śrīmadvālmīkīya rāmāyaṇē bālakāṇḍam ।
atha ṣaṣṭhassargaḥ ।
. tasyāṃ puryāmayōdhyāyāṃ vēdavitsarvasaṅgrahaḥ ।
dīrghadarśī mahātējāḥ paurajānapadapriyaḥ ॥ 1 ॥
ikṣvākūṇāmatirathō yajvā dharmaratō vaśī ।
maharṣikalpō rājarṣistriṣu lōkēṣu viśrutaḥ ॥ 2 ॥
balavānnihatāmitrō mitravānvijitēndriyaḥ ।
dhanaiścha saṅgrahaiśchānyaiśśakravaiśravaṇōpamaḥ ॥ 3 ॥
yathā manurmahātējā lōkasya parirakṣitā ।
tathā daśarathō rājā vasañjagadapālayat ॥ 4 ॥
tēna satyābhisandhēna trivargamanutiṣṭhatā ।
pālitā sā purī śrēṣṭhā indrēṇēvāmarāvatī ॥ 5 ॥
tasminpuravarē hṛṣṭā dharmātmānō bahuśrutāḥ ।
narāstuṣṭā dhanaissvaissvairalubdhāssatyavādinaḥ ॥ 6 ॥
nālpasannichayaḥ kaśchidāsīttasmin purōttamē ।
kuṭumbī yō hyasiddhārthō'gavāśvadhanadhānyavān ॥ 7 ॥
kāmī vā na kadaryō vā nṛśaṃsaḥ puruṣaḥ kvachit ।
draṣṭuṃ śakyamayōdhyāyānnāvidvānna cha nāstikaḥ ॥ 8 ॥
sarvē narāścha nāryaścha dharmaśīlāssusaṃyatāḥ ।
uditāśśīlavṛttābhyāṃ maharṣaya ivāmalāḥ ॥ 9 ॥
nākuṇḍalī nāmakuṭī nāsragvī nālpabhōgavān ।
nāmṛṣṭō nānuliptāṅgō nāsugandhaścha vidyatē ॥ 10 ॥
nāmṛṣṭabhōjī nādātā nāpyanaṅgadaniṣkadhṛk ।
nāhastābharaṇō vā'pi dṛśyatē nāpyanātmavān ॥ 11 ॥
nānāhitāgnirnāyajvā na kṣudrō vā na taskaraḥ ।
kaśchidāsīdayōdhyāyānna cha nirvṛttasaṅkaraḥ ॥ 12 ॥
svakarmaniratā nityaṃ brāhmaṇā vijitēndriyāḥ ।
dānādhyayanaśīlāścha saṃyatāścha parigrahē ॥ 13 ॥
na nāstikō nānṛtakō na kaśchidabahuśrutaḥ ।
nāsūyakō na chā'śaktō nāvidvānvidyatē tadā ॥ 14 ॥
nāṣaḍaṅgavidatrāsīnnāvratō nāsahasradaḥ ।
na dīnaḥ kṣiptachittō vā vyathitō vā'pi kaśchana ॥ 15 ॥
kaśchinnarō vā nārī vā nāśrīmānnāpyarūpavān ।
draṣṭuṃ śakyamayōdhyāyāṃ nāpi rājanyabhaktimān ॥ 16 ॥
varṇēṣvagryachaturthēṣu dēvatātithipūjakāḥ ।
kṛtajñāścha vadānyāścha śūrā vikramasaṃyutāḥ ॥ 17 ॥
dīrghāyuṣō narāssarvē dharmaṃ satyaṃ cha saṃśritāḥ ।
sahitāḥ putrapautraiścha nityaṃ strībhiḥ purōttamē ॥ 18 ॥
kṣatraṃ brahmamukhaṃ chāsīdvaiśyāḥ kṣatramanuvratāḥ ।
śūdrāssvadharmaniratāstrīnvarṇānupachāriṇaḥ ॥ 19 ॥
sā tēnēkṣvākunāthēna purī suparirakṣitā ।
yathā purastānmanunā mānavēndrēṇa dhīmatā ॥ 20 ॥
yōdhānāmagnikalpānāṃ pēśalānāmamarṣiṇām ।
sampūrṇā kṛtavidyānāṃ guhā kēsariṇāmiva ॥ 21 ॥
kāmbhōjaviṣayē jātairbāhlīkaiścha hayōttamaiḥ ।
vanāyujairnadījaiścha pūrṇā harihayōttamaiḥ ॥ 22 ॥
vindhyaparvatajairmattaiḥ pūrṇā haimavatairapi ।
madānvitairatibalairmātaṅgaiḥ parvatōpamaiḥ ॥ 23 ॥
airāvatakulīnaiścha mahāpadmakulaistathā ।
añjanādapi niṣpannairvāmanādapi cha dvipaiḥ ॥ 24 ॥
bhadrairmandrairmṛgaiśchaiva bhadramandramṛgaistathā ।
bhadramandrairbhadramṛgairmṛgamandraiścha sā purī ।
nityamattaissadā pūrṇā nāgairachalasannibhaiḥ ॥ 25 ॥
sā yōjanē cha dvē bhūyaḥ satyanāmā prakāśatē ।
yasyāṃ daśarathō rājā vasan jagadapālayat ॥ 26 ॥
tāṃ purīṃ sa mahātējā rājā daśarathō mahān ।
śaśāsa śamitāmitrō nakṣatrāṇīva chandramāḥ ॥ 27 ॥
tāṃ satyanāmāṃ dṛḍhatōraṇārgalāṃ gṛhairvichitrairupaśōbhitāṃ śivām ।
purīmayōdhyāṃ nṛsahasrasaṅkulāṃ śaśāsa vai śakrasamō mahīpatiḥ ॥ 28 ॥
ityārṣē śrīmadrāmāyaṇē vālmīkīya ādikāvyē bālakāṇḍē ṣaṣṭhassargaḥ ॥
