ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ପଂଚପଂଚାଶସ୍ସର୍ଗଃ ।
ତତସ୍ତାନାକୁଲାନ୍ ଦୃଷ୍ଟ୍ଵା ଵିଶ୍ଵାମିତ୍ରାସ୍ତ୍ରମୋହିତାନ୍ ।
ଵସିଷ୍ଠଶ୍ଚୋଦୟାମାସ କାମଧୁକ୍ ସୃଜ ୟୋଗତଃ ॥ 1 ॥
ତସ୍ୟାହୁଂଭାରଵାଜ୍ଜାତାଃ କାଂଭୋଜା ରଵିସନ୍ନିଭାଃ ।
ଊଧସସ୍ତ୍ଵଥ ସଂଜାତାଃ ପପ୍ଲଵାଶ୍ଶସ୍ତ୍ରପାଣୟଃ ॥ 2 ॥
ୟୋନିଦେଶାଚ୍ଚ ୟଵନାଶ୍ଶକୃଦ୍ଦେଶାଚ୍ଛକା ସ୍ତଥା ।
ରୋମକୂପେଷୁ ଚ ମ୍ଲେଚ୍ଛା ହାରୀତାସ୍ସକିରାତକାଃ ॥ 3 ॥
ତୈସ୍ତୈର୍ନିଷୂଦିତଂ ସର୍ଵଂ ଵିଶ୍ଵାମିତ୍ରସ୍ୟ ତତ୍କ୍ଷଣାତ୍ ।
ସପଦାତିଗଜଂ ସାଶ୍ଵଂ ସରଥଂ ରଘୁନଂଦନ ॥ 4 ॥
ଦୃଷ୍ଟ୍ଵା ନିଷୂଦିତଂ ସୈନ୍ୟଂ ଵସିଷ୍ଠେନ ମହାତ୍ମନା ।
ଵିଶ୍ଵାମିତ୍ରସୁତାନାଂ ଚ ଶତଂ ନାନାଵିଧାୟୁଧମ୍ ॥ 5 ॥
ଅଭ୍ୟଧାଵତ୍ସୁସଂକୃଦ୍ଧଂ ଵସିଷ୍ଠଂ ଜପତାଂ ଵରମ୍ ।
ହୁଂକାରେଣୈଵ ତାନ୍ ସର୍ଵାନ୍ ଦଦାହ ଭଗଵାନ୍ ଋଷିଃ ॥ 6 ॥
ତେ ସାଶ୍ଵରଥପାଦାତା ଵସିଷ୍ଠେନ ମହାତ୍ମନା ।
ଭସ୍ମୀକୃତା ମୁହୂର୍ତେନ ଵିଶ୍ଵାମିତ୍ରସୁତା ସ୍ତଦା ॥ 7 ॥
ଦୃଷ୍ଟ୍ଵା ଵିନାଶିତାନ୍ ପୁତ୍ରାନ୍ ବଲଂ ଚ ସୁମହାୟଶାଃ ।
ସଵ୍ରୀଡଶ୍ଚିଂତୟାଽଵିଷ୍ଟୋ ଵିଶ୍ଵାମିତ୍ରୋଽଭଵତ୍ତଦା ॥ 8 ॥
ସମୁଦ୍ର ଇଵ ନିର୍ଵେଗୋ ଭଗ୍ନଦଂଷ୍ଟ୍ର ଇଵୋରଗଃ ।
ଉପରକ୍ତ ଇଵାଦିତ୍ୟସ୍ସଦ୍ୟୋ ନିଷ୍ପ୍ରଭତାଂ ଗତଃ ॥ 9 ॥
ହତପୁତ୍ରବଲୋ ଦୀନୋ ଲୂନପକ୍ଷ ଇଵ ଦ୍ଵିଜଃ ।
ହତଦର୍ପୋ ହତୋତ୍ସାହୋ ନିର୍ଵେଦଂ ସମପଦ୍ୟତ ॥ 10 ॥
ସ ପୁତ୍ରମେକଂ ରାଜ୍ୟାୟ ପାଲୟେତି ନିୟୁଜ୍ୟ ଚ ।
ପୃଥିଵୀଂ କ୍ଷତ୍ରଧର୍ମେଣ ଵନମେଵାନ୍ଵପଦ୍ୟତ ॥ 11 ॥
ସ ଗତ୍ଵା ହିମଵତ୍ପାର୍ଶ୍ଵଂ କିନ୍ନରୋରଗସେଵିତମ୍ ।
ମହାଦେଵପ୍ରସାଦାର୍ଥଂ ତପସ୍ତେପେ ମହାତପାଃ ॥ 12 ॥
କେନଚିତ୍ତ୍ଵଥ କାଲେନ ଦେଵେଶୋ ଵୃଷଭଧ୍ଵଜଃ ।
ଦର୍ଶୟାମାସ ଵରଦୋ ଵିଶ୍ଵାମିତ୍ରଂ ମହାବଲମ୍ ॥ 13 ॥
କିମର୍ଥଂ ତପ୍ୟସେ ରାଜନ୍ ବ୍ରୂହି ୟତ୍ତେ ଵିଵକ୍ଷିତମ୍ ।
ଵରଦୋଽସ୍ମି ଵରୋ ୟସ୍ତେ କାଂକ୍ଷିତସ୍ସୋଽଭିଧୀୟତାମ୍ ॥ 14 ॥
