ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ഏകോനനവതിതമസ്സര്ഗഃ ।
ഉഷ്യ രാത്രിം തു തത്രൈവ ഗംഗാകൂലേ സ രാഘവഃ ।
ഭരതഃ കാല്യമുത്ഥായ ശത്രുഘ്നമിദമബ്രവീത് ॥ 1 ॥
ശത്രുഘ്നോത്തിഷ്ഠ കിം ശേഷേ നിഷാദാധിപതിം ഗുഹമ് ।
ശീഘ്രമാനയ ഭദ്രം തേ താരയിഷ്യതി വാഹിനീമ് ॥ 2 ॥
ജാഗര്മി നാഹം സ്വപിമി തമേവാഽര്യം വിചിംതയന് ।
ഇത്യേവമബ്രവീദ്ഭ്രാത്താ ശത്രുഘ്നോഽപി പ്രചോദിതഃ ॥ 3 ॥
ഇതി സംവദതോരേവമന്യോന്യം നരസിംഹയോഃ ।
ആഗമ്യ പ്രാംജലിഃ കാലേ ഗുഹോ ഭരതമബ്രവീത് ॥ 4 ॥
കച്ചിത്സുഖം നദീതീരേഽവാത്സീഃ കാകുത്സ്ഥ ശർവരീമ് ।
കച്ചിത്തേ സഹ സൈന്യസ്യ താവത്സർവമനാമയമ് ॥ 5 ॥
ഗുഹസ്യ വചനം ശ്രുത്വാ തത്തു സ്നേഹാദുദീരിതമ് ।
രാമസ്യാനുവശോ വാക്യം ഭരതോഽപീദമബ്രവീത് ॥ 6 ॥
സുഖാ ന ശ്ശർവരീ രാജന് പൂജിതാശ്ചാപി തേ വയമ് ।
ഗംഗാം തു നൌഭിര്ബഹ്വീഭിര്ദാശാസ്സംതാരയംതു നഃ ॥ 7 ॥
തതോ ഗുഹ സ്സംത്വരിതം ശ്രുത്വാ ഭരതശാസനമ് ।
പ്രതി പ്രവിശ്യ നഗരം തം ജ്ഞാതിജനമബ്രവീത് ॥ 8 ॥
ഉത്തിഷ്ഠത പ്രബുധ്യധ്വം ഭദ്രമസ്തു ച വസ്സദാ ।
നാവ സ്സമനുകര്ഷധ്വം താരയിഷ്യാമ വാഹിനീമ് ॥ 9 ॥
തേ തഥോക്താ സ്സമുത്ഥായ ത്വരിതാ രാജശാസനാത് ।
പംചനാവാം ശതാന്യാശു സമാനിന്യുസ്സമംതതഃ ॥ 10 ॥
അന്യാ സ്സ്വസ്തികവിജ്ഞേയാ മഹാഘംടാധരാ വരാഃ ।
ശോഭമാനാഃ പതാകാഭിര്യുക്തവാതാസ്സുസംഹതാഃ ॥ 11 ॥
തത സ്സ്വസ്തികവിജ്ഞേയാം പാംഡുകംബലസംവൃതാമ് ।
സനംദിഘോഷാം കല്യാണീം ഗുഹോ നാവമുപാഹരത് ॥ 12 ॥
താമാരുരോഹ ഭരതശ്ശത്രുഘ്നശ്ച മഹാബലഃ ।
കൌസല്യാ ച സുമിത്രാ ച യാശ്ചാന്യാ രാജയോഷിതഃ ॥ 13 ॥
പുരോഹിതശ്ച തത്പൂർവം ഗുരവോ ബ്രാഹ്മണാശ്ച യേ ।
അനംതരം രാജദാരാസ്തദൈവ ശകടാപണാഃ ॥ 14 ॥
ആവാസമാദീപയതാം തീര്ഥം ചാപ്യവഗാഹതാമ് ।
ഭാംഡാനി ചാദദാനാനാം ഘോഷസ്ത്രിദിവമസ്പൃശത് ॥ 15 ॥
പതാകിന്യസ്തു താ നാവസ്സ്വയം ദാശൈരധിഷ്ഠിതാഃ ।
വഹംത്യോ ജനമാരൂഢം തദാ സംപേതുരാശുഗാഃ ॥ 16 ॥
നാരീണാമഭിപൂര്ണാ സ്തു കാശ്ചിത് കാശ്ചിച്ച വാജിനാമ് ।
കാശ്ചിദത്ര വഹംതി സ്മ യാനയുഗ്യം മഹാധനമ് ॥ 17 ॥
താ സ്സ്മ ഗത്വാ പരം തീരമവരോപ്യ ച തം ജനമ് ।
നിവൃത്താഃ കാംഡചിത്രാണി ക്രിയംതേ ദാശബംധുഭിഃ ॥ 18 ॥
സവൈജയംതാസ്തു ഗജാ ഗജാരോഹപ്രചോദിതാഃ ।
തരംത സ്സ്മ പ്രകാശംതേ സധ്വജാ ഇവ പർവതാഃ ॥ 19 ॥
നാവസ്ത്വാരുരുഹുശ്ചാന്യേ പ്ലവൈസ്തേരു സ്തഥാപരേ ।
അന്യേ കുംഭഘടൈസ്തേരുരന്യേതേരുശ്ച ബാഹുഭിഃ ॥ 20 ॥
സാ പുണ്യാ ധ്വജിനീ ഗംഗാം ദാശൈസ്സംതാരിതാ സ്വയമ് ।
മൈത്രേ മുഹൂര്തേ പ്രയയൌ പ്രയാഗവനമുത്തമമ് ॥ 21 ॥
ആശ്വാസയിത്വാ ച ചമൂം മഹാത്മാ നിവേശയിത്വാ ച യഥോപജോഷമ് ।
ദ്രഷ്ടും ഭരദ്വാജമൃഷിപ്രവര്യ മൃത്വിഗ്വൃതസ്സന്ഭരതഃ പ്രതസ്ഥേ ॥ 22 ॥
സ ബ്രാഹ്മണസ്യാഽശ്രമമഭ്യുപേത്യ മഹാത്മനോ ദേവപുരോഹിതസ്യ ।
ദദര്ശ രമ്യോടജവൃക്ഷഷംഡം മഹദ്വനം വിപ്രവരസ്യ രമ്യമ് ॥ 23 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ഏകോനനവതിതമസ്സര്ഗഃ ॥
