ശ്രീമദ്വാല്മീകീയ രാമായണേ ബാലകാംഡമ് ।
അഥ ഷഷ്ഠസ്സര്ഗഃ ।
. തസ്യാം പുര്യാമയോധ്യായാം വേദവിത്സർവസംഗ്രഹഃ ।
ദീര്ഘദര്ശീ മഹാതേജാഃ പൌരജാനപദപ്രിയഃ ॥ 1 ॥
ഇക്ഷ്വാകൂണാമതിരഥോ യജ്വാ ധര്മരതോ വശീ ।
മഹര്ഷികല്പോ രാജര്ഷിസ്ത്രിഷു ലോകേഷു വിശ്രുതഃ ॥ 2 ॥
ബലവാന്നിഹതാമിത്രോ മിത്രവാന്വിജിതേംദ്രിയഃ ।
ധനൈശ്ച സംഗ്രഹൈശ്ചാന്യൈശ്ശക്രവൈശ്രവണോപമഃ ॥ 3 ॥
യഥാ മനുര്മഹാതേജാ ലോകസ്യ പരിരക്ഷിതാ ।
തഥാ ദശരഥോ രാജാ വസംജഗദപാലയത് ॥ 4 ॥
തേന സത്യാഭിസംധേന ത്രിവര്ഗമനുതിഷ്ഠതാ ।
പാലിതാ സാ പുരീ ശ്രേഷ്ഠാ ഇംദ്രേണേവാമരാവതീ ॥ 5 ॥
തസ്മിന്പുരവരേ ഹൃഷ്ടാ ധര്മാത്മാനോ ബഹുശ്രുതാഃ ।
നരാസ്തുഷ്ടാ ധനൈസ്സ്വൈസ്സ്വൈരലുബ്ധാസ്സത്യവാദിനഃ ॥ 6 ॥
നാല്പസന്നിചയഃ കശ്ചിദാസീത്തസ്മിന് പുരോത്തമേ ।
കുടുംബീ യോ ഹ്യസിദ്ധാര്ഥോഽഗവാശ്വധനധാന്യവാന് ॥ 7 ॥
കാമീ വാ ന കദര്യോ വാ നൃശംസഃ പുരുഷഃ ക്വചിത് ।
ദ്രഷ്ടും ശക്യമയോധ്യായാന്നാവിദ്വാന്ന ച നാസ്തികഃ ॥ 8 ॥
സർവേ നരാശ്ച നാര്യശ്ച ധര്മശീലാസ്സുസംയതാഃ ।
ഉദിതാശ്ശീലവൃത്താഭ്യാം മഹര്ഷയ ഇവാമലാഃ ॥ 9 ॥
നാകുംഡലീ നാമകുടീ നാസ്രഗ്വീ നാല്പഭോഗവാന് ।
നാമൃഷ്ടോ നാനുലിപ്താംഗോ നാസുഗംധശ്ച വിദ്യതേ ॥ 10 ॥
നാമൃഷ്ടഭോജീ നാദാതാ നാപ്യനംഗദനിഷ്കധൃക് ।
നാഹസ്താഭരണോ വാഽപി ദൃശ്യതേ നാപ്യനാത്മവാന് ॥ 11 ॥
നാനാഹിതാഗ്നിര്നായജ്വാ ന ക്ഷുദ്രോ വാ ന തസ്കരഃ ।
കശ്ചിദാസീദയോധ്യായാന്ന ച നിർവൃത്തസംകരഃ ॥ 12 ॥
സ്വകര്മനിരതാ നിത്യം ബ്രാഹ്മണാ വിജിതേംദ്രിയാഃ ।
ദാനാധ്യയനശീലാശ്ച സംയതാശ്ച പരിഗ്രഹേ ॥ 13 ॥
ന നാസ്തികോ നാനൃതകോ ന കശ്ചിദബഹുശ്രുതഃ ।
നാസൂയകോ ന ചാഽശക്തോ നാവിദ്വാന്വിദ്യതേ തദാ ॥ 14 ॥
നാഷഡംഗവിദത്രാസീന്നാവ്രതോ നാസഹസ്രദഃ ।
