ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ପଂଚଵିଂଶସ୍ସର୍ଗଃ ।
ଅଥ ତସ୍ୟାପ୍ରମେୟସ୍ୟ ମୁନେର୍ଵଚନମୁତ୍ତମମ୍ ।
ଶ୍ରୁତ୍ଵା ପୁରୁଷଶାର୍ଦୂଲଃ ପ୍ରତ୍ୟୁଵାଚ ଶୁଭାଂ ଗିରମ୍ ॥ 1 ॥
ଅଲ୍ପଵୀର୍ୟା ୟଦା ୟକ୍ଷା ଶ୍ଶ୍ରୂୟଂତେ ମୁନିପୁଂଗଵ ।
କଥନ୍ନାଗସହସ୍ରସ୍ୟ ଧାରୟତ୍ୟବଲା ବଲମ୍ ॥ 2 ॥
ଵିଶ୍ଵାମିତ୍ରୋଽବ୍ରଵୀଦ୍ଵାକ୍ୟଂ ଶୃଣ ୟେନ ବଲୋତ୍ତରା ।
ଵରଦାନକୃତଂ ଵୀର୍ୟଂ ଧାରୟତ୍ୟବଲା ବଲମ୍ ॥ 3 ॥
ପୂର୍ଵମାସୀନ୍ମହାୟକ୍ଷସ୍ସୁକେତୁର୍ନାମ ଵୀର୍ୟଵାନ୍ ।
ଅନପତ୍ୟଶ୍ଶୁଭାଚାରସ୍ସ ଚ ତେପେ ମହତ୍ତପଃ ॥ 4 ॥
ପିତାମହସ୍ତୁ ସୁପ୍ରୀତସ୍ତସ୍ୟ ୟକ୍ଷପତେ ସ୍ତଦା ।
କନ୍ୟାରତ୍ନଂ ଦଦୌ ରାମ ତାଟକାଂ ନାମ ନାମତଃ ॥ 5 ॥
ଦଦୌ ନାଗସହସ୍ରସ୍ୟ ବଲଂ ଚାସ୍ୟାଃ ପିତାମହଃ ।
ନତ୍ଵେଵ ପୁତ୍ରଂ ୟକ୍ଷାୟ ଦଦୌ ବ୍ରହ୍ମା ମହାୟଶାଃ ॥ 6 ॥
ତାଂ ତୁ ଜାତାଂ ଵିଵର୍ଧଂତୀଂ ରୂପୟୌଵନଶାଲିନୀମ୍ ।
ଝର୍ଝପୁତ୍ରାୟ ସୁଂଦାୟ ଦଦୌ ଭାର୍ୟାଂ ୟଶସ୍ଵିନୀମ୍ ॥ 7 ॥
କସ୍ୟଚିତ୍ତ୍ଵଥ କାଲସ୍ୟ ୟକ୍ଷୀ ପୁତ୍ରମଜାୟତ ।
ମାରୀଚଂ ନାମ ଦୁର୍ଧର୍ଷଂ ୟଶ୍ଶାପାଦ୍ରାକ୍ଷସୋଽଭଵତ୍ ॥ 8 ॥
ସୁଂଦେ ତୁ ନିହତେ ରାମ ସାଗସ୍ତ୍ୟମୃଷିସତ୍ତମମ୍ ।
ତାଟକା ସହ ପୁତ୍ରେଣ ପ୍ରଧର୍ଷୟିତୁମିଚ୍ଛତି ॥ 9 ॥
ଭକ୍ଷାର୍ଥଂ ଜାତସଂରଂଭା ଗର୍ଜଂତୀ ସାଭ୍ୟଧାଵତ ।
0 ଆପତଂତୀଂ ତୁ ତାଂ ଦୃଷ୍ଟ୍ଵା ଅଗସ୍ତ୍ୟୋ ଭଗଵାନୃଷିଃ ॥ 10 ॥
ରାକ୍ଷସତ୍ଵଂ ଭଜସ୍ଵେତି ମାରୀଚଂ ଵ୍ୟାଜହାର ସଃ ।
