් ॥ 16 ॥
යානි දේවේෂු චාස්ත්රාණි දානවේෂු මහර්ෂිෂු ।
ගංධර්වයක්ෂරක්ෂස්සු ප්රතිභාංතු මමානඝ ॥ 17 ॥
තව ප්රසාදාද්භවතු දේවදේවමමේප්සිතම් ।
ඒවමස්ත්විති දේවේශෝ වාක්යමුක්ත්වා ගතස්තදා ॥ 18 ॥
ප්රාප්ය චාස්ත්රාණි රාජර්ෂිර්විශ්වාමිත්රෝ මහාබලඃ ।
දර්පේණ මහතා යුක්තෝ දර්පපූර්ණෝऽභවත්තදා ॥ 19 ॥
විවර්ධමානෝ වීර්යේණ සමුද්ර ඉව පර්වණි ।
හතමේව තදා මේනේ වසිෂ්ඨමෘෂිසත්තමම් ॥ 20 ॥
තතෝ ගත්වාऽऽශ්රමපදං මුමෝචාස්ත්රාණි පාර්ථිවඃ ।
යෛස්තත්තපෝවනං සර්වං නිර්දග්ධං චාස්ත්රතේජසා ॥ 21 ॥
උදීර්යමාණමස්ත්රං තද්විශ්වාමිත්රස්ය ධීමතඃ ।
දෘෂ්ට්වා විප්රද්රුතාස්සර්වේ මුනයශ්ශතශෝ දිශඃ ॥ 22 ॥
වසිෂ්ඨස්ය ච යේ ශිෂ්යාස්තථෛව මෘගපක්ෂිණඃ ।
විද්රවංති භයාද්භීතා නානාදිග්භ්යස්සහස්රශඃ ॥ 23 ॥
වසිෂ්ඨස්යාශ්රමපදං ශූන්යමාසීන්මහාත්මනඃ ।
මුහූර්තමිව නිශ්ශබ්දමාසීදිරිණසන්නිභම් ॥ 24 ॥
වදතෝ වෛ වසිෂ්ඨස්ය මා භෛරිති මුහුර්මුහුඃ ।
නාශයාම්යද්ය ගාධේයං නීහාරමිව භාස්කරඃ ॥ 25 ॥
ඒවමුක්ත්වා මහාතේජා වසිෂ්ඨෝ ජපතාං වරඃ ।
විශ්වාමිත්රං තදා වාක්යං සරෝෂමිදමබ්රවීත් ॥ 26 ॥
ආශ්රමං චිරසම්වෘද්ධං යද්විනාශිතවානසි ।
දුරාචාරෝऽසි තන්මූඪ තස්මාත්ත්වං න භවිෂ්යසි ॥ 27 ॥
ඉත්යුක්ත්වා පරමක්රුද්ධෝ දංඩමුද්යම්ය සත්වරඃ ।
විධූමමිව කාලාග්නිං යමදංඩමිවාපරම් ॥ 28 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ පංචපංචාශස්සර්ගඃ ॥
