શ્રીમદ્વાલ્મીકીય રામાયણે બાલકાંડમ્ ।
અથ ષષ્ઠસ્સર્ગઃ ।
. તસ્યાં પુર્યામયોધ્યાયાં વેદવિત્સર્વસંગ્રહઃ ।
દીર્ઘદર્શી મહાતેજાઃ પૌરજાનપદપ્રિયઃ ॥ 1 ॥
ઇક્ષ્વાકૂણામતિરથો યજ્વા ધર્મરતો વશી ।
મહર્ષિકલ્પો રાજર્ષિસ્ત્રિષુ લોકેષુ વિશ્રુતઃ ॥ 2 ॥
બલવાન્નિહતામિત્રો મિત્રવાન્વિજિતેંદ્રિયઃ ।
ધનૈશ્ચ સંગ્રહૈશ્ચાન્યૈશ્શક્રવૈશ્રવણોપમઃ ॥ 3 ॥
યથા મનુર્મહાતેજા લોકસ્ય પરિરક્ષિતા ।
તથા દશરથો રાજા વસંજગદપાલયત્ ॥ 4 ॥
તેન સત્યાભિસંધેન ત્રિવર્ગમનુતિષ્ઠતા ।
પાલિતા સા પુરી શ્રેષ્ઠા ઇંદ્રેણેવામરાવતી ॥ 5 ॥
તસ્મિન્પુરવરે હૃષ્ટા ધર્માત્માનો બહુશ્રુતાઃ ।
નરાસ્તુષ્ટા ધનૈસ્સ્વૈસ્સ્વૈરલુબ્ધાસ્સત્યવાદિનઃ ॥ 6 ॥
નાલ્પસન્નિચયઃ કશ્ચિદાસીત્તસ્મિન્ પુરોત્તમે ।
કુટુંબી યો હ્યસિદ્ધાર્થોઽગવાશ્વધનધાન્યવાન્ ॥ 7 ॥
કામી વા ન કદર્યો વા નૃશંસઃ પુરુષઃ ક્વચિત્ ।
દ્રષ્ટું શક્યમયોધ્યાયાન્નાવિદ્વાન્ન ચ નાસ્તિકઃ ॥ 8 ॥
સર્વે નરાશ્ચ નાર્યશ્ચ ધર્મશીલાસ્સુસંયતાઃ ।
ઉદિતાશ્શીલવૃત્તાભ્યાં મહર્ષય ઇવામલાઃ ॥ 9 ॥
નાકુંડલી નામકુટી નાસ્રગ્વી નાલ્પભોગવાન્ ।
નામૃષ્ટો નાનુલિપ્તાંગો નાસુગંધશ્ચ વિદ્યતે ॥ 10 ॥
નામૃષ્ટભોજી નાદાતા નાપ્યનંગદનિષ્કધૃક્ ।
નાહસ્તાભરણો વાઽપિ દૃશ્યતે નાપ્યનાત્મવાન્ ॥ 11 ॥
નાનાહિતાગ્નિર્નાયજ્વા ન ક્ષુદ્રો વા ન તસ્કરઃ ।
કશ્ચિદાસીદયોધ્યાયાન્ન ચ નિર્વૃત્તસંકરઃ ॥ 12 ॥
સ્વકર્મનિરતા નિત્યં બ્રાહ્મણા વિજિતેંદ્રિયાઃ ।
દાનાધ્યયનશીલાશ્ચ સંયતાશ્ચ પરિગ્રહે ॥ 13 ॥
ન નાસ્તિકો નાનૃતકો ન કશ્ચિદબહુશ્રુતઃ ।
નાસૂયકો ન ચાઽશક્તો નાવિદ્વાન્વિદ્યતે તદા ॥ 14 ॥
નાષડંગવિદત્રાસીન્નાવ્રતો નાસહસ્રદઃ ।
ન દીનઃ ક્ષિપ્તચિત્તો વા વ્યથિતો વાઽપિ કશ્ચન ॥ 15 ॥
કશ્ચિન્નરો વા નારી વા નાશ્રીમાન્નાપ્યરૂપવાન્ ।
દ્રષ્ટું શક્યમયોધ્યાયાં નાપિ રાજન્યભક્તિમાન્ ॥ 16 ॥
વર્ણેષ્વગ્ર્યચતુર્થેષુ દેવતાતિથિપૂજકાઃ ।
કૃતજ્ઞાશ્ચ વદાન્યાશ્ચ શૂરા વિક્રમસંયુતાઃ ॥ 17 ॥
દીર્ઘાયુષો નરાસ્સર્વે ધર્મં સત્યં ચ સંશ્રિતાઃ ।
સહિતાઃ પુત્રપૌત્રૈશ્ચ નિત્યં સ્ત્રીભિઃ પુરોત્તમે ॥ 18 ॥
ક્ષત્રં બ્રહ્મમુખં ચાસીદ્વૈશ્યાઃ ક્ષત્રમનુવ્રતાઃ ।
શૂદ્રાસ્સ્વધર્મનિરતાસ્ત્રીન્વર્ણાનુપચારિણઃ ॥ 19 ॥
સા તેનેક્ષ્વાકુનાથેન પુરી સુપરિરક્ષિતા ।
યથા પુરસ્તાન્મનુના માનવેંદ્રેણ ધીમતા ॥ 20 ॥
યોધાનામગ્નિકલ્પાનાં પેશલાનામમર્ષિણામ્ ।
સંપૂર્ણા કૃતવિદ્યાનાં ગુહા કેસરિણામિવ ॥ 21 ॥
કાંભોજવિષયે જાતૈર્બાહ્લીકૈશ્ચ હયોત્તમૈઃ ।
વનાયુજૈર્નદીજૈશ્ચ પૂર્ણા હરિહયોત્તમૈઃ ॥ 22 ॥
વિંધ્યપર્વતજૈર્મત્તૈઃ પૂર્ણા હૈમવતૈરપિ ।
મદાન્વિતૈરતિબલૈર્માતંગૈઃ પર્વતોપમૈઃ ॥ 23 ॥
ઐરાવતકુલીનૈશ્ચ મહાપદ્મકુલૈસ્તથા ।
અંજનાદપિ નિષ્પન્નૈર્વામનાદપિ ચ દ્વિપૈઃ ॥ 24 ॥
ભદ્રૈર્મંદ્રૈર્મૃગૈશ્ચૈવ ભદ્રમંદ્રમૃગૈસ્તથા ।
ભદ્રમંદ્રૈર્ભદ્રમૃગૈર્મૃગમંદ્રૈશ્ચ સા પુરી ।
નિત્યમત્તૈસ્સદા પૂર્ણા નાગૈરચલસન્નિભૈઃ ॥ 25 ॥
સા યોજને ચ દ્વે ભૂયઃ સત્યનામા પ્રકાશતે ।
યસ્યાં દશરથો રાજા વસન્ જગદપાલયત્ ॥ 26 ॥
તાં પુરીં સ મહાતેજા રાજા દશરથો મહાન્ ।
શશાસ શમિતામિત્રો નક્ષત્રાણીવ ચંદ્રમાઃ ॥ 27 ॥
તાં સત્યનામાં દૃઢતોરણાર્ગલાં ગૃહૈર્વિચિત્રૈરુપશોભિતાં શિવામ્ ।
પુરીમયોધ્યાં નૃસહસ્રસંકુલાં શશાસ વૈ શક્રસમો મહીપતિઃ ॥ 28 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે ષષ્ઠસ્સર્ગઃ ॥
