ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଷଷ୍ଠସ୍ସର୍ଗଃ ।
. ତସ୍ୟାଂ ପୁର୍ୟାମୟୋଧ୍ୟାୟାଂ ଵେଦଵିତ୍ସର୍ଵସଂଗ୍ରହଃ ।
ଦୀର୍ଘଦର୍ଶୀ ମହାତେଜାଃ ପୌରଜାନପଦପ୍ରିୟଃ ॥ 1 ॥
ଇକ୍ଷ୍ଵାକୂଣାମତିରଥୋ ୟଜ୍ଵା ଧର୍ମରତୋ ଵଶୀ ।
ମହର୍ଷିକଲ୍ପୋ ରାଜର୍ଷିସ୍ତ୍ରିଷୁ ଲୋକେଷୁ ଵିଶ୍ରୁତଃ ॥ 2 ॥
ବଲଵାନ୍ନିହତାମିତ୍ରୋ ମିତ୍ରଵାନ୍ଵିଜିତେଂଦ୍ରିୟଃ ।
ଧନୈଶ୍ଚ ସଂଗ୍ରହୈଶ୍ଚାନ୍ୟୈଶ୍ଶକ୍ରଵୈଶ୍ରଵଣୋପମଃ ॥ 3 ॥
ୟଥା ମନୁର୍ମହାତେଜା ଲୋକସ୍ୟ ପରିରକ୍ଷିତା ।
ତଥା ଦଶରଥୋ ରାଜା ଵସଂଜଗଦପାଲୟତ୍ ॥ 4 ॥
ତେନ ସତ୍ୟାଭିସଂଧେନ ତ୍ରିଵର୍ଗମନୁତିଷ୍ଠତା ।
ପାଲିତା ସା ପୁରୀ ଶ୍ରେଷ୍ଠା ଇଂଦ୍ରେଣେଵାମରାଵତୀ ॥ 5 ॥
ତସ୍ମିନ୍ପୁରଵରେ ହୃଷ୍ଟା ଧର୍ମାତ୍ମାନୋ ବହୁଶ୍ରୁତାଃ ।
ନରାସ୍ତୁଷ୍ଟା ଧନୈସ୍ସ୍ଵୈସ୍ସ୍ଵୈରଲୁବ୍ଧାସ୍ସତ୍ୟଵାଦିନଃ ॥ 6 ॥
ନାଲ୍ପସନ୍ନିଚୟଃ କଶ୍ଚିଦାସୀତ୍ତସ୍ମିନ୍ ପୁରୋତ୍ତମେ ।
କୁଟୁଂବୀ ୟୋ ହ୍ୟସିଦ୍ଧାର୍ଥୋଽଗଵାଶ୍ଵଧନଧାନ୍ୟଵାନ୍ ॥ 7 ॥
କାମୀ ଵା ନ କଦର୍ୟୋ ଵା ନୃଶଂସଃ ପୁରୁଷଃ କ୍ଵଚିତ୍ ।
ଦ୍ରଷ୍ଟୁଂ ଶକ୍ୟମୟୋଧ୍ୟାୟାନ୍ନାଵିଦ୍ଵାନ୍ନ ଚ ନାସ୍ତିକଃ ॥ 8 ॥
ସର୍ଵେ ନରାଶ୍ଚ ନାର୍ୟଶ୍ଚ ଧର୍ମଶୀଲାସ୍ସୁସଂୟତାଃ ।
ଉଦିତାଶ୍ଶୀଲଵୃତ୍ତାଭ୍ୟାଂ ମହର୍ଷୟ ଇଵାମଲାଃ ॥ 9 ॥
ନାକୁଂଡଲୀ ନାମକୁଟୀ ନାସ୍ରଗ୍ଵୀ ନାଲ୍ପଭୋଗଵାନ୍ ।
ନାମୃଷ୍ଟୋ ନାନୁଲିପ୍ତାଂଗୋ ନାସୁଗଂଧଶ୍ଚ ଵିଦ୍ୟତେ ॥ 10 ॥
ନାମୃଷ୍ଟଭୋଜୀ ନାଦାତା ନାପ୍ୟନଂଗଦନିଷ୍କଧୃକ୍ ।
ନାହସ୍ତାଭରଣୋ ଵାଽପି ଦୃଶ୍ୟତେ ନାପ୍ୟନାତ୍ମଵାନ୍ ॥ 11 ॥
ନାନାହିତାଗ୍ନିର୍ନାୟଜ୍ଵା ନ କ୍ଷୁଦ୍ରୋ ଵା ନ ତସ୍କରଃ ।
କଶ୍ଚିଦାସୀଦୟୋଧ୍ୟାୟାନ୍ନ ଚ ନିର୍ଵୃତ୍ତସଂକରଃ ॥ 12 ॥
ସ୍ଵକର୍ମନିରତା ନିତ୍ୟଂ ବ୍ରାହ୍ମଣା ଵିଜିତେଂଦ୍ରିୟାଃ ।
ଦାନାଧ୍ୟୟନଶୀଲାଶ୍ଚ ସଂୟତାଶ୍ଚ ପରିଗ୍ରହେ ॥ 13 ॥
ନ ନାସ୍ତିକୋ ନାନୃତକୋ ନ କଶ୍ଚିଦବହୁଶ୍ରୁତଃ ।
ନାସୂୟକୋ ନ ଚାଽଶକ୍ତୋ ନାଵିଦ୍ଵାନ୍ଵିଦ୍ୟତେ ତଦା ॥ 14 ॥
ନାଷଡଂଗଵିଦତ୍ରାସୀନ୍ନାଵ୍ରତୋ ନାସହସ୍ରଦଃ ।
