ශ්රීමද්වාල්මීකීය රාමායණේ බාලකාංඩම් ।
අථ ෂෂ්ඨස්සර්ගඃ ।
. තස්යාං පුර්යාමයෝධ්යායාං වේදවිත්සර්වසංග්රහඃ ।
දීර්ඝදර්ශී මහාතේජාඃ පෞරජානපදප්රියඃ ॥ 1 ॥
ඉක්ෂ්වාකූණාමතිරථෝ යජ්වා ධර්මරතෝ වශී ।
මහර්ෂිකල්පෝ රාජර්ෂිස්ත්රිෂු ලෝකේෂු විශ්රුතඃ ॥ 2 ॥
බලවාන්නිහතාමිත්රෝ මිත්රවාන්විජිතේංද්රියඃ ।
ධනෛශ්ච සංග්රහෛශ්චාන්යෛශ්ශක්රවෛශ්රවණෝපමඃ ॥ 3 ॥
යථා මනුර්මහාතේජා ලෝකස්ය පරිරක්ෂිතා ।
තථා දශරථෝ රාජා වසංජගදපාලයත් ॥ 4 ॥
තේන සත්යාභිසංධේන ත්රිවර්ගමනුතිෂ්ඨතා ।
පාලිතා සා පුරී ශ්රේෂ්ඨා ඉංද්රේණේවාමරාවතී ॥ 5 ॥
තස්මින්පුරවරේ හෘෂ්ටා ධර්මාත්මානෝ බහුශ්රුතාඃ ।
නරාස්තුෂ්ටා ධනෛස්ස්වෛස්ස්වෛරලුබ්ධාස්සත්යවාදිනඃ ॥ 6 ॥
නාල්පසන්නිචයඃ කශ්චිදාසීත්තස්මින් පුරෝත්තමේ ।
කුටුංබී යෝ හ්යසිද්ධාර්ථෝऽගවාශ්වධනධාන්යවාන් ॥ 7 ॥
කාමී වා න කදර්යෝ වා නෘශංසඃ පුරුෂඃ ක්වචිත් ।
ද්රෂ්ටුං ශක්යමයෝධ්යායාන්නාවිද්වාන්න ච නාස්තිකඃ ॥ 8 ॥
සර්වේ නරාශ්ච නාර්යශ්ච ධර්මශීලාස්සුසංයතාඃ ।
උදිතාශ්ශීලවෘත්තාභ්යාං මහර්ෂය ඉවාමලාඃ ॥ 9 ॥
නාකුංඩලී නාමකුටී නාස්රග්වී නාල්පභෝගවාන් ।
නාමෘෂ්ටෝ නානුලිප්තාංගෝ නාසුගංධශ්ච විද්යතේ ॥ 10 ॥
නාමෘෂ්ටභෝජී නාදාතා නාප්යනංගදනිෂ්කධෘක් ।
නාහස්තාභරණෝ වාऽපි දෘශ්යතේ නාප්යනාත්මවාන් ॥ 11 ॥
නානාහිතාග්නිර්නායජ්වා න ක්ෂුද්රෝ වා න තස්කරඃ ।
කශ්චිදාසීදයෝධ්යායාන්න ච නිර්වෘත්තසංකරඃ ॥ 12 ॥
ස්වකර්මනිරතා නිත්යං බ්රාහ්මණා විජිතේංද්රියාඃ ।
දානාධ්යයනශීලාශ්ච සංයතාශ්ච පරිග්රහේ ॥ 13 ॥
න නාස්තිකෝ නානෘතකෝ න කශ්චිදබහුශ්රුතඃ ।
නාසූයකෝ න චාऽශක්තෝ නාවිද්වාන්විද්යතේ තදා ॥ 14 ॥
නාෂඩංගවිදත්රාසීන්නාව්රතෝ නාසහස්රදඃ ।
න දීනඃ ක්ෂිප්තචිත්තෝ වා ව්යථිතෝ වාऽපි කශ්චන ॥ 15 ॥
කශ්චින්නරෝ වා නාරී වා නාශ්රීමාන්නාප්යරූපවාන් ।
ද්රෂ්ටුං ශක්යමයෝධ්යායාං නාපි රාජන්යභක්තිමාන් ॥ 16 ॥
වර්ණේෂ්වග්ර්යචතුර්ථේෂු දේවතාතිථිපූජකාඃ ।
කෘතජ්ඤාශ්ච වදාන්යාශ්ච ශූරා වික්රමසංයුතාඃ ॥ 17 ॥
දීර්ඝායුෂෝ නරාස්සර්වේ ධර්මං සත්යං ච සංශ්රිතාඃ ।
සහිතාඃ පුත්රපෞත්රෛශ්ච නිත්යං ස්ත්රීභිඃ පුරෝත්තමේ ॥ 18 ॥
ක්ෂත්රං බ්රහ්මමුඛං චාසීද්වෛශ්යාඃ ක්ෂත්රමනුව්රතාඃ ।
ශූද්රාස්ස්වධර්මනිරතාස්ත්රීන්වර්ණානුපචාරිණඃ ॥ 19 ॥
සා තේනේක්ෂ්වාකුනාථේන පුරී සුපරිරක්ෂිතා ।
යථා පුරස්තාන්මනුනා මානවේංද්රේණ ධීමතා ॥ 20 ॥
යෝධානාමග්නිකල්පානාං පේශලානාමමර්ෂිණාම් ।
සංපූර්ණා කෘතවිද්යානාං ගුහා කේසරිණාමිව ॥ 21 ॥
කාංභෝජවිෂයේ ජාතෛර්බාහ්ලීකෛශ්ච හයෝත්තමෛඃ ।
වනායුජෛර්නදීජෛශ්ච පූර්ණා හරිහයෝත්තමෛඃ ॥ 22 ॥
විංධ්යපර්වතජෛර්මත්තෛඃ පූර්ණා හෛමවතෛරපි ।
මදාන්විතෛරතිබලෛර්මාතංගෛඃ පර්වතෝපමෛඃ ॥ 23 ॥
ඓරාවතකුලීනෛශ්ච මහාපද්මකුලෛස්තථා ।
අංජනාදපි නිෂ්පන්නෛර්වාමනාදපි ච ද්විපෛඃ ॥ 24 ॥
භද්රෛර්මංද්රෛර්මෘගෛශ්චෛව භද්රමංද්රමෘගෛස්තථා ।
භද්රමංද්රෛර්භද්රමෘගෛර්මෘගමංද්රෛශ්ච සා පුරී ।
නිත්යමත්තෛස්සදා පූර්ණා නාගෛරචලසන්නිභෛඃ ॥ 25 ॥
සා යෝජනේ ච ද්වේ භූයඃ සත්යනාමා ප්රකාශතේ ।
යස්යාං දශරථෝ රාජා වසන් ජගදපාලයත් ॥ 26 ॥
තාං පුරීං ස මහාතේජා රාජා දශරථෝ මහාන් ।
ශශාස ශමිතාමිත්රෝ නක්ෂත්රාණීව චංද්රමාඃ ॥ 27 ॥
තාං සත්යනාමාං දෘඪතෝරණාර්ගලාං ගෘහෛර්විචිත්රෛරුපශෝභිතාං ශිවාම් ।
පුරීමයෝධ්යාං නෘසහස්රසංකුලාං ශශාස වෛ ශක්රසමෝ මහීපතිඃ ॥ 28 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ෂෂ්ඨස්සර්ගඃ ॥
