ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ നവതിതമസ്സര്ഗഃ ।
ഭരദ്വാജാശ്രമം ദൃഷ്ട്വാ ക്രോശാദേവ നരര്ഷഭഃ ।
ബലം സർവമവസ്ഥാപ്യ ജഗാമ സഹ മംത്രിഭിഃ ॥ 1 ॥
പദ്ഭ്യാമേവ ഹി ധര്മജ്ഞോ ന്യസ്തശസ്ത്രപരിച്ഛദഃ ।
വസാനോ വാസസീ ക്ഷൌമേ പുരോധായ പുരോധസമ് ॥ 2 ॥
ഭരദ്വാജാശ്രമം ദൃഷ്ട്വാ ക്രോശാദേവ നരര്ഷഭഃ ।
ബലം സർവമവസ്ഥാപ്യ ജഗാമ സഹ മംത്രിഭിഃ ॥ 3 ॥
പദ്ഭ്യാമേവ ഹി ധര്മജ്ഞോ ന്യസ്തശസ്ത്രപരിച്ഛദഃ ।
വസാനോ വാസസീ ക്ഷൌമേ പുരോധായ പുരോധസമ് ॥ 4 ॥
തത സ്സംദര്ശനേ തസ്യ ഭരദ്വാജസ്യ രാഘവഃ ।
മംത്രിണസ്താനവസ്ഥാപ്യ ജഗാമാനുപുരോഹിതമ് ॥ 5 ॥
വസിഷ്ഠമഥ ദൃഷ്ട്വൈവ ഭരദ്വാജോ മഹാതപാഃ ।
സംചചാഽലാസനാത്തൂര്ണം ശിഷ്യാനര്ഘ്യമിതി ബ്രുവന് ॥ 6 ॥
സമാഗമ്യ വസിഷ്ഠേന ഭരതേനാഭിവാദിതഃ ।
അബുദ്ധ്യത മഹാതേജാസ്സുതം ദശരഥസ്യ തമ് ॥ 7 ॥
താഭ്യാമര്ഘ്യം ച പാദ്യം ച ദത്വാ പശ്ചാത്ഫലാനി ച ।
ആനുപൂർവ്യാച്ഛ ധര്മജ്ഞഃ പപ്രച്ഛ കുശലം കുലേ ॥ 8 ॥
അയോധ്യായാം ബലേ കോശേ മിത്രേഷ്വപി ച മംത്രിഷു ।
ജാനന് ദശരഥം വൃത്തം ന രാജാനമുദാഹരത് ॥ 9 ॥
വസിഷ്ഠോ ഭരതശ്ചൈനം പപ്രച്ഛതുരനാമയമ് ।
ശരീരേഽഗ്നിഷു വൃക്ഷേഷു ശിഷ്യേഷു മൃഗപക്ഷിഷു ॥ 10 ॥
തഥേതി തത്പ്രതിജ്ഞായ ഭരദ്വാജോ മഹാതപാഃ ।
ഭരതം പ്രത്യുവാചേദം രാഘവസ്നേഹബംധനാത് ॥ 11 ॥
കിമിഹാഽഗമനേ കാര്യം തവ രാജ്യം പ്രശാസതഃ ।
ഏതദാചക്ഷ്വ മേ സർവം ന ഹി മേ ശുദ്ധ്യതേ മനഃ ॥ 12 ॥
സുഷുവേ യമമിത്രഘ്നം കൌസല്യാനഽംദവര്ധനമ് ।
ഭ്രാത്രാ സഹ സഭാര്യോ യശ്ചിരം പ്രവ്രാജിതോ വനമ് ॥ 13 ॥
നിയുക്തഃ സ്ത്രീനിയുക്തേന പിത്രാ യോഽസൌ മഹായശാഃ ।
വനവാസീ ഭവേതീഹ സമാഃ കില ചതുര്ദശ ॥ 14 ॥
കച്ഛിന്ന തസ്യാപാപസ്യ പാപം കര്തുമിഹേച്ഛസി ।
അകംടകം ഭോക്തുമനാ രാജ്യം തസ്യാനുജസ്യ ച ॥ 15 ॥
ഏവമുക്തോ ഭരദ്വാജം ഭരതഃ പ്രത്യുവാച ഹ ।
പര്യശ്രുനയനോ ദുഃഖാദ്വാചാ സംസജ്ജമാനയാ ॥ 16 ॥
ഹതോഽസ്മി യദി മാമേവം ഭഗവാനപി മന്യതേ ।
മത്തോ ന ദോഷമാശംകേ നൈവം മാമനുശാസ്തു ഹി ॥ 17 ॥
ന ചൈതദിഷ്ടം മാതാ മേ യദവോചന്മദംതരേ ।
നാഹമേതേന തുഷ്ടശ്ച ന തദ്വചനമാദദേ ॥ 18 ॥
അഹം തു തം നരവ്യാഘ്രമുപയാതഃ പ്രസാദകഃ ।
പ്രതിനേതുമയോധ്യാം ച പാദൌ തസ്യാഭിവംദിതുമ് ॥ 19 ॥
ത്വം മാമേവംഗതം മത്വാ പ്രസാദം കര്തുമര്ഹസി ।
ശംസ മേ ഭഗവന്രാമഃ ക്വ സംപ്രതി മഹീപതിഃ ॥ 20 ॥
വശിഷ്ഠാദിഭിഃ ഋത്വിഗ്ഭിര്യാചിതോ ഭഗവാംസ്തതഃ ।
ഉവാച തം ഭരദ്വാജഃ പ്രസാദാദ്ഭരതം വചഃ ॥ 21 ॥
ത്വയ്യേതത്പുരുഷവ്യാഘ്ര യുക്തം രാഘവവംശജേ ।
ഗുരുവൃത്തിര്ദമശ്ചൈവ സാധൂനാമനുയായിതാ ॥ 22 ॥
ജാനേ ചൈതന്മനസ്ഥം തേ ദൃഢീകരണമസ്ത്വിതി ।
അപൃച്ഛം ത്വാം തഥാഽത്യര്ഥം കീര്തിം സമഭിവര്ധയന് ॥ 23 ॥
ജാനേ ച രാമം ധര്മജ്ഞം സസീതം സഹലക്ഷ്മണമ് ।
അസൌ വസതി തേ ഭ്രാതാ ചിത്രകൂടേ മഹാഗിരൌ ॥ 24 ॥
ശ്വസ്തു ഗംതാസി തം ദേശം വസാദ്യ സഹ മംത്രിഭിഃ ।
ഏതന്മേ കുരു സുപ്രാജ്ഞ കാമം കാമാര്ഥകോവിദ ॥ 25 ॥
തതസ്തഥേത്യേവമുദാരദര്ശനഃ പ്രതീതരൂപോ ഭരതോഽബ്രവീദ്വചഃ ।
ചകാര ബുദ്ധിം ച തദാ തദാശ്രമേ നിശാനിവാസായ നരാധിപാഽത്മജഃ ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ നവതിതമസ്സര്ഗഃ ॥