ନ ଦୀନଃ କ୍ଷିପ୍ତଚିତ୍ତୋ ଵା ଵ୍ୟଥିତୋ ଵାଽପି କଶ୍ଚନ ॥ 15 ॥
କଶ୍ଚିନ୍ନରୋ ଵା ନାରୀ ଵା ନାଶ୍ରୀମାନ୍ନାପ୍ୟରୂପଵାନ୍ ।
ଦ୍ରଷ୍ଟୁଂ ଶକ୍ୟମୟୋଧ୍ୟାୟାଂ ନାପି ରାଜନ୍ୟଭକ୍ତିମାନ୍ ॥ 16 ॥
ଵର୍ଣେଷ୍ଵଗ୍ର୍ୟଚତୁର୍ଥେଷୁ ଦେଵତାତିଥିପୂଜକାଃ ।
କୃତଜ୍ଞାଶ୍ଚ ଵଦାନ୍ୟାଶ୍ଚ ଶୂରା ଵିକ୍ରମସଂୟୁତାଃ ॥ 17 ॥
ଦୀର୍ଘାୟୁଷୋ ନରାସ୍ସର୍ଵେ ଧର୍ମଂ ସତ୍ୟଂ ଚ ସଂଶ୍ରିତାଃ ।
ସହିତାଃ ପୁତ୍ରପୌତ୍ରୈଶ୍ଚ ନିତ୍ୟଂ ସ୍ତ୍ରୀଭିଃ ପୁରୋତ୍ତମେ ॥ 18 ॥
କ୍ଷତ୍ରଂ ବ୍ରହ୍ମମୁଖଂ ଚାସୀଦ୍ଵୈଶ୍ୟାଃ କ୍ଷତ୍ରମନୁଵ୍ରତାଃ ।
ଶୂଦ୍ରାସ୍ସ୍ଵଧର୍ମନିରତାସ୍ତ୍ରୀନ୍ଵର୍ଣାନୁପଚାରିଣଃ ॥ 19 ॥
ସା ତେନେକ୍ଷ୍ଵାକୁନାଥେନ ପୁରୀ ସୁପରିରକ୍ଷିତା ।
ୟଥା ପୁରସ୍ତାନ୍ମନୁନା ମାନଵେଂଦ୍ରେଣ ଧୀମତା ॥ 20 ॥
ୟୋଧାନାମଗ୍ନିକଲ୍ପାନାଂ ପେଶଲାନାମମର୍ଷିଣାମ୍ ।
ସଂପୂର୍ଣା କୃତଵିଦ୍ୟାନାଂ ଗୁହା କେସରିଣାମିଵ ॥ 21 ॥
କାଂଭୋଜଵିଷୟେ ଜାତୈର୍ବାହ୍ଲୀକୈଶ୍ଚ ହୟୋତ୍ତମୈଃ ।
ଵନାୟୁଜୈର୍ନଦୀଜୈଶ୍ଚ ପୂର୍ଣା ହରିହୟୋତ୍ତମୈଃ ॥ 22 ॥
ଵିଂଧ୍ୟପର୍ଵତଜୈର୍ମତ୍ତୈଃ ପୂର୍ଣା ହୈମଵତୈରପି ।
ମଦାନ୍ଵିତୈରତିବଲୈର୍ମାତଂଗୈଃ ପର୍ଵତୋପମୈଃ ॥ 23 ॥
ଐରାଵତକୁଲୀନୈଶ୍ଚ ମହାପଦ୍ମକୁଲୈସ୍ତଥା ।
ଅଂଜନାଦପି ନିଷ୍ପନ୍ନୈର୍ଵାମନାଦପି ଚ ଦ୍ଵିପୈଃ ॥ 24 ॥
ଭଦ୍ରୈର୍ମଂଦ୍ରୈର୍ମୃଗୈଶ୍ଚୈଵ ଭଦ୍ରମଂଦ୍ରମୃଗୈସ୍ତଥା ।
ଭଦ୍ରମଂଦ୍ରୈର୍ଭଦ୍ରମୃଗୈର୍ମୃଗମଂଦ୍ରୈଶ୍ଚ ସା ପୁରୀ ।
ନିତ୍ୟମତ୍ତୈସ୍ସଦା ପୂର୍ଣା ନାଗୈରଚଲସନ୍ନିଭୈଃ ॥ 25 ॥
ସା ୟୋଜନେ ଚ ଦ୍ଵେ ଭୂୟଃ ସତ୍ୟନାମା ପ୍ରକାଶତେ ।
ୟସ୍ୟାଂ ଦଶରଥୋ ରାଜା ଵସନ୍ ଜଗଦପାଲୟତ୍ ॥ 26 ॥
ତାଂ ପୁରୀଂ ସ ମହାତେଜା ରାଜା ଦଶରଥୋ ମହାନ୍ ।
ଶଶାସ ଶମିତାମିତ୍ରୋ ନକ୍ଷତ୍ରାଣୀଵ ଚଂଦ୍ରମାଃ ॥ 27 ॥
ତାଂ ସତ୍ୟନାମାଂ ଦୃଢତୋରଣାର୍ଗଲାଂ ଗୃହୈର୍ଵିଚିତ୍ରୈରୁପଶୋଭିତାଂ ଶିଵାମ୍ ।
ପୁରୀମୟୋଧ୍ୟାଂ ନୃସହସ୍ରସଂକୁଲାଂ ଶଶାସ ଵୈ ଶକ୍ରସମୋ ମହୀପତିଃ ॥ 28 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଷଷ୍ଠସ୍ସର୍ଗଃ ॥