ന ദീനഃ ക്ഷിപ്തചിത്തോ വാ വ്യഥിതോ വാഽപി കശ്ചന ॥ 15 ॥
കശ്ചിന്നരോ വാ നാരീ വാ നാശ്രീമാന്നാപ്യരൂപവാന് ।
ദ്രഷ്ടും ശക്യമയോധ്യായാം നാപി രാജന്യഭക്തിമാന് ॥ 16 ॥
വര്ണേഷ്വഗ്ര്യചതുര്ഥേഷു ദേവതാതിഥിപൂജകാഃ ।
കൃതജ്ഞാശ്ച വദാന്യാശ്ച ശൂരാ വിക്രമസംയുതാഃ ॥ 17 ॥
ദീര്ഘായുഷോ നരാസ്സർവേ ധര്മം സത്യം ച സംശ്രിതാഃ ।
സഹിതാഃ പുത്രപൌത്രൈശ്ച നിത്യം സ്ത്രീഭിഃ പുരോത്തമേ ॥ 18 ॥
ക്ഷത്രം ബ്രഹ്മമുഖം ചാസീദ്വൈശ്യാഃ ക്ഷത്രമനുവ്രതാഃ ।
ശൂദ്രാസ്സ്വധര്മനിരതാസ്ത്രീന്വര്ണാനുപചാരിണഃ ॥ 19 ॥
സാ തേനേക്ഷ്വാകുനാഥേന പുരീ സുപരിരക്ഷിതാ ।
യഥാ പുരസ്താന്മനുനാ മാനവേംദ്രേണ ധീമതാ ॥ 20 ॥
യോധാനാമഗ്നികല്പാനാം പേശലാനാമമര്ഷിണാമ് ।
സംപൂര്ണാ കൃതവിദ്യാനാം ഗുഹാ കേസരിണാമിവ ॥ 21 ॥
കാംഭോജവിഷയേ ജാതൈര്ബാഹ്ലീകൈശ്ച ഹയോത്തമൈഃ ।
വനായുജൈര്നദീജൈശ്ച പൂര്ണാ ഹരിഹയോത്തമൈഃ ॥ 22 ॥
വിംധ്യപർവതജൈര്മത്തൈഃ പൂര്ണാ ഹൈമവതൈരപി ।
മദാന്വിതൈരതിബലൈര്മാതംഗൈഃ പർവതോപമൈഃ ॥ 23 ॥
ഐരാവതകുലീനൈശ്ച മഹാപദ്മകുലൈസ്തഥാ ।
അംജനാദപി നിഷ്പന്നൈർവാമനാദപി ച ദ്വിപൈഃ ॥ 24 ॥
ഭദ്രൈര്മംദ്രൈര്മൃഗൈശ്ചൈവ ഭദ്രമംദ്രമൃഗൈസ്തഥാ ।
ഭദ്രമംദ്രൈര്ഭദ്രമൃഗൈര്മൃഗമംദ്രൈശ്ച സാ പുരീ ।
നിത്യമത്തൈസ്സദാ പൂര്ണാ നാഗൈരചലസന്നിഭൈഃ ॥ 25 ॥
സാ യോജനേ ച ദ്വേ ഭൂയഃ സത്യനാമാ പ്രകാശതേ ।
യസ്യാം ദശരഥോ രാജാ വസന് ജഗദപാലയത് ॥ 26 ॥
താം പുരീം സ മഹാതേജാ രാജാ ദശരഥോ മഹാന് ।
ശശാസ ശമിതാമിത്രോ നക്ഷത്രാണീവ ചംദ്രമാഃ ॥ 27 ॥
താം സത്യനാമാം ദൃഢതോരണാര്ഗലാം ഗൃഹൈർവിചിത്രൈരുപശോഭിതാം ശിവാമ് ।
പുരീമയോധ്യാം നൃസഹസ്രസംകുലാം ശശാസ വൈ ശക്രസമോ മഹീപതിഃ ॥ 28 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഷഷ്ഠസ്സര്ഗഃ ॥
