શ્રીમદ્વાલ્મીકીય રામાયણે અયોધ્યાકાંડમ્ ।
અથ એકોનનવતિતમસ્સર્ગઃ ।
ઉષ્ય રાત્રિં તુ તત્રૈવ ગંગાકૂલે સ રાઘવઃ ।
ભરતઃ કાલ્યમુત્થાય શત્રુઘ્નમિદમબ્રવીત્ ॥ 1 ॥
શત્રુઘ્નોત્તિષ્ઠ કિં શેષે નિષાદાધિપતિં ગુહમ્ ।
શીઘ્રમાનય ભદ્રં તે તારયિષ્યતિ વાહિનીમ્ ॥ 2 ॥
જાગર્મિ નાહં સ્વપિમિ તમેવાઽર્યં વિચિંતયન્ ।
ઇત્યેવમબ્રવીદ્ભ્રાત્તા શત્રુઘ્નોઽપિ પ્રચોદિતઃ ॥ 3 ॥
ઇતિ સંવદતોરેવમન્યોન્યં નરસિંહયોઃ ।
આગમ્ય પ્રાંજલિઃ કાલે ગુહો ભરતમબ્રવીત્ ॥ 4 ॥
કચ્ચિત્સુખં નદીતીરેઽવાત્સીઃ કાકુત્સ્થ શર્વરીમ્ ।
કચ્ચિત્તે સહ સૈન્યસ્ય તાવત્સર્વમનામયમ્ ॥ 5 ॥
ગુહસ્ય વચનં શ્રુત્વા તત્તુ સ્નેહાદુદીરિતમ્ ।
રામસ્યાનુવશો વાક્યં ભરતોઽપીદમબ્રવીત્ ॥ 6 ॥
સુખા ન શ્શર્વરી રાજન્ પૂજિતાશ્ચાપિ તે વયમ્ ।
ગંગાં તુ નૌભિર્બહ્વીભિર્દાશાસ્સંતારયંતુ નઃ ॥ 7 ॥
તતો ગુહ સ્સંત્વરિતં શ્રુત્વા ભરતશાસનમ્ ।
પ્રતિ પ્રવિશ્ય નગરં તં જ્ઞાતિજનમબ્રવીત્ ॥ 8 ॥
ઉત્તિષ્ઠત પ્રબુધ્યધ્વં ભદ્રમસ્તુ ચ વસ્સદા ।
નાવ સ્સમનુકર્ષધ્વં તારયિષ્યામ વાહિનીમ્ ॥ 9 ॥
તે તથોક્તા સ્સમુત્થાય ત્વરિતા રાજશાસનાત્ ।
પંચનાવાં શતાન્યાશુ સમાનિન્યુસ્સમંતતઃ ॥ 10 ॥
અન્યા સ્સ્વસ્તિકવિજ્ઞેયા મહાઘંટાધરા વરાઃ ।
શોભમાનાઃ પતાકાભિર્યુક્તવાતાસ્સુસંહતાઃ ॥ 11 ॥
તત સ્સ્વસ્તિકવિજ્ઞેયાં પાંડુકંબલસંવૃતામ્ ।
સનંદિઘોષાં કલ્યાણીં ગુહો નાવમુપાહરત્ ॥ 12 ॥
તામારુરોહ ભરતશ્શત્રુઘ્નશ્ચ મહાબલઃ ।
કૌસલ્યા ચ સુમિત્રા ચ યાશ્ચાન્યા રાજયોષિતઃ ॥ 13 ॥
પુરોહિતશ્ચ તત્પૂર્વં ગુરવો બ્રાહ્મણાશ્ચ યે ।
અનંતરં રાજદારાસ્તદૈવ શકટાપણાઃ ॥ 14 ॥
આવાસમાદીપયતાં તીર્થં ચાપ્યવગાહતામ્ ।
ભાંડાનિ ચાદદાનાનાં ઘોષસ્ત્રિદિવમસ્પૃશત્ ॥ 15 ॥
પતાકિન્યસ્તુ તા નાવસ્સ્વયં દાશૈરધિષ્ઠિતાઃ ।
વહંત્યો જનમારૂઢં તદા સંપેતુરાશુગાઃ ॥ 16 ॥
નારીણામભિપૂર્ણા સ્તુ કાશ્ચિત્ કાશ્ચિચ્ચ વાજિનામ્ ।
કાશ્ચિદત્ર વહંતિ સ્મ યાનયુગ્યં મહાધનમ્ ॥ 17 ॥
તા સ્સ્મ ગત્વા પરં તીરમવરોપ્ય ચ તં જનમ્ ।
નિવૃત્તાઃ કાંડચિત્રાણિ ક્રિયંતે દાશબંધુભિઃ ॥ 18 ॥
સવૈજયંતાસ્તુ ગજા ગજારોહપ્રચોદિતાઃ ।
તરંત સ્સ્મ પ્રકાશંતે સધ્વજા ઇવ પર્વતાઃ ॥ 19 ॥
નાવસ્ત્વારુરુહુશ્ચાન્યે પ્લવૈસ્તેરુ સ્તથાપરે ।
અન્યે કુંભઘટૈસ્તેરુરન્યેતેરુશ્ચ બાહુભિઃ ॥ 20 ॥
સા પુણ્યા ધ્વજિની ગંગાં દાશૈસ્સંતારિતા સ્વયમ્ ।
મૈત્રે મુહૂર્તે પ્રયયૌ પ્રયાગવનમુત્તમમ્ ॥ 21 ॥
આશ્વાસયિત્વા ચ ચમૂં મહાત્મા નિવેશયિત્વા ચ યથોપજોષમ્ ।
દ્રષ્ટું ભરદ્વાજમૃષિપ્રવર્ય મૃત્વિગ્વૃતસ્સન્ભરતઃ પ્રતસ્થે ॥ 22 ॥
સ બ્રાહ્મણસ્યાઽશ્રમમભ્યુપેત્ય મહાત્મનો દેવપુરોહિતસ્ય ।
દદર્શ રમ્યોટજવૃક્ષષંડં મહદ્વનં વિપ્રવરસ્ય રમ્યમ્ ॥ 23 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અયોધ્યાકાંડે એકોનનવતિતમસ્સર્ગઃ ॥