ଏଵମୁକ୍ତସ୍ତୁ ଦେଵେନ ଵିଶ୍ଵାମିତ୍ରୋ ମହାତପାଃ ।
ପ୍ରଣିପତ୍ୟ ମହାଦେଵମିଦଂ ଵଚନମବ୍ରଵୀତ୍ ॥ 15 ॥
ୟଦି ତୁଷ୍ଟୋ ମହାଦେଵ ଧନୁର୍ଵେଦୋ ମମାନଘ ।
ସାଂଗୋପାଂଗୋପନିଷଦସ୍ସରହସ୍ୟଃ ପ୍ରଦୀୟତାମ୍ ॥ 16 ॥
ୟାନି ଦେଵେଷୁ ଚାସ୍ତ୍ରାଣି ଦାନଵେଷୁ ମହର୍ଷିଷୁ ।
ଗଂଧର୍ଵୟକ୍ଷରକ୍ଷସ୍ସୁ ପ୍ରତିଭାଂତୁ ମମାନଘ ॥ 17 ॥
ତଵ ପ୍ରସାଦାଦ୍ଭଵତୁ ଦେଵଦେଵମମେପ୍ସିତମ୍ ।
ଏଵମସ୍ତ୍ଵିତି ଦେଵେଶୋ ଵାକ୍ୟମୁକ୍ତ୍ଵା ଗତସ୍ତଦା ॥ 18 ॥
ପ୍ରାପ୍ୟ ଚାସ୍ତ୍ରାଣି ରାଜର୍ଷିର୍ଵିଶ୍ଵାମିତ୍ରୋ ମହାବଲଃ ।
ଦର୍ପେଣ ମହତା ୟୁକ୍ତୋ ଦର୍ପପୂର୍ଣୋଽଭଵତ୍ତଦା ॥ 19 ॥
ଵିଵର୍ଧମାନୋ ଵୀର୍ୟେଣ ସମୁଦ୍ର ଇଵ ପର୍ଵଣି ।
ହତମେଵ ତଦା ମେନେ ଵସିଷ୍ଠମୃଷିସତ୍ତମମ୍ ॥ 20 ॥
ତତୋ ଗତ୍ଵାଽଽଶ୍ରମପଦଂ ମୁମୋଚାସ୍ତ୍ରାଣି ପାର୍ଥିଵଃ ।
ୟୈସ୍ତତ୍ତପୋଵନଂ ସର୍ଵଂ ନିର୍ଦଗ୍ଧଂ ଚାସ୍ତ୍ରତେଜସା ॥ 21 ॥
ଉଦୀର୍ୟମାଣମସ୍ତ୍ରଂ ତଦ୍ଵିଶ୍ଵାମିତ୍ରସ୍ୟ ଧୀମତଃ ।
ଦୃଷ୍ଟ୍ଵା ଵିପ୍ରଦ୍ରୁତାସ୍ସର୍ଵେ ମୁନୟଶ୍ଶତଶୋ ଦିଶଃ ॥ 22 ॥
ଵସିଷ୍ଠସ୍ୟ ଚ ୟେ ଶିଷ୍ୟାସ୍ତଥୈଵ ମୃଗପକ୍ଷିଣଃ ।
ଵିଦ୍ରଵଂତି ଭୟାଦ୍ଭୀତା ନାନାଦିଗ୍ଭ୍ୟସ୍ସହସ୍ରଶଃ ॥ 23 ॥
ଵସିଷ୍ଠସ୍ୟାଶ୍ରମପଦଂ ଶୂନ୍ୟମାସୀନ୍ମହାତ୍ମନଃ ।
ମୁହୂର୍ତମିଵ ନିଶ୍ଶବ୍ଦମାସୀଦିରିଣସନ୍ନିଭମ୍ ॥ 24 ॥
ଵଦତୋ ଵୈ ଵସିଷ୍ଠସ୍ୟ ମା ଭୈରିତି ମୁହୁର୍ମୁହୁଃ ।
ନାଶୟାମ୍ୟଦ୍ୟ ଗାଧେୟଂ ନୀହାରମିଵ ଭାସ୍କରଃ ॥ 25 ॥
ଏଵମୁକ୍ତ୍ଵା ମହାତେଜା ଵସିଷ୍ଠୋ ଜପତାଂ ଵରଃ ।
ଵିଶ୍ଵାମିତ୍ରଂ ତଦା ଵାକ୍ୟଂ ସରୋଷମିଦମବ୍ରଵୀତ୍ ॥ 26 ॥
ଆଶ୍ରମଂ ଚିରସମ୍ଵୃଦ୍ଧଂ ୟଦ୍ଵିନାଶିତଵାନସି ।
ଦୁରାଚାରୋଽସି ତନ୍ମୂଢ ତସ୍ମାତ୍ତ୍ଵଂ ନ ଭଵିଷ୍ୟସି ॥ 27 ॥
ଇତ୍ୟୁକ୍ତ୍ଵା ପରମକ୍ରୁଦ୍ଧୋ ଦଂଡମୁଦ୍ୟମ୍ୟ ସତ୍ଵରଃ ।
ଵିଧୂମମିଵ କାଲାଗ୍ନିଂ ୟମଦଂଡମିଵାପରମ୍ ॥ 28 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ପଂଚପଂଚାଶସ୍ସର୍ଗଃ ॥
