śrīmadvālmīkīya rāmāyaṇē ayōdhyākāṇḍam ।
atha navatitamassargaḥ ।
bharadvājāśramaṃ dṛṣṭvā krōśādēva nararṣabhaḥ ।
balaṃ sarvamavasthāpya jagāma saha mantribhiḥ ॥ 1 ॥
padbhyāmēva hi dharmajñō nyastaśastraparichChadaḥ ।
vasānō vāsasī kṣaumē purōdhāya purōdhasam ॥ 2 ॥
bharadvājāśramaṃ dṛṣṭvā krōśādēva nararṣabhaḥ ।
balaṃ sarvamavasthāpya jagāma saha mantribhiḥ ॥ 3 ॥
padbhyāmēva hi dharmajñō nyastaśastraparichChadaḥ ।
vasānō vāsasī kṣaumē purōdhāya purōdhasam ॥ 4 ॥
tata ssandarśanē tasya bharadvājasya rāghavaḥ ।
mantriṇastānavasthāpya jagāmānupurōhitam ॥ 5 ॥
vasiṣṭhamatha dṛṣṭvaiva bharadvājō mahātapāḥ ।
sañchachā'lāsanāttūrṇaṃ śiṣyānarghyamiti bruvan ॥ 6 ॥
samāgamya vasiṣṭhēna bharatēnābhivāditaḥ ।
abuddhyata mahātējāssutaṃ daśarathasya tam ॥ 7 ॥
tābhyāmarghyaṃ cha pādyaṃ cha datvā paśchātphalāni cha ।
ānupūrvyāchCha dharmajñaḥ paprachCha kuśalaṃ kulē ॥ 8 ॥
ayōdhyāyāṃ balē kōśē mitrēṣvapi cha mantriṣu ।
jānan daśarathaṃ vṛttaṃ na rājānamudāharat ॥ 9 ॥
vasiṣṭhō bharataśchainaṃ paprachChaturanāmayam ।
śarīrē'gniṣu vṛkṣēṣu śiṣyēṣu mṛgapakṣiṣu ॥ 10 ॥
tathēti tatpratijñāya bharadvājō mahātapāḥ ।
bharataṃ pratyuvāchēdaṃ rāghavasnēhabandhanāt ॥ 11 ॥
kimihā'gamanē kāryaṃ tava rājyaṃ praśāsataḥ ।
ētadāchakṣva mē sarvaṃ na hi mē śuddhyatē manaḥ ॥ 12 ॥
suṣuvē yamamitraghnaṃ kausalyāna'ndavardhanam ।
bhrātrā saha sabhāryō yaśchiraṃ pravrājitō vanam ॥ 13 ॥
niyuktaḥ strīniyuktēna pitrā yō'sau mahāyaśāḥ ।
vanavāsī bhavētīha samāḥ kila chaturdaśa ॥ 14 ॥
kachChinna tasyāpāpasya pāpaṃ kartumihēchChasi ।
akaṇṭakaṃ bhōktumanā rājyaṃ tasyānujasya cha ॥ 15 ॥
ēvamuktō bharadvājaṃ bharataḥ pratyuvācha ha ।
paryaśrunayanō duḥkhādvāchā saṃsajjamānayā ॥ 16 ॥
hatō'smi yadi māmēvaṃ bhagavānapi manyatē ।
mattō na dōṣamāśaṅkē naivaṃ māmanuśāstu hi ॥ 17 ॥
na chaitadiṣṭaṃ mātā mē yadavōchanmadantarē ।
nāhamētēna tuṣṭaścha na tadvachanamādadē ॥ 18 ॥
ahaṃ tu taṃ naravyāghramupayātaḥ prasādakaḥ ।
pratinētumayōdhyāṃ cha pādau tasyābhivanditum ॥ 19 ॥
tvaṃ māmēvaṅgataṃ matvā prasādaṃ kartumarhasi ।
śaṃsa mē bhagavanrāmaḥ kva samprati mahīpatiḥ ॥ 20 ॥
vaśiṣṭhādibhiḥ ṛtvigbhiryāchitō bhagavāṃstataḥ ।
uvācha taṃ bharadvājaḥ prasādādbharataṃ vachaḥ ॥ 21 ॥
tvayyētatpuruṣavyāghra yuktaṃ rāghavavaṃśajē ।
guruvṛttirdamaśchaiva sādhūnāmanuyāyitā ॥ 22 ॥
jānē chaitanmanasthaṃ tē dṛḍhīkaraṇamastviti ।
apṛchChaṃ tvāṃ tathā'tyarthaṃ kīrtiṃ samabhivardhayan ॥ 23 ॥
jānē cha rāmaṃ dharmajñaṃ sasītaṃ sahalakṣmaṇam ।
asau vasati tē bhrātā chitrakūṭē mahāgirau ॥ 24 ॥
śvastu gantāsi taṃ dēśaṃ vasādya saha mantribhiḥ ।
ētanmē kuru suprājña kāmaṃ kāmārthakōvida ॥ 25 ॥
tatastathētyēvamudāradarśanaḥ pratītarūpō bharatō'bravīdvachaḥ ।
chakāra buddhiṃ cha tadā tadāśramē niśānivāsāya narādhipā'tmajaḥ ॥ 26 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē navatitamassargaḥ ॥