1 ଅଗସ୍ତ୍ୟଃ ପରମକ୍ରୁଦ୍ଧସ୍ତାଟକାମପି ଶପ୍ତଵାନ୍ ॥ 11 ॥
ପୁରୁଷାଦୀ ମହାୟକ୍ଷୀ ଵିରୂପା ଵିକୃତାନନା ।
ଇଦଂ ରୂପଂ ଵିହାୟାଥ ଦାରୁଣଂ ରୂପମସ୍ତୁ ତେ ॥ 12 ॥
ସୈଷା ଶାପକୃତାମର୍ଷା ତାଟକା କ୍ରୋଧମୂର୍ଛିତା ।
ଦେଶମୁତ୍ସାଦୟତ୍ୟେନମଗସ୍ତ୍ୟଚରିତଂ ଶୁଭମ୍ ॥ 13 ॥
ଏନାଂ ରାଘଵ ଦୁର୍ଵୃତ୍ତାଂ ୟକ୍ଷୀଂ ପରମଦାରୁଣାମ୍ ।
ଗୋବ୍ରାହ୍ମଣହିତାର୍ଥାୟ ଜହି ଦୁଷ୍ଟପରାକ୍ରମାମ୍ ॥ 14 ॥
ନ ହ୍ୟେନାଂ ଶାପସମ୍ସ୍ପୃଷ୍ଟାଂ କଶ୍ଚିଦୁତ୍ସହତେ ପୁମାନ୍ ।
ନିହଂତୁଂ ତ୍ରିଷୁ ଲୋକେଷୁ ତ୍ଵାମୃତେ ରଘୁନଂଦନ ॥ 15 ॥
ନ ହି ତେ ସ୍ତ୍ରୀଵଧକୃତେ ଘୃଣା କାର୍ୟା ନରୋତ୍ତମ ।
ଚାତୁର୍ଵଣ୍ୟହିତାର୍ଥାୟ କର୍ତଵ୍ୟଂ ରାଜସୂନୁନା ॥ 16 ॥
ନୃଶଂସମନୃଶଂସଂ ଵା ପ୍ରଜାରକ୍ଷଣକାରଣାତ୍ ।
ପାତକଂ ଵା ସଦୋଷଂ ଵା କର୍ତଵ୍ୟଂ ରକ୍ଷତା ସତା ॥ 17 ॥
ରାଜ୍ୟଭାରନିୟୁକ୍ତାନାମେଷ ଧର୍ମସ୍ସନାତନଃ ।
ଅଧର୍ମ୍ୟାଂ ଜହି କାକୁତ୍ସ୍ଥ ଧର୍ମୋହ୍ୟସ୍ୟା ନ ଵିଦ୍ୟତେ ॥ 18 ॥
ଶ୍ରୂୟତେ ହି ପୁରା ଶକ୍ରୋ ଵିରୋଚନସୁତାଂ ନୃପ ।
ପୃଥିଵୀଂ ହଂତୁମିଚ୍ଛଂତୀଂ ମଂଥରାମଭ୍ୟସୂଦୟତ୍ ॥ 19 ॥
ଵିଷ୍ଣୁନାପି ପୁରା ରାମ ଭୃଗୁପତ୍ନୀ ଦୃଢଵ୍ରତା ।
ଅନିଂଦ୍ରଂ ଲୋକମିଚ୍ଛଂତୀ କାଵ୍ୟମାତା ନିଷୂଦିତା ॥ 20 ॥
ଏତୈଶ୍ଚାନ୍ୟୈଶ୍ଚ ବହୁଭୀ ରାଜପୁତ୍ର ମହାତ୍ମଭିଃ ।
ଅଧର୍ମସହିତା ନାର୍ୟୋ ହତାଃ ପୁରୁଷସତ୍ତମୈଃ ॥ 21 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ପଂଚଵିଂଶସ୍ସର୍ଗଃ ॥
