śrīmadvālmīkīya rāmāyaṇē ayōdhyākāṇḍam ।
atha ēkōnanavatitamassargaḥ ।
uṣya rātriṃ tu tatraiva gaṅgākūlē sa rāghavaḥ ।
bharataḥ kālyamutthāya śatrughnamidamabravīt ॥ 1 ॥
śatrughnōttiṣṭha kiṃ śēṣē niṣādādhipatiṃ guham ।
śīghramānaya bhadraṃ tē tārayiṣyati vāhinīm ॥ 2 ॥
jāgarmi nāhaṃ svapimi tamēvā'ryaṃ vichintayan ।
ityēvamabravīdbhrāttā śatrughnō'pi prachōditaḥ ॥ 3 ॥
iti saṃvadatōrēvamanyōnyaṃ narasiṃhayōḥ ।
āgamya prāñjaliḥ kālē guhō bharatamabravīt ॥ 4 ॥
kachchitsukhaṃ nadītīrē'vātsīḥ kākutstha śarvarīm ।
kachchittē saha sainyasya tāvatsarvamanāmayam ॥ 5 ॥
guhasya vachanaṃ śrutvā tattu snēhādudīritam ।
rāmasyānuvaśō vākyaṃ bharatō'pīdamabravīt ॥ 6 ॥
sukhā na śśarvarī rājan pūjitāśchāpi tē vayam ।
gaṅgāṃ tu naubhirbahvībhirdāśāssantārayantu naḥ ॥ 7 ॥
tatō guha ssantvaritaṃ śrutvā bharataśāsanam ।
prati praviśya nagaraṃ taṃ jñātijanamabravīt ॥ 8 ॥
uttiṣṭhata prabudhyadhvaṃ bhadramastu cha vassadā ।
nāva ssamanukarṣadhvaṃ tārayiṣyāma vāhinīm ॥ 9 ॥
tē tathōktā ssamutthāya tvaritā rājaśāsanāt ।
pañchanāvāṃ śatānyāśu samāninyussamantataḥ ॥ 10 ॥
anyā ssvastikavijñēyā mahāghaṇṭādharā varāḥ ।
śōbhamānāḥ patākābhiryuktavātāssusaṃhatāḥ ॥ 11 ॥
tata ssvastikavijñēyāṃ pāṇḍukambalasaṃvṛtām ।
sanandighōṣāṃ kalyāṇīṃ guhō nāvamupāharat ॥ 12 ॥
tāmārurōha bharataśśatrughnaścha mahābalaḥ ।
kausalyā cha sumitrā cha yāśchānyā rājayōṣitaḥ ॥ 13 ॥
purōhitaścha tatpūrvaṃ guravō brāhmaṇāścha yē ।
anantaraṃ rājadārāstadaiva śakaṭāpaṇāḥ ॥ 14 ॥
āvāsamādīpayatāṃ tīrthaṃ chāpyavagāhatām ।
bhāṇḍāni chādadānānāṃ ghōṣastridivamaspṛśat ॥ 15 ॥
patākinyastu tā nāvassvayaṃ dāśairadhiṣṭhitāḥ ।
vahantyō janamārūḍhaṃ tadā sampēturāśugāḥ ॥ 16 ॥
nārīṇāmabhipūrṇā stu kāśchit kāśchichcha vājinām ।
kāśchidatra vahanti sma yānayugyaṃ mahādhanam ॥ 17 ॥
tā ssma gatvā paraṃ tīramavarōpya cha taṃ janam ।
nivṛttāḥ kāṇḍachitrāṇi kriyantē dāśabandhubhiḥ ॥ 18 ॥
savaijayantāstu gajā gajārōhaprachōditāḥ ।
taranta ssma prakāśantē sadhvajā iva parvatāḥ ॥ 19 ॥
nāvastvāruruhuśchānyē plavaistēru stathāparē ।
anyē kumbhaghaṭaistēruranyētēruścha bāhubhiḥ ॥ 20 ॥
sā puṇyā dhvajinī gaṅgāṃ dāśaissantāritā svayam ।
maitrē muhūrtē prayayau prayāgavanamuttamam ॥ 21 ॥
āśvāsayitvā cha chamūṃ mahātmā nivēśayitvā cha yathōpajōṣam ।
draṣṭuṃ bharadvājamṛṣipravarya mṛtvigvṛtassanbharataḥ pratasthē ॥ 22 ॥
sa brāhmaṇasyā'śramamabhyupētya mahātmanō dēvapurōhitasya ।
dadarśa ramyōṭajavṛkṣaṣaṇḍaṃ mahadvanaṃ vipravarasya ramyam ॥ 23 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē ēkōnanavatitamassargaḥ ॥
