ශ්රීමද්වාල්මීකීය රාමායණේ අයෝධ්යාකාංඩම් ।
අථ ඒකෝනනවතිතමස්සර්ගඃ ।
උෂ්ය රාත්රිං තු තත්රෛව ගංගාකූලේ ස රාඝවඃ ।
භරතඃ කාල්යමුත්ථාය ශත්රුඝ්නමිදමබ්රවීත් ॥ 1 ॥
ශත්රුඝ්නෝත්තිෂ්ඨ කිං ශේෂේ නිෂාදාධිපතිං ගුහම් ।
ශීඝ්රමානය භද්රං තේ තාරයිෂ්යති වාහිනීම් ॥ 2 ॥
ජාගර්මි නාහං ස්වපිමි තමේවාऽර්යං විචිංතයන් ।
ඉත්යේවමබ්රවීද්භ්රාත්තා ශත්රුඝ්නෝऽපි ප්රචෝදිතඃ ॥ 3 ॥
ඉති සංවදතෝරේවමන්යෝන්යං නරසිංහයෝඃ ।
ආගම්ය ප්රාංජලිඃ කාලේ ගුහෝ භරතමබ්රවීත් ॥ 4 ॥
කච්චිත්සුඛං නදීතීරේऽවාත්සීඃ කාකුත්ස්ථ ශර්වරීම් ।
කච්චිත්තේ සහ සෛන්යස්ය තාවත්සර්වමනාමයම් ॥ 5 ॥
ගුහස්ය වචනං ශ්රුත්වා තත්තු ස්නේහාදුදීරිතම් ।
රාමස්යානුවශෝ වාක්යං භරතෝऽපීදමබ්රවීත් ॥ 6 ॥
සුඛා න ශ්ශර්වරී රාජන් පූජිතාශ්චාපි තේ වයම් ।
ගංගාං තු නෞභිර්බහ්වීභිර්දාශාස්සංතාරයංතු නඃ ॥ 7 ॥
තතෝ ගුහ ස්සංත්වරිතං ශ්රුත්වා භරතශාසනම් ।
ප්රති ප්රවිශ්ය නගරං තං ජ්ඤාතිජනමබ්රවීත් ॥ 8 ॥
උත්තිෂ්ඨත ප්රබුධ්යධ්වං භද්රමස්තු ච වස්සදා ।
නාව ස්සමනුකර්ෂධ්වං තාරයිෂ්යාම වාහිනීම් ॥ 9 ॥
තේ තථෝක්තා ස්සමුත්ථාය ත්වරිතා රාජශාසනාත් ।
පංචනාවාං ශතාන්යාශු සමානින්යුස්සමංතතඃ ॥ 10 ॥
අන්යා ස්ස්වස්තිකවිජ්ඤේයා මහාඝංටාධරා වරාඃ ।
ශෝභමානාඃ පතාකාභිර්යුක්තවාතාස්සුසංහතාඃ ॥ 11 ॥
තත ස්ස්වස්තිකවිජ්ඤේයාං පාංඩුකංබලසංවෘතාම් ।
සනංදිඝෝෂාං කල්යාණීං ගුහෝ නාවමුපාහරත් ॥ 12 ॥
තාමාරුරෝහ භරතශ්ශත්රුඝ්නශ්ච මහාබලඃ ।
කෞසල්යා ච සුමිත්රා ච යාශ්චාන්යා රාජයෝෂිතඃ ॥ 13 ॥
පුරෝහිතශ්ච තත්පූර්වං ගුරවෝ බ්රාහ්මණාශ්ච යේ ।
අනංතරං රාජදාරාස්තදෛව ශකටාපණාඃ ॥ 14 ॥
ආවාසමාදීපයතාං තීර්ථං චාප්යවගාහතාම් ।
භාංඩානි චාදදානානාං ඝෝෂස්ත්රිදිවමස්පෘශත් ॥ 15 ॥
පතාකින්යස්තු තා නාවස්ස්වයං දාශෛරධිෂ්ඨිතාඃ ।
වහංත්යෝ ජනමාරූඪං තදා සංපේතුරාශුගාඃ ॥ 16 ॥
නාරීණාමභිපූර්ණා ස්තු කාශ්චිත් කාශ්චිච්ච වාජිනාම් ।
කාශ්චිදත්ර වහංති ස්ම යානයුග්යං මහාධනම් ॥ 17 ॥
තා ස්ස්ම ගත්වා පරං තීරමවරෝප්ය ච තං ජනම් ।
නිවෘත්තාඃ කාංඩචිත්රාණි ක්රියංතේ දාශබංධුභිඃ ॥ 18 ॥
සවෛජයංතාස්තු ගජා ගජාරෝහප්රචෝදිතාඃ ।
තරංත ස්ස්ම ප්රකාශංතේ සධ්වජා ඉව පර්වතාඃ ॥ 19 ॥
නාවස්ත්වාරුරුහුශ්චාන්යේ ප්ලවෛස්තේරු ස්තථාපරේ ।
අන්යේ කුංභඝටෛස්තේරුරන්යේතේරුශ්ච බාහුභිඃ ॥ 20 ॥
සා පුණ්යා ධ්වජිනී ගංගාං දාශෛස්සංතාරිතා ස්වයම් ।
මෛත්රේ මුහූර්තේ ප්රයයෞ ප්රයාගවනමුත්තමම් ॥ 21 ॥
ආශ්වාසයිත්වා ච චමූං මහාත්මා නිවේශයිත්වා ච යථෝපජෝෂම් ।
ද්රෂ්ටුං භරද්වාජමෘෂිප්රවර්ය මෘත්විග්වෘතස්සන්භරතඃ ප්රතස්ථේ ॥ 22 ॥
ස බ්රාහ්මණස්යාऽශ්රමමභ්යුපේත්ය මහාත්මනෝ දේවපුරෝහිතස්ය ।
දදර්ශ රම්යෝටජවෘක්ෂෂංඩං මහද්වනං විප්රවරස්ය රම්යම් ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ඒකෝනනවතිතමස්සර්ගඃ ॥
