ശ്രീമദ്വാല്മീകീയ രാമായണേ ബാലകാംഡമ് ।
അഥ പംചവിംശസ്സര്ഗഃ ।
അഥ തസ്യാപ്രമേയസ്യ മുനേർവചനമുത്തമമ് ।
ശ്രുത്വാ പുരുഷശാര്ദൂലഃ പ്രത്യുവാച ശുഭാം ഗിരമ് ॥ 1 ॥
അല്പവീര്യാ യദാ യക്ഷാ ശ്ശ്രൂയംതേ മുനിപുംഗവ ।
കഥന്നാഗസഹസ്രസ്യ ധാരയത്യബലാ ബലമ് ॥ 2 ॥
വിശ്വാമിത്രോഽബ്രവീദ്വാക്യം ശൃണ യേന ബലോത്തരാ ।
വരദാനകൃതം വീര്യം ധാരയത്യബലാ ബലമ് ॥ 3 ॥
പൂർവമാസീന്മഹായക്ഷസ്സുകേതുര്നാമ വീര്യവാന് ।
അനപത്യശ്ശുഭാചാരസ്സ ച തേപേ മഹത്തപഃ ॥ 4 ॥
പിതാമഹസ്തു സുപ്രീതസ്തസ്യ യക്ഷപതേ സ്തദാ ।
കന്യാരത്നം ദദൌ രാമ താടകാം നാമ നാമതഃ ॥ 5 ॥
ദദൌ നാഗസഹസ്രസ്യ ബലം ചാസ്യാഃ പിതാമഹഃ ।
നത്വേവ പുത്രം യക്ഷായ ദദൌ ബ്രഹ്മാ മഹായശാഃ ॥ 6 ॥
താം തു ജാതാം വിവര്ധംതീം രൂപയൌവനശാലിനീമ് ।
ഝര്ഝപുത്രായ സുംദായ ദദൌ ഭാര്യാം യശസ്വിനീമ് ॥ 7 ॥
കസ്യചിത്ത്വഥ കാലസ്യ യക്ഷീ പുത്രമജായത ।
മാരീചം നാമ ദുര്ധര്ഷം യശ്ശാപാദ്രാക്ഷസോഽഭവത് ॥ 8 ॥
സുംദേ തു നിഹതേ രാമ സാഗസ്ത്യമൃഷിസത്തമമ് ।
താടകാ സഹ പുത്രേണ പ്രധര്ഷയിതുമിച്ഛതി ॥ 9 ॥
ഭക്ഷാര്ഥം ജാതസംരംഭാ ഗര്ജംതീ സാഭ്യധാവത ।
0 ആപതംതീം തു താം ദൃഷ്ട്വാ അഗസ്ത്യോ ഭഗവാനൃഷിഃ ॥ 10 ॥
രാക്ഷസത്വം ഭജസ്വേതി മാരീചം വ്യാജഹാര സഃ ।
1 അഗസ്ത്യഃ പരമക്രുദ്ധസ്താടകാമപി ശപ്തവാന് ॥ 11 ॥
പുരുഷാദീ മഹായക്ഷീ വിരൂപാ വികൃതാനനാ ।
ഇദം രൂപം വിഹായാഥ ദാരുണം രൂപമസ്തു തേ ॥ 12 ॥
സൈഷാ ശാപകൃതാമര്ഷാ താടകാ ക്രോധമൂര്ഛിതാ ।
ദേശമുത്സാദയത്യേനമഗസ്ത്യചരിതം ശുഭമ് ॥ 13 ॥
ഏനാം രാഘവ ദുർവൃത്താം യക്ഷീം പരമദാരുണാമ് ।
ഗോബ്രാഹ്മണഹിതാര്ഥായ ജഹി ദുഷ്ടപരാക്രമാമ് ॥ 14 ॥
ന ഹ്യേനാം ശാപസമ്സ്പൃഷ്ടാം കശ്ചിദുത്സഹതേ പുമാന് ।
നിഹംതും ത്രിഷു ലോകേഷു ത്വാമൃതേ രഘുനംദന ॥ 15 ॥
ന ഹി തേ സ്ത്രീവധകൃതേ ഘൃണാ കാര്യാ നരോത്തമ ।
ചാതുർവണ്യഹിതാര്ഥായ കര്തവ്യം രാജസൂനുനാ ॥ 16 ॥
നൃശംസമനൃശംസം വാ പ്രജാരക്ഷണകാരണാത് ।
പാതകം വാ സദോഷം വാ കര്തവ്യം രക്ഷതാ സതാ ॥ 17 ॥
രാജ്യഭാരനിയുക്താനാമേഷ ധര്മസ്സനാതനഃ ।
അധര്മ്യാം ജഹി കാകുത്സ്ഥ ധര്മോഹ്യസ്യാ ന വിദ്യതേ ॥ 18 ॥
ശ്രൂയതേ ഹി പുരാ ശക്രോ വിരോചനസുതാം നൃപ ।
പൃഥിവീം ഹംതുമിച്ഛംതീം മംഥരാമഭ്യസൂദയത് ॥ 19 ॥
വിഷ്ണുനാപി പുരാ രാമ ഭൃഗുപത്നീ ദൃഢവ്രതാ ।
അനിംദ്രം ലോകമിച്ഛംതീ കാവ്യമാതാ നിഷൂദിതാ ॥ 20 ॥
ഏതൈശ്ചാന്യൈശ്ച ബഹുഭീ രാജപുത്ര മഹാത്മഭിഃ ।
അധര്മസഹിതാ നാര്യോ ഹതാഃ പുരുഷസത്തമൈഃ ॥ 21 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ പംചവിംശസ്സര്ഗഃ ॥
